1 Reyes 6:1-38
6 Te kʼalal ayix 480 jaʼbil slokʼelik tal-a te israeletik ta skʼinal Egipto, ta schanebal jaʼbil yochel ta ajwalil-a te Salomón ta Israel, ta yuilal ziv* (jaʼ skʼoplal te schebal u), te Salomón jajch spas te sna te Jehová.*
2 Te jayeb smukʼul te templo yuʼun te Jehová te la spas te Salomón jaʼ 60 xujkʼubil* snajtil, 20 xujkʼubil* sjamalul sok 30 xujkʼubil* stoyolil.
3 Te slejchelul na te ay ta yochibal te Chʼul Awilal* pajal sjamalul sok te templo: 20 xujkʼubil* sjamalul. Te slejchelul te na jaʼ lajuneb xujkʼubil* yutil teme ya yichʼ pʼisel tal kʼalalto ta yochibal te templo.
4 La spastiklanbey sventanaul te templo te mukʼ ya xjajch tal ta yutil sok te kʼunkʼun ya xchʼinub bael.
5 Jaʼnix jich la spas jun na ta sjoyobal te spajkʼul te templo te la sjoytay te Chʼul Awilal* sok te Mero chʼul awilal.* Jaʼnix jich la spas chʼin cuartoetik tey-a.
6 Te sbabial cuarto te ay ta alane jaʼ joʼeb xujkʼubil* sjamalul, te xchaʼkajal wakeb xujkʼubil* sjamalul, te yoxkajal jukeb xujkʼubil* sjamalul, melel kajalkaj la yichʼ pasel moel te spajkʼul te templo yuʼun jich maba la yakʼbeyik stsʼamteʼal-a.
7 Te nae la yichʼ pasel sok tonetik te nailto la yichʼtiklan juxel, jaʼ yuʼun maʼyuk chiknaj te xkʼojkʼonik ta martillo ni jaʼuk te xtʼojtʼonik ta echej sok yantikxan aʼtejibaletik te pasbilik ta hierro te kʼalal la yichʼ pasel te nae.
8 Te yochibal te sbabial cuartoetik te ay ta alane ay ta stojol sur.* Ay jun escalera te ya xjajch tal ta sbabial cuarto te ya xkʼot ta xchaʼkajal, tey-abi ya xkʼot ta yoxkajal.
9 Te Salomón la spas te templo, juʼ yuʼun spasel sok la yakʼbey tsʼamteʼetik yuʼun cedro soknix la slimbey tablaetik yuʼun cedro.
10 La spas cuartoetik ta sjoyobal te templo. Te jujun cuarto jaʼ joʼeb xujkʼubil* stoyolil sok stsʼakoj sba sok te templo ta tsʼamteʼetik yuʼun cedro.
11 Ta yorail-abi, te Salomón jich la yichʼ albeyel yuʼun te Jehová:
12 «Te k’alal ya apas te nae, teme ya achʼuun te bintik kaloj, teme ya awichʼ ta mukʼ te bintik jchapoj sok teme ya achʼuun spasel spisil te mantaliletik kuʼun, sok teme ya apas ta akuxlejal, yame jkʼotes ta pasel ta atojol te bin la kalbey ta jamal te David te atat
13 sok yame xnainon ta stojol te israeletik sok maʼyuk bin-ora ya kijkitay te Israel te lum kuʼune».
14 Te Salomón la spas te nae jaʼto te kʼalal juʼ yuʼune.
15 La spakʼbey tablaetik yuʼun cedro-teʼ ta yutil te templo. La spakʼbey tablaetik te jajch tal ta spisoal kʼalalto ta stsʼamteʼal, te spisoal te templo la spakʼbey tablaetik yuʼun enebro-teʼ.
16 Ta spat te templo la spas jun cuarto ta cedro-teʼ te jaʼ 20 xujkʼubil* snajtil, jajch tal ta spisoal jaʼto kʼalal ta stsʼamteʼal. Jaʼ jich la spas te cuarto te ay ta mero yutil: jaʼ te Mero chʼul awilal.
17 Te Chʼul Awilal* jaʼ 40 xujkʼubil* snajtil, jaʼ ay ta yochibal te temploe.
18 Te cedro-teʼetik te ay ta yutil te templo ay pasbil slokʼombail chʼumetik sok nichimetik tey-a. Ta spisil-abi, jaʼ cedro-teʼ, maʼyuk chikan ta ilel te tone.
19 Tey-abi la schajpan te Mero chʼul awilal* te ay ta yutil te templo yuʼun tey ya yichʼ akʼel-a te skaxaul chapbilkʼop yuʼun te Jehová.
20 Te Mero chʼul awilal* jaʼ 20 xujkʼubil* snajtil, 20 xujkʼubil sjamalul sok 20 xujkʼubil stoyolil, la spots ta batsʼil oro. Te skajtajib schikʼojibal pom la spots ta cedro-teʼ.
21 Te Salomón la spots ta batsʼil oro te yutil te templo sok la yakʼ cadenaetik te pasbil ta oro ta yochibal te Mero chʼul awilal* te potsbil ta oro.
22 La spots ta oro spisil te temploe. Jaʼnix jich la spots ta oro spisil te skajtajib schikʼojibal pom te nopol* ay ta stojol te Mero chʼul awilal.*
23 Ta Mero chʼul awilal* la spas cheb querubinetik ta pino-teʼ. Te jujun querubín jaʼ lajuneb xujkʼubil* snajtilik.
24 Te jujun xikʼ te querubín jaʼ joʼeb xujkʼubil* snajtil. Jaʼ yuʼun, ta jun sniʼil xikʼ kʼalal ta yan sniʼil xikʼ jaʼ lajuneb xujkʼubil* snajtil.
25 Te yan querubín jaʼnix jich lajuneb xujkʼubil* snajtil ta schebal te xikʼe. Te cheb querubinetik pajal smukʼulik sok pajal te bitʼil yichʼojik pasel.
26 Te jujun querubín jaʼ lajuneb xujkʼubil* snajtilik.
27 Jich la yakʼ te querubinetik ta yutil te Mero chʼul awilal.* Slichʼoj xikʼik te querubinetik, te xikʼ te june staoj te pajkʼe, te xikʼ te yane staoj te yan pajkʼe. Te yan xikʼike staoj sbaik ta yolil te Mero chʼul awilal.
28 Jaʼnix jich la spots ta oro te querubinetik.
29 Ta spisil te spajkʼul te templo, te Mero chʼul awilal* sok te Chʼul Awilal, la spasbey slokʼombail querubinetik, palmeraetik sok nichimetik tey-a.
30 La spots ta oro spisil te spisoal te templo, jaʼ te Mero chʼul awilal* sok te Chʼul Awilal.
31 Te yochibal te Mero chʼul awilal* la spastiklanbey spuertaul ta pino-te’, la spastiklanbey yoyal sok smarcoil, jaʼ jun ta yoʼebal smukʼulik.*
32 Te cheb puertaetik pasbilik ta pino-te’ sok la spasbey slokʼombail querubinetik, palmeraetik sok nichimetik tey-a. La spotstiklan ta oro sok la smaj ochel ta martillo te oro te banti pasbil te slokʼombail te querubinetik sok te palmeraetik.
33 Te yochibal te Chʼul Awilal* jaʼnix jich la spastiklanbey smarcoil ta pino-te’. Jun ta schanebal pajal smukʼulik.*
34 La spas cheb puertaetik ta enebro-te’. Te jujun puerta chaʼwel spuertaul, ay banti nakajtik te yoyal yuʼun jich ya xjuʼ ya sjamtiklan sba-a.
35 La spasbey slokʼombail querubinetik, palmeraetik sok nichimetik tey-a sok la slimbey oro ta sba.
36 La spasbey stsʼajkʼul te yamakʼul te ay ta yutil sok la scholan moel oxchol juxbil tonetik soknix la skajanbey tsʼamteʼetik yuʼun cedro ta sba.
37 Ta schanebal jaʼbil, ta yuilal ziv,* la yichʼ pasbeyel te yiptajib te sna te Jehová;
38 ta jaʼbil 11, ta yuilal bul* (jaʼ skʼoplal te swaxakebal u), juʼ ta pasel te na sok spisil te bintik ay tey-ae jich te bitʼil ay ta sjunil. Te Salomón ta jukeb jaʼbil juʼ yuʼun spasel te nae.
Notaetik
^ Ilawil ta apéndice, B15.
^ Ilawil ta apéndice, B8.
^ Jaʼ 26.7 metro. Ilawil ta apéndice, B14.
^ Jaʼ 8.9 metro.
^ Jaʼ 13.35 metro.
^ Ta hebreo: «templo».
^ Jaʼ 8.9 metro. Ilawil ta apéndice, B14.
^ Jaʼ 4.45 metro.
^ Ta hebreo: «templo».
^ Ta hebreo: «cuarto te ay ta mero yutil».
^ Jaʼ 2.22 metro. Ilawil ta apéndice, B14.
^ Jaʼ 3.11 metro.
^ Jaʼ 2.67 metro.
^ Ta hebreo: «ta waʼel kʼabal».
^ Jaʼ 2.22 metro. Ilawil ta apéndice, B14.
^ Jaʼ 8.9 metro. Ilawil ta apéndice, B14.
^ Ta hebreo: «templo».
^ Jaʼ 17.8 metro. Ilawil ta apéndice, B14.
^ Ta hebreo: «cuarto te ay ta mero yutil».
^ Ta hebreo: «cuarto te ay ta mero yutil».
^ Jaʼ 8.9 metro. Ilawil ta apéndice, B14.
^ Ta hebreo: «cuarto te ay ta mero yutil».
^ Ta yantik variante «tijil».
^ Ta hebreo: «cuarto te ay ta mero yutil».
^ Ta hebreo: «cuarto te ay ta mero yutil».
^ Jaʼ 4.45 metro. Ilawil ta apéndice, B14.
^ Jaʼ 2.22 metro. Ilawil ta apéndice, B14.
^ Jaʼ 4.45 metro.
^ Jaʼ 4.45 metro. Ilawil ta apéndice, B14.
^ Jaʼ 4.45 metro. Ilawil ta apéndice, B14.
^ Ta hebreo: «cuarto te ay ta mero yutil».
^ Ta hebreo: «cuarto te ay ta mero yutil».
^ Ta hebreo: «cuarto te ay ta mero yutil».
^ Ta hebreo: «cuarto te ay ta mero yutil».
^ Jaʼniwan ya skʼan ya yal te bitʼil pasbil te smarcoil te puertaetik o te smukʼul te puertaetike.
^ Ta hebreo: «templo».
^ Jaʼniwan ya skʼan ya yal te bitʼil pasbil te smarcoil te puertaetik o te smukʼul te puertaetike.
^ Ilawil ta apéndice, B15.
^ Ilawil ta apéndice, B15.
