1 Reyes 19:1-21
19 Jich yuʼun, te Acab la scholbey yaʼiy te Jezabel spisil te bin la spas te Elías sok te bitʼil la smil ta espada spisil te j-alwanejetike.
2 Jaʼ yuʼun, te Jezabel jich la stikun ta albeyel te Elías: «¡Akʼa yakʼbon tulan castigo te diosetik teme maba la jmilat ta jich ora pajel ini jich te bitʼil la amil te j-alwanejetike!».
3 Te Elías kʼaxto xiw te jich lokʼ bael ta anel swenta maba ya xmilot-a. Kʼot ta Beer-Seba te ay ta skʼinal Judá, tey la yijkitay-a te j-abat yuʼune.
4 Kʼub ochel ta jochol takin kʼinal, been jun kʼajkʼal jaʼto te kʼalal kʼot ta jpejt* retama-teʼ, la snajkan sba ta yeʼtal. Jich la yal ta skʼanel slajel: «¡Tikʼix-a! Lajinbonix te jkuxlejal, Jehová, melel ma joʼukon lekonxan-a te bitʼil te antiguo jmeʼ jtate».
5 Jich yuʼun la smejtsʼan sba sok och swayel ta yeʼtal te retama-teʼ. Pero, ta repentenax kʼot ta tijel yuʼun jtul chʼul-abat sok jich albot: «Jajchan, weʼan jtebuk».
6 Te kʼalal wijkʼ te site, la yil te ay jsejp pan ta sjol, kajal ta sba tonetik te tsajubenik ta kʼajkʼ sok jun jarra jaʼ. Weʼ uchʼaj sok chaʼway.
7 Ta patil chaʼsujt tal te chʼul-abat yuʼun te Jehová, la stij te Elías sok jich la yalbey: «Jajchan, weʼan, melel namalto* te banti ya xbaate».
8 Jich jajch te Elías sok weʼ uchʼaj. Te weʼelil-abi akʼbot yip yuʼun been 40 kʼajkʼal sok 40 ajkʼabal jaʼto te kʼalal kʼot ta Horeb, ta wits yuʼun te smelelil Diose.*
9 Tey och ta yutil chʼen sok tey kʼax yuʼun-a te ajkʼabale. Ta repentenax jich la yaʼiybey skʼop te Jehová: «Elías, ¿bin ya apas liʼi?».
10 Jich la yal te Elías: «Kakʼoj ta ilel te jaʼatnax kichʼojat ta mukʼ Jehová te Dios yuʼun te jwolwanej yuʼun te soldadoetik.* Te lum Israel la schʼay ta yoʼtan te chapbilkʼop awuʼun, la sjin te skajtajib chikʼbil majtaniletik awuʼun sok la smil ta espada te j-alwanejetik awuʼun, joʼonxanix jtukel te jilemone. Pero ya skʼan ya smilonik ta ora ini».
11 Pero, jich albot yuʼun te Diose: «Lokʼan tal sok tejkʼana aba ta wits ta stojol te Jehová». Ta yorail-abi, tey yak ta kʼaxel-a te Jehová. Tal tulan ikʼ, la sjat-tiklan te witsetik sok la swuytiklan te mukʼul tonetik ta stojol te Jehová, pero maba tey ay-a te Jehová ta banti te ikʼe. Te kʼalal kʼaxix-a te ikʼe, tal tulan nijkel, pero maba tey ay-a te Jehová ta banti te tulan nijkele.
12 Te kʼalal kʼaxix-a te tulan nijkele, tal kʼajkʼ, pero maba tey ay-a te Jehová ta banti te kʼajkʼe. Te kʼalal kʼaxix-a te kʼajkʼe, ay machʼa kʼun kʼopoj sok te xlametnax te skʼope.
13 Jaʼnax te kʼalal la yaʼiy te Elías te kʼope, la smuk sit sok te skʼuʼ yuʼun j-alwanej, lokʼ tal sok la stejkʼan sba ta stiʼil te chʼene. Tey-abi, te machʼa kʼopoj jich la yal: «Elías, ¿bin ya apas liʼi?».
14 Jich la yal te Elías: «Kakʼoj ta ilel te jaʼatnax kichʼojat ta mukʼ Jehová te Dios yuʼun te jwolwanej yuʼun te soldadoetik.* Te lum Israel la schʼay ta yoʼtan te chapbilkʼop awuʼun, la sjin te skajtajib chikʼbil majtaniletik awuʼun sok la smil ta espada te j-alwanejetik awuʼun, joʼonxanix jtukel te jilemone. Pero ya skʼan ya smilonik ta ora ini».
15 Te Jehová jich la yalbey te Elías: «Baan, sujtan bael ta jochol takin kʼinal yuʼun Damasco. Te kʼalal ya xkʼoate, malbeya aceite ta sjol te Hazael swenta ya x-och ta ajwalil ta Siria.
16 Malbeya aceite ta sjol te Jehú, smam* Nimsí, swenta ya x-och ta ajwalil ta Israel. Jaʼnix jich malbeya aceite ta sjol te Eliseo snichʼan Safat te talem ta Abel-Meholá yuʼun ya sjelolinat ta j-alwanej.
17 Te machʼa ya xkol jilel ta yespada te Hazael jaʼme ya smil te Jehú; te machʼa ya xkol jilel ta yespada te Jehú jaʼme ya smil te Eliseo.
18 Ayto 7 mil ta tul ta Israel te maba skejanoj sbaik ta stojol te Baal sok te maba yujtsʼuyojik».*
19 Lokʼ bael te Elías te banti ay-ae, kʼot sta te Eliseo snich’an Safat te yak ta sjokʼel lum. Ay 12 ta chajp toroetik te nailajemik ta aʼtel yuʼun, jaʼ yak ta aʼtel sok te slajibal chaʼkojt toroetike. Te Elías bajt ta stojol te Eliseo, la yakʼbey ta sba te skʼuʼ yuʼun j-alwanej.
20 Jich te Eliseo la yijkitay jilel te toroetik, bajt ta animal ta spat te Elías sok jich la yalbey: «Awokoluk, akʼawon bael yuʼun ya xbajt kujtsʼuy* jilel te jtat sok te jnan,* tey-abi yame jtʼunat bael». Jich albot yuʼun te Elías: «Jichuk, baan. ¿Yuʼunbal yak jkombelat?».
21 Jich sujt bael, la yikʼ bael chaʼkojt toroetik sok la smiltiklan. Jaʼ la stuuntes te steʼel sjokʼojibal lum sok te yugo-teʼ* yuʼun la spay-a te tiʼbale. Tey-abi la yakʼbey sweʼ te ants winiketike. Ta patil bajt stʼun te Elías sok jajch ta abatinel ta stojol.
Notaetik
^ Ta yantik variante «jtejkʼ».
^ Ta yantik variante «jakalto», «kʼubulto».
^ Jaʼ skʼoplal te chʼul-abatetik ta chʼulchan.
^ Jaʼ skʼoplal te chʼul-abatetik ta chʼulchan.
^ Ta yantik variante «yil-al kerem».
^ Ta yantik variante «sbujtsʼiojik».
^ Ta yantik variante «jbujtsʼi».
^ Ta yantik variante «jmeʼ», «jmama».
