1 Reyes 3:1-28
3 Te Salomón la snial mamalin* te faraón, te ajwalil yuʼun Egipto. Nujpun sok te yantsil nichʼan te faraón sok la yikʼ bael ta nainel ta Mukʼul lum yuʼun David te kʼalal mato juʼem ta pasel-a te sna sok te sna te Jehová soknix te stsʼajkʼul ta sjoyobal te Jerusalén.
2 Ta yorail-abi, te lum yakikto ta yakʼel milbil majtaniletik ta toyol awilaletik,* melel mato ayuk pasbil jun na ta swenta sbiil te Jehová.
3 Te Salomón la yakʼ ta ilel te kʼux ta yoʼtan te Jehová, melel la schʼuun te bin albot ta mantal yuʼun te David te state. Jaʼnax yuʼun te la yakʼ milbil majtaniletik ta toyol awilaletik* sok la yakʼ chikʼbil majtaniletik te xtomet schʼailel yuʼune.
4 Te ajwalil Salomón bajt ta Gabaón ta yakʼel milbil majtaniletik tey-a, melel jaʼ kʼax mukʼ skʼoplal te toyol awilal-abi.* Te Salomón la yakʼ jmil ta kojt chambalametik ta chikʼbil majtanil tey ta skajtajib chikʼbil majtanil.
5 Te kʼalal ay ta Gabaón-a te Salomón, la yakʼ sba ta ilel te Jehová ta swayich ta ajkʼabal sok jich albot yuʼun: «Kʼanbon te bin ya akʼane».
6 Jich la yal te Salomón: «Te jaʼate kʼax bayal la awakʼbey yil te kʼuxul oʼtanil te ma x-ijkitaywan te awabat David te jtate, melel jun yoʼtan la stʼun te beetik awuʼun, toj te bin la spas sok toj yoʼtan la yakʼ sba ta atojol. Jaʼto ta ora ini awakʼojbey yil te kuxul oʼtanil te ma x-ijkitaywan ta swenta te la awakʼbey jtul snichʼan te ya xnajkaj ta smukʼul naktajib.
7 Jehová Dios kuʼun, la awotsesix ta ajwalil te j-abat awuʼun ini, jaʼ la jelolin jilel te David te jtat, manchukme keremonto sok mato ayuk spʼijil koʼtan.*
8 Te j-abat awuʼun ini ay ta yolil te lum awuʼun te atsaoje, jaʼ jun lum te kʼax mukʼ te ma xjuʼ ta ajtayel te yajwalule.
9 Jich yuʼun koltaya te j-abat awuʼun ini yuʼun ya schʼuunbat amantal, yuʼun ya schajpanbat te lum awuʼun, yuʼun ya snaʼ stsajtayel te bin lek o ma lekuk, melel ¿machʼa ya xjuʼ ya schajpan te lum awuʼun ini te kʼax bayal yajtalule?».
10 Lek la yaʼiy te Jehová te bin kʼanbot yuʼun te Salomón.
11 Jich albot yuʼun te Diose: «Ta swenta te jaʼ la akʼanbon ini sok te ma jaʼuk la akʼan te najt akuxlejal ni jaʼuk akʼulejal ni jaʼuk te slajel te akontratak, te jaʼ la akʼanbon spʼijil awoʼtan ta yaʼiyel stojol te kʼalal ay bin ya skʼan chajpanele,
12 yame kakʼbat te bin la akʼanbone. Yame kakʼbat spʼijil awoʼtan sok snaʼel stsajtayel spisil. Te apʼijil ya kakʼbate maʼyuk machʼa jich ay spʼijil-a sok maʼyuk jich ya xchiknaj ta patil.
13 Jaʼnix jich yame kakʼbat te bin ma la akʼanbone: akʼulejal sok awutsilal. Te jayeb kʼajkʼal kuxulate, mame x-ayin yan ajwalil te ya spajate.
14 Teme ya atʼun te beetik kuʼun sok ya achʼuun te leyetik kuʼun soknix te mantaliletik kuʼun —jich bitʼil la spas te David te atate—, jaʼnixme jich ya kakʼbat najt akuxlejal».
15 Te kʼalal wijkʼ sit te Salomón, la snaʼ stojol te yak ta wayiche. Jich yuʼun bajt ta Jerusalén, la stejkʼan sba ta stojol te skaxaul chapbilkʼop yuʼun te Jehová sok la yakʼ chikʼbil majtaniletik soknix majtaniletik ta swenta lamalkʼinal. Jaʼnix jich la spas lekil weʼelil ta stojol spisil te j-abatetik yuʼune.
16 Ta patil ay chaʼtul j-antsinel* antsetik te bajt skʼoponik te ajwalil.
17 Te jtule jich la yal: «Pasa perdón, kajwal. Te joʼon sok te ants ini nainemotik ta jun-nax na, tey ay-a te kʼalal ayin* te kale.
18 Ta yoxebal kʼajkʼal ayin* yal-euk te ants ini. Jun-nax ayotik ta nainel. Maʼyuk yan machʼa sjokinojotik tey ta na.
19 Pero, ta ajkʼabal laj te yal te ants ini, melel la sten ta wayel.
20 Tey-abi jajch ta olil ajkʼabal, la yikʼbon bael te kal te ay ta jtsʼeel te kʼalal wayalon-a, jaʼ la yakʼbon jpet jilel te yal te lajemixe sok jaʼ la spet ta wayel te kuʼune.
21 Te kʼalal jajchon ta sab yuʼun ya kakʼbey schuʼ te kale, la kil te lajemixe. Pero, te k’alal la kil ta leke, la jna’ te ma jaʼuke».
22 Te yan antse jich la yal: «¡Maʼuk, jaʼ kal te kuxule, jaʼ awal te lajeme!». Te ants te kʼopoj ta nailal jich la yal: «Maʼuk, jaʼ awal te lajeme, joʼon kuʼun te kuxule». Jich yak yalbel sbaik ta stojol te ajwalile.
23 Jaʼ yuʼun, jich la yal te ajwalil: «Te ants ini jich ya yal ‹¡Jaʼ kal te kuxule, jaʼ awal te lajeme!›, te yan antse jich ya yal ‹¡Maʼuk, jaʼ awal te lajeme, joʼon kuʼun te kuxule!›».
24 Jich la yal te ajwalil: «Ichʼbonik tal jun espada». Jich la yichʼbeyik tal jun espada.
25 Te ajwalil jich la yal ta mantal: «Jataik ta olil te alal kerem te kuxule, jujunjat akʼtiklanbeyaik te antsetik ini».
26 Te snan* te alal kerem te kuxule jich la skʼanbey wokol ta oranax te ajwalil ta skaj te kʼax kʼux ta yoʼtan te yale: «¡Awokoluk, kajwal! ¡Awokoluk, ma xa amilik te alal kereme! ¡Jaʼ xa awakʼbeyik te ants ini!». Yan stukel te yan antse jich la yal: «¡Ni jaʼukat ya awikʼ ni joʼukon ya kikʼ! ¡Jataik ta olil!».
27 Te k’alal jich la yaʼiy stojol te ajwalil, jich la yal: «¡Ma xa amilik te alal kereme! Jaʼ xa awakʼbeyik te ants te nail kʼopoje, melel jaʼ snan* te alale».
28 Spisil te lum Israel la yaʼiy stojol te bitʼil la schajpan te kʼop te ajwalil sok och xiwel ta yoʼtanik ta stojol te ajwalil, melel la yilik te akʼbil spʼijil yoʼtan yuʼun te Dios ta spasel te bin stojile.
Notaetik
^ Ta yantik variante «smamal nialin».
^ Ta hebreo: «chʼin keremonto mato jnaʼ bitʼil ya x-ochon sok bitʼil ya xlokʼon bael».
^ Ta yantik variante «jmulawil».
^ Ta yantik variante «pʼejkaj», «tojk».
^ Ta yantik variante «pʼejkaj», «tojk».
^ Ta yantik variante «smeʼ», «smama».
^ Ta yantik variante «smeʼ», «smama».
