1 Reyes 4:1-34
4 Te ajwalil Salomón la swentain spisil te lum Israel.
2 Jaʼik ini te machʼatik yichʼoj mukʼ yaʼtelik yuʼune: te Azarías snichʼan Sadoc jaʼ sacerdote-a;
3 te Elihóref sok te Ahíya, snichʼnab Sisá, jaʼ secretarioetik-a; te Jehosafat snichʼan Ahilud jaʼ te machʼa ya stsʼibay-a te bin ya xkʼot ta pasel;
4 te Benaya snichʼan Jehoiadá jaʼ swentainoj-a te soldadoetik; te Sadoc sok te Abiatar jaʼ sacerdoteetik-a;
5 te Azarías snichʼan Natán jaʼ swentainoj-a te machʼatik yichʼoj mukʼ yaʼtelik; te Zabud snichʼan Natán jaʼ sacerdote-a sok yamigo-a te ajwalil;
6 te Ahisar jaʼ swentainoj-a te sna te ajwalil, te Adoniram snichʼan Abdá jaʼ swentainoj-a te machʼatik ikʼbilik tal yuʼun ya x-aʼtejik ta stojol te ajwalil.
7 Te Salomón ay 12 ta tul te machʼatik yichʼoj mukʼ yaʼtelik yuʼun ta stojol te lum Israel. Jaʼik te machʼatik ya yakʼbeyik sweʼel te ajwalil sok spisil te machʼatik ay ta snae, ta jujuntul jun u ta jujun jaʼbil jaʼ ay ta swentaik yakʼbeyel sweʼel te ajwalile.
8 Te winiketik-abi jich sbiilik ini: te snichʼan Hur jaʼ swentainoj-a te witstikil yuʼun Efraín;
9 te snich’an Déquer jaʼ swentainoj-a te skʼinal Macaz, te Saalbim, te Bet-Semes sok te Elón-Bet-Hanán;
10 te snich’an Hésed jaʼ swentainoj-a te skʼinal Arubot (jaʼnix swentainoj te skʼinal Socó sok spisil te skʼinal Héfer);
11 te snich’an Abinadab jaʼ swentainoj-a te chʼin witsetik yuʼun Dor (Tafat sbiil te yinam, jaʼ yantsil nichʼan te Salomón);
12 te Baaná snichʼan Ahilud jaʼ swentainoj-a te skʼinal Taanac, te Meguidó sok spisil te skʼinal Bet-Seán te ay ta stsʼeel Zaretán ta yalanil Jezreel, jajch tal ta Bet-Seán jaʼto kʼalal ta Abel-Meholá sok jaʼto kʼalal ta skʼinal Jocmeam;
13 te snich’an Guéber jaʼ swentainoj-a te Ramot-Galaad (jaʼ swentainoj-a te chʼin lumetik yuʼun Jaír snichʼan Manasés te ayik ta Galaad; jaʼnix jich swentainoj-a te skʼinal Argob te ay ta Basán: ay 60 ta pam mukʼul lumetik te joytaybilik ta tsʼajkʼ sok te ay spuertaul te ay skʼatal teʼel te pasbilik ta cobre);
14 te Ahinadab snichʼan Idó jaʼ swentainoj-a te skʼinal Mahanaim;
15 te Ahimáaz jaʼ swentainoj-a te skʼinal Neftalí (jaʼ nujpun sok te Basemat, jaʼ yan yantsil nichʼan te Salomón);
16 te Baaná snich’an Husái jaʼ swentainoj-a te skʼinal Aser sok te Bealot;
17 te Jehosafat snichʼan Parúah jaʼ swentainoj-a te skʼinal Isacar;
18 te Simeí snichʼan Elá jaʼ swentainoj-a te skʼinal Benjamín;
19 te Guéber snichʼan Urí jaʼ swentainoj-a te skʼinal Galaad, jaʼ skʼoplal te skʼinal Sehón, te ajwalil yuʼun te amorreoetik. Jaʼnix jich swentainoj-a te skʼinal Og, te ajwalil yuʼun Basán. Pero ay jtul te machʼa swentainoj yilel spisil te machʼatik yichʼoj mukʼ yaʼtelik ta lumetik ini.
20 Te ants winiketik ta Judá sok ta Israel kʼax bayalik ta tul te jichik yilel te bin-utʼil sjiʼal te stiʼil te mare; weʼ uchʼajik sok tseʼel yoʼtanik-a.
21 Te Salomón la swentain spisil te lumetik te jajch tal ta mukʼul jaʼ Éufrates jaʼto kʼalal ta skʼinal te filisteoetik sok kʼalalto ta stiʼil skʼinal Egipto. Spisil te lumetik ini la stoj spatanik ta stojol te Salomón sok abatinik ta stojol te jayeb kʼajkʼal kuxul ta kʼinale.
22 Te jayeb weʼelil ya yichʼ akʼbeyel te Salomón ta jujun kʼajkʼal jaʼ 30 coro* lekil harina sok 60 coro* harina,
23 lajunkojt jujpʼen wakaxetik, 20 ta kojt wakaxetik te chʼiemik ta akiltik sok 100 ta kojt tuminchijetik, jaʼnix jich chaʼoxkojt ciervo-chijetik, gacela-chijetik, corzo-chijetik sok cuclillo-mutetik te jujpʼenike.
24 Te Salomón la swentain spisil te bintik ay ta jejch mukʼul jaʼ Éufrates, te jajch tal ta Tifsá jaʼto kʼalal ta Gaza sok tey ochem skʼoplal-euk-a spisil te ajwaliletik te ayik ta jejch mukʼul jaʼ-abi. Sok ayin lamalkʼinal yuʼun ta spisil te kʼinal te ay ta sjoyobale.
25 Te jayeb tiempo wentainwan te Salomón, te ants winiketik ta Judá sok ta Israel, te jajch tal ta Dan jaʼto kʼalal ta Beer-Seba, jun yoʼtan kuxinik, ta jujuntul jun yoʼtan ayik ta yeʼtal te tsʼusubiltik yuʼunik sok ta yeʼtal te higuera yuʼunik.
26 Te sna te schambalam te Salomón ay 4 mil* ta tsal te banti ya yakʼ te caballoetik te ya snitik te carretaetik sok ay 12 mil ta kojt caballoetik* yuʼun.
27 Te machʼatik yichʼoj mukʼ yaʼtelik jaʼ ya yichʼbeyik bael sweʼel te ajwalil Salomón sok te machʼatik ya xweʼik ta smesa. Ta jujuntul ay ta swentaik yichʼel bael te bin ya xtuun ta jujun u sok te maʼyuk bin ya spas falta.
28 Jaʼnix jich ya yichʼik bael cebada sok ak jaʼ chikan te jayeb ya xtuun yuʼunik te caballoetik sok te caballoetik te ya snitik te carretaetik. Ta jujuntul ya yichʼik bael jaʼ chikan te jayeb ay ta swentaik yakʼele.
29 Te Diose la yakʼbey bayal spʼijil yoʼtan te Salomón sok akʼbot snaʼ stsajtayel spisil, jich kʼot te bin-utʼil sjiʼal te stiʼil te mare.
30 Te spʼijil yoʼtan te Salomón kʼaxemxan-a te bitʼil te spʼijil yoʼtanik te egipcioetik sok te machʼatik ayik ta slokʼib kʼajkʼal.
31 Kʼax bayal spʼijil yoʼtan te maʼyuk machʼa pajot yuʼune, kʼax bayal spʼijil yoʼtan te ma pajot yuʼun te Etán te ezrahíta-winik sok te Hemán, te Calcol sok te Dardá, snichʼnab Mahol; sok pujk bael skʼoplal ta spisil te lumetik te ay ta sjoyobale.
32 La stsʼibay 3 mil pʼijil kʼopetik sok la spas 1,005 kʼayojiletik.
33 La yalbey skʼoplal teʼetik, pero ma jaʼuknax te mukʼul teʼetik jich bitʼil te cedro-teʼ te ya xchʼi ta Líbano, jaʼnix jich la yalbey skʼoplal chʼin teʼetik jich bitʼil te hisopo-teʼ te ya xchʼi ta pajkʼ. Jaʼnix jich la yalbey skʼoplal chambalametik,* jaʼmal mutetik,* chambalametik te staslajan ya xbeenik ta lum sok chayetik.
34 Tal ants winiketik ta spisil lumetik ta yaʼiybeyel spʼijil yoʼtan te Salomón soknix te ajwaliletik ta spisil te lumetik te yaʼiyojbeyik skʼoplal te spʼijil yoʼtane.
Notaetik
^ Jaʼ 6,600 litro. Ilawil ta apéndice, B14.
^ Ja’ 13,200 litro.
^ Te yajtalul te ya yalbey skʼoplal liʼi ay jich ya xchiknaj ta antiguo junetik sok ta yan versículo te pajal soke. Jaʼnix jich ay yantik antiguo junetik ya yal te jaʼ 40 mil.
^ O «ta tul te machʼatik ya xkajajik ta caballoetik».
^ O «chambalametik te chaneb yok».
^ O «jaʼmal mutetik te ya xwilik».
