1 Reyes 5:1-18
5 Te k’alal la yaʼiy stojol te Hiram, te ajwalil yuʼun Tiro, te la yichʼix otsesel ta ajwalil te Salomón sok te jaʼ la sjelolin jilel te state, la stikun j-abatetik yuʼun ta stojol te Salomón; melel te Hiram spisil-ora lek la yil sba sok* te David.
2 Jich yuʼun, te Salomón jich la stikun ta albeyel te Hiram:
3 «Anaʼoj ta lek te kʼan spas te David te jtat jun na ta swenta sbiil te Jehová te Dios yuʼun, pero ta skaj te la yakʼbey guerraetik te skontratak maba akʼbot spas, jaʼto te kʼalal akʼbot yuʼun Jehová ta yeʼtal yok te skontratake.
4 Pero, ta ora ini te Jehová te Dios kuʼune yakʼojbon lamalkʼinal* ta bayuk. Maʼyuk jkontra sok maʼyuk bin chopol yak ta kʼoel ta pasel.
5 Jaʼ yuʼun jnopoj te ya jkʼan ya jpas jun na ta swenta sbiil te Jehová te Dios kuʼun jich te bitʼil albot ta jamal yuʼun Jehová te David te jtate: ‹Te anichʼan te ya kakʼ xnajkaj ta amukʼul naktajib, te ya sjelolinat jilele, jaʼme te machʼa ya spasbon jun na ta swenta te jbiile›.
6 Jich yuʼun albeya mantal te j-abatetik awuʼun te yakuk stsʼetbonik cedro-teʼetik ta Líbano. Te j-abatetik kuʼun yame x-aʼtejik sok te j-abatetik awuʼun sok yame jtojbat te j-abatetik awuʼun jaʼ chikan te jayeb ya awale. Melel anaʼoj te maʼyuk machʼa ay ta koliltik te ya snaʼ stsʼetel ta lek teʼetik jich bitʼil te sidonioetik».
7 Te kʼalal la yaʼiy stojol te Hiram te bin la yal te Salomón, bayal akʼbot stseʼelil yoʼtan yuʼun sok jich la yal: «¡Akʼa yichʼ albeyel yutsil skʼoplal te Jehová, melel la yakʼbey te David jtul snichʼan te bayal spʼijil yoʼtan yuʼun ya swentain te mukʼul lum ini!».
8 Jaʼ yuʼun, te Hiram jich la stikun ta albeyel te Salomón: «La kaʼiyix stojol te bin la awalbon tale. Yame kakʼbat spisil te bin ya akʼan, yame kakʼbat te cedro-teʼetik sok te enebro-teʼetik.
9 Te j-abatetik kuʼun yame skojtesik tal te teʼetik ta Líbano kʼalalto ta mar sok yame kal ta mantal te akʼa slimik ta chukel te balal teʼetik swenta jich xkajet ya xbajt ta mar jaʼ chikan te banti ya awalbon te ya akʼan ya xkʼote. Teyme ya yichʼ tilel-a* yuʼun jich ya xjuʼ ya awichʼ bael. Te bin ya jkʼanbat-euke jaʼ te yakuk awakʼbon weʼelil jaʼ chikan te jayeb ya jkʼanbat ta swenta spisil te machʼatik ay kuʼun ta jnae».
10 Jich te Hiram la yakʼbey te Salomón spisil te cedro-teʼ sok te enebro-teʼ te la skʼane.
11 Jich yuʼun, te Salomón la stikunbey te Hiram 20 mil coro* trigo ta swenta spisil te machʼatik ay yuʼun ta sna sok la stikunbey 20 coro* lekil aceite yuʼun oliva,* jich la spas ta jujun jaʼbil.
12 Te Jehová la yakʼbey spʼijil yoʼtan te Salomón, jich te bitʼil albot ta jamal yuʼune. Te Hiram sok te Salomón la schap skʼopik sok ayin lamalkʼinal yuʼunik ta schebalik.
13 Te ajwalil Salomón la stsob tal 30 mil ta tul winiketik ta spamal te lum Israel yuʼun ya x-aʼtejik ta stojol.
14 Ta jujun u ya stikun bael ta Líbano 10 mil ta tul winiketik ta jujuntsojb. Jun u ya xbajtik ta Líbano sok cheb u ya xjil ta snaik. Te Adoniram jaʼ swentainoj-a te machʼatik ikʼbilik tal yuʼun ya x-aʼtejik ta stojol te ajwalil.
15 Te Salomón ay 70 mil ta tul j-aʼteletik* yuʼun sok 80 mil ta tul te ya stopʼik tonetik ta witstikil sok te ya sjuxike,
16 jaʼnix jich ay 3,300 ta tul te machʼatik yakʼojbey yichʼ mukʼ yaʼtelik yuʼun ya swentainik yilel te j-aʼteletike.
17 Te ajwalil la yal ta mantal te akʼa slokʼesik tal mukʼul tonetik sok tonetik te toyol stojol swenta ya yichʼ pasel-a te yiptajib te na sok te juxbil tonetike.
18 Jich yuʼun, te j-aʼteletik yuʼun te Salomón sok te j-aʼteletik yuʼun te Hiram soknix te machʼatik talemik ta Guebal la stopʼik te tonetik sok la schajpanik te teʼetik sok te tonetik yuʼun ya yichʼ pasel-a te nae.
Notaetik
^ O «kʼux la yaʼiy ta yoʼtan».
^ Ta hebreo: «jkux koʼtan».
^ Ta yantik variante «tilpʼunel-a», «polesel-a».
^ Jaʼ 4,400,000 litro. Ilawil ta apéndice, B14.
^ Jaʼ 4,400 litro.
^ O «tenbil aceitunaetik».
^ O «jkuch-ijkatsiletik».
