1 Reyes 15:1-34
15 Te Abiyam och ta ajwalil yuʼun Judá te kʼalal ayix 18 jaʼbil ta ajwalil-a te Jeroboán snichʼan Nebat.
2 Wentainwan oxeb jaʼbil ta Jerusalén, Maacá sbiil te snane,* jaʼ smam* te Abisalom.
3 Te Abiyam jaʼnix jich la spas-euk te muliletik te la spas te state. Ma junuk yoʼtan abatin ta stojol te Jehová te Dios yuʼune jich bitʼil la spas te David te antiguo smeʼ stat.
4 Pero, ta swenta te bin la yalbey ta jamal te David, te Jehová te Dios yuʼun la yakʼbey jun tsumbil kʼajkʼ ta Jerusalén te Abiyam, jaʼ te kʼalal la yakʼ ochuk jilel ta ajwalil jtul snichʼan sok jich ma xtupʼ skʼoplal-a te Jerusalén.
5 Melel te David jaʼ la spas te bintik lek ya yil te Jehová sok jaʼ la spas te bin albot ta mantal te jayeb kʼajkʼal kuxul ta kʼinale, jaʼnax ma lek te bin la spas ta stojol te Urías te hitita-winike.
6 Te Rehoboam sok te Jeroboán ayin guerra yuʼunik te jayeb kʼajkʼal kuxulik ta kʼinale.
7 Te bintik la spas ta skuxlejal te Abiyam sok spisil te bintikxan la spas, tsʼibaybil jilel ta libro te ya scholbey skʼoplal te skuxlejal te ajwaliletik ta Judá. Te Abiyam sok Jeroboán jaʼnix jich ayin guerra yuʼunik.
8 Jich te Abiyam way sbakʼetal sok te antiguo smeʼ stat sok la smukik ta Mukʼul lum yuʼun David. Tey-abi, jaʼ och jilel ta ajwalil te Asá, te snichʼane.
9 Te Asá jajch ta wentainwanej ta Judá te kʼalal ayix 20 jaʼbil ta ajwalil-a te Jeroboán ta Israel.
10 Wentainwan 41 jaʼbil ta Jerusalén. Te Asá jaʼ schuchuʼ* te Maacá, jaʼ smam* te Abisalom.
11 Te Asá jaʼ la spas te bintik lek ya yil te Jehová jich te bitʼil la spas te David te antiguo smeʼ state.
12 Jaʼnix jich la stentiklan lokʼel te winiketik tey ta lum te ya schon sbaik yuʼun ya sjokinik ta wayel yan winik swenta ya yichʼik ta mukʼ te lokʼombaetik yuʼunik sok la slokʼes spisil te lokʼombaetik te ilobtik* sba te la spasik te antiguo smeʼ statike.
13 Jaʼnix jich la slokʼes ta ajwalil ants te Maacá te schuchuʼe,* melel la spas jun lokʼomba te ilobtik sba yuʼun ya yichʼik ta mukʼ te chʼul teʼ yuʼun Aserá.* Te Asá la sjin te lokʼomba te ilobtik sba sok la schikʼ ta spamlej yuʼun Cedrón.
14 Pero maba la yichʼ lajinel te toyol awilaletik.* Manchukme jich-abi, te Asá jun yoʼtan la yakʼ sba ta abatinel ta stojol te Jehová te jayeb kʼajkʼal kuxul ta kʼinale.
15 La yichʼ tal ta sna te Jehová te biluketik te la schʼultes sok te state: jaʼ te plata, oro sok spisil ta chajp aʼtejibaletik.
16 Te Asá sok te Baasá, te ajwalil yuʼun Israel, spisil-ora ayin guerra yuʼunik.
17 Jich te Baasá te ajwalil yuʼun Israel bajt yakʼbey guerra te Judá sok la schaʼpas te stsʼajkʼul te Ramá swenta jich maʼyuk machʼa ya xlokʼ ni ya x-och tal ta skʼinal te Asá te ajwalil yuʼun Judá.
18 Jich yuʼun, te Asá la stsob tal spisil te plata sok te oro te jilemik ta yawil kʼulejalil ta sna te Jehová sok ta yawil kʼulejalil ta sna te ajwalil soknix la yakʼtiklanbey ta skʼab te j-abatetik yuʼune. Tey-abi, te ajwalil Asá la stikun bael te j-abatetik yuʼun ta stojol te Ben-Hadad —te snichʼan Tabrimón, te snichʼan Hezión—, te ajwalil yuʼun Siria, te ay ta nainel ta Damasco. Jich la yalbey bael:
19 «Ayme jchapoj jkʼoptik, jich te bitʼil la spas te atat sok te jtate. Lame jtikunbat tal amajtan plata sok oro. Lajinbeya skʼoplal te chapbilkʼop apasoj sok te Baasá te ajwalil yuʼun Israel swenta jich ya xnamaj* bael ta jkʼinal».
20 Jich yuʼun, te Ben-Hadad la schʼuunbey skʼop te ajwalil Asá, la stikun bael te capitanetik yuʼun te soldadoetik ta yakʼbeyel guerra te mukʼul lumetik yuʼun Israel, la yuʼuninik te Ijón, Dan, Abel-Bet-Maacá, ta spamal te Kinéret sok ta spamal te skʼinal Neftalí.
21 Te kʼalal la yaʼiy stojol te Baasá, ta oranax la yijkitay spasel te stsʼajkʼul te Ramá sok jil ta nainel ta Tirzá.
22 Jich yuʼun, te ajwalil Asá la stsob tal spisil te yajwalul Judá, maʼyuk machʼa jil, la yichʼik bael te tonetik sok te teʼetik te la stuuntes te Baasá ta spasel te stsʼajkʼul te Ramá, jaʼ la stuuntes yuʼun la schaʼpas-a te stsʼajkʼul te Gueba te ay ta skʼinal Benjamín soknix te Mizpá.
23 Te bintik la spas ta skuxlejal te Asá, te bitʼil tsalawan ta guerraetik, spisil te bintikxan la spas sok te stsʼajkʼul te mukʼul lumetik te la schaʼpas, tsʼibaybil jilel ta libro te ya scholbey skʼoplal te skuxlejal te ajwaliletik ta Judá. Pero, te kʼalal mamalix-ae, la sta chamel ta yok.
24 Jich te Asá way sbakʼetal sok te antiguo smeʼ stat sok la smukik ta Mukʼul lum yuʼun David, jaʼ te antiguo smeʼ stat. Tey-abi, jaʼ och jilel ta ajwalil te Jehosafat, te snichʼane.
25 Te Nadab snichʼan Jeroboán och ta ajwalil ta Israel te kʼalal ayix cheb jaʼbil ta ajwalil-a te Asá ta Judá, wentainwan cheb jaʼbil ta Israel.
26 Jaʼ la spas te bintik ma lek ya yil te Jehová. Jaʼnix jich la spas-euk te muliletik te la spas te stat te la yakʼbey sta smul te lum Israel.
27 Kʼalal te Nadab sok spisil te Israel yakik ta sjoytayel te Guibetón, te Baasá snichʼan Ahíya te talem ta stsʼumbal Isacar la schap te bitʼil ya smil te Nadab, jich la smil ta Guibetón te jaʼ skʼinal te filisteoetike.
28 Te Baasá la smil te Nadab te kʼalal ayix oxeb jaʼbil ta ajwalil-a te Asá ta Judá. Tey-abi, jaʼ och jilel ta ajwalil te Baasá.
29 Jaʼnax te kʼalal och ta ajwalil, la smil spisil te stsʼumbal te Jeroboán; maʼyuk ni jtuluk te kuxul la yijkitaye. La slajinlan ta jkʼaxel jich te bitʼil la yal te Jehová ta swenta te Ahíya te j-abat yuʼun, te talem ta Siló.
30 Jich kʼot ta pasel-abi ta skaj te muliletik la spas te Jeroboán te la yakʼbey sta smul te lum Israel sok te la yakʼ ilinuk bayal te Jehová te Dios yuʼun Israel.
31 Te bintik la spas ta skuxlejal te Nadab sok spisil te bintikxan la spas, tsʼibaybil jilel ta libro te ya scholbey skʼoplal te skuxlejal te ajwaliletik ta Israel.
32 Te Asá sok te Baasá te ajwalil yuʼun Israel spisil-ora ayin guerra yuʼunik.
33 Te Baasá snich’an Ahíya och ta ajwalil ta spisil Israel ta Tirzá te kʼalal ayix oxeb jaʼbil ta ajwalil-a te Asá ta Judá sok wentainwan 24 jaʼbil.
34 Pero, te Baasá jaʼ la spas te bintik ma lek ya yil te Jehová. Jaʼnix jich la spas-euk te muliletik te la spas te Jeroboán te la yakʼbey sta smul te lum Israel.
Notaetik
^ Ta yantik variante «smeʼe», «smamae».
^ Ta yantik variante «yil-al achʼix».
^ Ta yantik variante «smukʼul meʼ», «smeʼchun».
^ Ta yantik variante «yil-al achʼix».
^ Jaʼ jpʼal kʼop ta hebreo kʼop te snitojbeyniwan sba skʼoplal sok te kʼopil «stsaʼ chambalam». Te kʼopil-abi ya yichʼ tuuntesel te kʼalal ay bin ya yichʼ ilayele.
^ Ta yantik variante «smukʼul meʼe», «smeʼchune».
^ Ta yantik variante «xjakalaj», «xkʼub».
