1 Reyes 21:1-29
21 Te k’alal kʼotix ta pasel spisil-abi, jajch kʼop yuʼun te tsʼusubiltik te jaʼ yuʼun te Nabot te talem ta Jezreel. Te tsʼusubiltik-abi ay ta Jezreel ta nopol* sna te Acab te ajwalil yuʼun Samaria.
2 Te Acab jich la yalbey te Nabot: «Akʼbon te tsʼusubiltik awuʼun yuʼun ya jtsʼun kawal tsʼunub tey-a, melel nopol* ay ta jna. Ya jelbat ta lekil tsʼusubiltik, o teme ya akʼane, ya jtojbat».
3 Pero, te Nabot jich la yalbey te Acab: «Maʼyuk bin-ora ya kakʼbat te kʼinal te la yakʼbon jilel te antiguo jmeʼ jtat, melel te Jehová maba lek ya yil».
4 Tey-abi bajt ta sna, yak ta mel-oʼtan sok ilinem yuʼun te bin albot yuʼun te Nabot te talem ta Jezreel ta skaj te jich albot «Maba ya kakʼbat te kʼinal te la yakʼbon jilel te antiguo jmeʼ jtat». Ta patil bajt smejtsʼan sba ta swayib, la sut bael sit ta pajkʼ sok maba la skʼan weʼ.
5 Jich yuʼun bajt ta ilel yuʼun te yinam jaʼ te Jezabel sok jich albot yuʼun: «¿Bin yuʼun te kʼaxto ayat ta mel-oʼtan te maba ya akʼan ya xweʼatix yuʼune?».
6 Jich la sjakʼ te Acab: «Melel jich la kalbey te Nabot te talem ta Jezreel ‹Chonbon te tsʼusubiltik awuʼun, o teme ya akʼane, ya jelbat ta yan tsʼusubiltik›. Pero, jich la yalbon ‹Maba ya kakʼbat te tsʼusubiltik kuʼun›».
7 Tey-abi, jich albot yuʼun te Jezabel, te yiname: «¿Yuʼunbal ma jaʼukat te ajwalil yuʼun Israel? Jich yuʼun jajchan, weʼan jtebuk sok ayukme smukʼul awoʼtan. Joʼonme ya kakʼbat te tsʼusubiltik yuʼun te Nabot te talem ta Jezreel».
8 Jich te Jezabel la stsʼibay cartaetik ta swenta sbiil te Acab, jaʼnix la stuuntesbey te sello yuʼun te Acab sok la stikunbey ta stojol te jwolwanejetik sok te machʼatik mukʼ skʼoplalik ta mukʼul lum te banti ay ta nainel te Nabot.
9 Jich la yal bael ta cartaetik: «Alaik ta mantal te akʼa skom sweʼelik sok te akʼa najkajuk te Nabot ta stojol te lume.
10 Najkanaik chaʼtul winiketik te ma xtuunik ta stojol te Nabot te jich ya yalik ta slebeyel smul ‹¡La abolkʼoptay te Dios sok te ajwalil!›. Ta patil lokʼesaik bael ta fuera yuʼun te mukʼul lum sok teyme xa amilik ta chʼojel ta ton-a».
11 Te winiketik yuʼun te mukʼul lum, te jwolwanejetik sok te machʼatik mukʼ skʼoplalik te nainemik tey-ae jich la spasik te bitʼil albotik tal ta carta yuʼun te Jezabel.
12 La yalik ta mantal te akʼa skom sweʼelik sok la snajkanik te Nabot ta stojol te lume.
13 Tey-abi kʼotik chaʼtul winiketik te ma xtuunik, la snajkan sbaik ta stojol te Nabot sok jajch slebeyik smul ta stojol te lume. Jich yakik ta yalel: «¡Te Nabot la sbolkʼoptay te Dios sok te ajwalil!». Ta patil la slokʼesik bael ta fuera yuʼun te mukʼul lum sok tey la smilik ta chʼojel ta ton-a.
14 Ta patil, jich la stikunbeyik ta albeyel te Jezabel: «La yichʼix milel ta chʼojel ta ton te Nabot».
15 Jaʼnax te kʼalal la yaʼiy stojol te Jezabel te la yichʼix chʼojel ta ton te Nabot, jich la yalbey te Acab: «Jajchan. Baan, ichʼa te tsʼusubiltik yuʼun te Nabot te talem ta Jezreel te ma la skʼan la schonbate. Melel te Nabot maba kuxulix. Lajemix».
16 Te kʼalal la yaʼiy stojol te Acab te lajix te Nabot, oranax ko bael yuʼun ya yichʼ jilel te tsʼusubiltik yuʼun te Nabot te talem ta Jezreel.
17 Pero, te Elías te talem ta Tisbe jich la yichʼ albeyel yuʼun te Jehová:
18 «Baan, koan bael yuʼun ya ata aba sok te Acab, te ajwalil yuʼun Israel, te ay ta Samaria.
19 Jichme xa awalbey te Acab: ‹Jich ya yal te Jehová: «¿Bin yuʼun te la amil jtul winik sok te la apojbey te skʼinale?»›. Ta patil, jichme xa awalbey: ‹Jich ya yal te Jehová: «Ta lugar te banti la yichʼ lekʼbeyel schʼichʼel yuʼun tsʼiʼetik te Nabot, teynixme ya slekʼbat achʼichʼel-euk-a te tsʼiʼetike»›».
20 Te Acab jich la yalbey te Elías: «¡La ataon, jkontra!». Te Elías jich la yal: «Laj, la jtaat. Te Dios jich la yal: ‹Ta skaj te la awakʼ ta awoʼtan spasel te bintik ma lek ya yil te Jehová,
21 yame jtikun wokolil ta atojol, yame jlajinat ta jkʼaxel sok yame jlajin ta jkʼaxel ta lum Israel spisil te winiketik* te talem ta atsʼumbal, teyme ochem skʼoplal-a te machʼatik maba mukʼ skʼoplalik.
22 Yame jlajin te atsʼumbal jich te bitʼil la jlajinbey stsʼumbal te Jeroboán snichʼan Nebat sok te stsʼumbal Baasá snichʼan Ahíya, melel la awakʼ ilinukon sok la awakʼ sta smul te israeletik›.
23 Te Jehová jaʼnix jich la yal ta stojol te Jezabel: ‹Yame yichʼ tiʼbeyel yuʼun tsʼiʼetik te sbakʼetal te Jezabel ta kʼinal te ay ta Jezreel.
24 Te machʼatik ay yuʼun te Acab te ya xlajik ta mukʼul lum yame yichʼik tiʼel yuʼun te tsʼiʼetike. Te machʼatik ya xlajik ta akiltik yame yichʼik tiʼel yuʼun te jaʼmal mutetik te ya xwilik ta chʼulchan.
25 Melel maʼyuk machʼa yan jich te bitʼil Acab te la yakʼ ta yoʼtan spasel te bintik ma lek ta sit te Jehová te jaʼ tijbot yoʼtan yuʼun te Jezabel, te yiname.
26 La spas te bin kʼax ilobtik sba te kʼalal la yichʼ ta mukʼ te lokʼombaetik te ilobtik sba, jich te bitʼil la spasik spisil te amorreoetik, jaʼ te machʼatik la stentiklan lokʼel te Jehová ta stojol te israeletike›».
27 Jaʼnax te kʼalal la yaʼiy stojol te Acab te bin la yichʼ albeyele, la schʼiʼ* te skʼuʼ sok la slap chʼixal pakʼ.* La skom sweʼel, la slap ta wayel te chʼixal pakʼ sok pejkʼajem yip yoʼtan.
28 Tey-abi, te Elías te talem ta Tisbe jich albot yuʼun te Jehová:
29 «¿Labal awilix te la spejkʼan sba ta jtojol te Acab? Ta swenta te la spejkʼan sba ta jtojole, maba ya kakʼ tal te wokolil te kʼalal kuxulto-ae. Jaʼtome ya kakʼbey swokol te stsʼumbal ta skʼajkʼalel te snichʼane».
Notaetik
^ Ta yantik variante «tijil».
^ Ta yantik variante «tijil».
^ Ta hebreo: «te machʼatik ya schuxtayik pajkʼ». Jaʼ jich ya yichʼ alel ta hebreo kʼop te kʼalal ya schopolkʼoptayik te winiketike.
^ Ta yantik variante «xetʼ».
