1 Reyes 16:1-34
16 Jich yuʼun, te Jehú snichʼan Hananí jich albot yuʼun te Jehová ta swenta te bin ya xkʼot ta stojol te Baasá:
2 «La jachat moel ta tan yuʼun ochat ta jwolwanej ta lum Israel kuʼun, pero jaʼnix jich la apas-euk te bin la spas te Jeroboán sok la awakʼ sta smul te lum Israel kuʼun, jich la ajachbonik kilinba ta skaj te amulike.
3 Jich yuʼun yame jlajin ta jkʼaxel te Baasá sok yame jmes spisil te stsʼumbale, jichme ya jpasbey te bitʼil la jpasbey te stsʼumbal te Jeroboán snichʼan Nebat.
4 Te machʼatik ay yuʼun te Baasá te ya xlajik ta mukʼul lum, yame yichʼik tiʼel yuʼun te tsʼiʼetike. Te machʼatik ya xlajik ta akiltik yame yichʼik tiʼel yuʼun te jaʼmal mutetik te ya xwilik ta chʼulchan».
5 Te bintik la spas ta skuxlejal te Baasá, spisil te bintikxan la spas sok te bitʼil tsalawan ta guerraetik, tsʼibaybil jilel ta libro te ya scholbey skʼoplal te skuxlejal te ajwaliletik ta Israel.
6 Jich te Baasá way sbakʼetal sok te antiguo smeʼ stat sok la smukik ta Tirzá. Tey-abi, jaʼ och jilel ta ajwalil te Elá, te snichʼane.
7 Ta swenta te j-alwanej Jehú snichʼan Hananí jul ta stojol te skʼop te Jehová ta swenta te Baasá sok te machʼatik ay yuʼun ta sna ta skaj te bintik chopol* la spas ta stojol te Jehová —jaʼ te kʼalal la spas te bintik ma lek sok te jich la spas-euk te bitʼil stsʼumbal Jeroboán— sok te bitʼil la smil te Nadab.*
8 Te Elá snichʼan Baasá och ta ajwalil ta Israel ta Tirzá te kʼalal ayix 26 jaʼbil ta ajwalil-a te Asá ta Judá sok wentainwan cheb jaʼbil.
9 Te Zimrí te j-abat yuʼune, jaʼ te machʼa yakʼojbey swentain oliluk te carretaetik yuʼun guerra yuʼune. Te kʼalal yak ta yakubel-a te Elá ta Tirzá ta sna te Arzá, te Zimrí la schap te bitʼil ya smil te Elá. Te Arzá jaʼ te machʼa swentainojbey-a te sna te ajwalil ta Tirzá.
10 Jich yuʼun, te Zimrí och bael, la yejchentes sok la smil te Elá te kʼalal ayix 27 jaʼbil ta ajwalil-a te Asá ta Judá. Tey-abi, jaʼ och jilel ta ajwalil te Zimrí.
11 Jaʼnax te kʼalal och ta ajwalil sok te la snajkan sba ta smukʼul naktajib, la smil spisil te stsʼumbal Baasá. Maʼyuk ni jtuluk winik* te kuxul la yijkitay, tey ochem skʼoplal-a te machʼa ay bin yutoj sba sok* o te yamigo.
12 Jich te Zimrí la slajinbey ta jkʼaxel spisil te stsʼumbal Baasá, jich te bitʼil la yal te Jehová te ya xkʼot ta stojol te Baasá ta swenta te j-alwanej Jehú.
13 Jich kʼot ta pasel spisil ini ta skaj te smul te Baasá sok te Elá te snichʼane, soknix ta skaj te la yakʼ sta smulik te lum Israel te kʼalal la yichʼik ta mukʼ lokʼombaetik te ma xtuunik te jich la sjachbeyik yilinba te Jehová te Dios yuʼun Israel.
14 Te bintik la spas ta skuxlejal te Elá sok spisil te bintikxan la spas, tsʼibaybil jilel ta libro te ya scholbey skʼoplal te skuxlejal te ajwaliletik ta Israel.
15 Te k’alal ayix 27 jaʼbil ta ajwalil-a te Asá ta Judá, te Zimrí och ta ajwalil jukeb kʼajkʼal ta Tirzá. Jaʼ-abi kʼot ta pasel te kʼalal spasoj scampamentoik-a te soldadoetik yuʼun Israel swenta ya yakʼbeyik guerra te Guibetón te jaʼ skʼinalik te filisteoetike.
16 Te soldadoetik te spasoj scampamentoik tey-a la yaʼiyik stojol te jich yak ta alel: «Te Zimrí la schapbey skʼoplal ta skontrainel te ajwalil sok la smilix». Ta kʼajkʼal-abi, spisil te machʼatik ayik ta campamento la yotsesik ta ajwalil yuʼun Israel te Omrí, te capitán yuʼun te soldadoetike.
17 Jich yuʼun, te Omrí sok spisil te soldadoetik lokʼik bael ta Guibetón yuʼun ya sjoytayik te Tirzá.
18 Te k’alal la yil te Zimrí te la yochintayikix te mukʼul lum, och bael ta toyol mukʼul tsʼajkʼ te ay ta sna te ajwalil, la schikʼ te nae, tey laj-a.
19 Jich kʼot ta pasel ini ta skaj te smule, jaʼ te la spas te bintik ma lek ya yil te Jehová sok te jaʼ la spas-euk te bintik la spas te Jeroboán. Soknix ta skaj te la yakʼ sta smul te lum Israel.
20 Te bintik la spas ta skuxlejal te Zimrí sok te bitʼil la schap te ya smil te ajwalile, tsʼibaybil jilel ta libro te ya scholbey skʼoplal te skuxlejal te ajwaliletik ta Israel.
21 Ta yorail-abi la xat sba te lum Israel, chaʼtsojb la yakʼ sbaik. Te jtsojbe jaʼ stʼunojik te Tibní snichʼan Guinat sok jaʼ ya skʼan ya yotsesik ta ajwalil, te yan jtsojbe jaʼ stʼunojik te Omrí.
22 Pero, te machʼatik stʼunojik te Omrí la stsalik te machʼatik stʼunojik te Tibní snichʼan Guinat. Tey-abi laj te Tibní sok jaʼ och jilel ta ajwalil te Omrí.
23 Te Omrí och ta ajwalil ta Israel te kʼalal ayix 31 jaʼbil ta ajwalil-a te Asá ta Judá sok wentainwan 12 jaʼbil. Wentainwan wakeb jaʼbil ta Tirzá.
24 Te Omrí la smanbey te Sémer te wits yuʼun te ay ta Samaria ta cheb talento* yuʼun plata sok la sjach mukʼul lum tey-a. La yakʼbey sbiilin Samaria* te mukʼul lum-abi ta swenta sbiil te Sémer te jaʼ yajwal te witse.
25 Te Omrí jaʼ la spas te bintik ma lek ya yil te Jehová sok kʼaxtoxan chopol-a* te bitʼil te machʼatik nailajem yuʼune.
26 Jaʼnix jich la spas-euk te bintik la spas te Jeroboán snichʼan Nebat sok la spas-euk te muliletik la spas te Jeroboán te la yakʼ sta smul yuʼun te lum Israel te kʼalal la yichʼik ta mukʼ lokʼombaetik te ma xtuunik te jich la sjachbeyik yilinba te Jehová te Dios yuʼun Israel.
27 Te bintik la spas ta skuxlejal te Omrí, spisil te bintikxan la spas sok te bintik mukʼ skʼoplal juʼ yuʼun spasel, tsʼibaybil jilel ta libro te ya scholbey skʼoplal te skuxlejal te ajwaliletik ta Israel.
28 Jich te Omrí way sbakʼetal sok te antiguo smeʼ stat sok la smukik ta Samaria. Tey-abi, jaʼ och jilel ta ajwalil te Acab, te snichʼane.
29 Te Acab snichʼan Omrí och ta ajwalil ta Israel te kʼalal ayix 38 jaʼbil ta ajwalil-a te Asá ta Judá. Te Acab snichʼan Omrí wentainwan 22 jaʼbil ta Israel kʼalalto ta Samaria.
30 Te Acab snichʼan Omrí jaʼ kʼaxtoxan chopol* ilot yuʼun-a te Jehová te bitʼil te machʼatik nailajem yuʼune.
31 Ma jaʼuknax la spas te muliletik te la spas te Jeroboán snichʼan Nebat, jaʼnix jich nujpun sok te Jezabel te yantsil nichʼan Etbaal, te ajwalil yuʼun te sidonioetik, sok jajch yichʼ ta mukʼ te Baal sok la snijan sba ta stojol.
32 Jaʼnix jich la spasbey jun skajtajib chikʼbil majtanil te Baal tey ta templo yuʼun te Baal te la spasbey ta Samaria.
33 Te Acab jaʼnix jich la spas chʼul teʼetik yuʼun Aserá.* Bayalxan bintik la spas yuʼun la sjachbey yilinba te Jehová te Dios yuʼun Israel, kʼaxemtoxan-a te bitʼil la spas spisil te ajwaliletik ta Israel te nailajemik yuʼune.
34 Ta skʼajkʼalel te Acab, te Hiel te betelita-winik la schaʼpas te Jericó. Te kʼalal la yakʼbey yiptajib te mukʼul lume, laj te sba snichʼan te Abiram sbiil; te bin-ora la yotsesbey te puertaetik yuʼun te mukʼul lume, laj te slajibal snichʼan te Segub sbiil. Jich kʼot ta pasel te bin la yal te Jehová ta swenta te Josué snichʼan Nun.
Notaetik
^ Ta yantik variante «ma lek».
^ Jaʼ skʼoplal te snichʼan Jeroboán.
^ Ta hebreo: «ni jtuluk te ya schuxtay pajkʼ». Jaʼ jich ya yichʼ alel ta hebreo kʼop te kʼalal ya schopolkʼoptayik te winiketike.
^ O «te machʼa ya sutbey spakol te chʼichʼ».
^ Jaʼ 68.4 kilo. Ilawil ta apéndice, B14.
^ Te ya skʼan ya yal «stsʼumbal Sémer».
^ Ta yantik variante «ma lek stalel-a».
^ Ta yantik variante «ma lek stalel».
