1 Reyes 7:1-51
7 Te Salomón 13 jaʼbil jalaj ta spasel te snae, jaʼto te kʼalal juʼ yuʼun spasele.
2 La spas te Na ta teʼtikil yuʼun Líbano —te 100 xujkʼubil* snajtil, 50 xujkʼubil* sjamalul sok 30 xujkʼubil* stoyolil— kajal ta chanchol balal oyetik yuʼun cedro-teʼ. Ta sba te balal oyetik kajal tsʼamteʼetik yuʼun cedro-teʼ.
3 Te spajkʼul te ay ta kajal jaʼ cedro-teʼetik te ay ta sba te tsʼamteʼetik te yichʼoj yiptajib ta balal oyetik yuʼun te nae; ay 45 ta spisil, 15 ta jujunchol.
4 Ay oxchol sventanaul te ay smarcoilik. Te jujun ventana yiloj sba sok te yan ventana te cholajtik ta oxkaj.
5 Spisil te yochibal sok te smarcoil te puertaetik jaʼ cuadradoetik, jichnix-euk te ventanaetik te yiloj sbaik sok te yantik ventanaetik te oxkaj cholajtik.
6 La spas te Slejchelul na yuʼun balal oyetik te jaʼ 50 xujkʼubil* snajtil sok 30 xujkʼubil* sjamalul. Jaʼnix jich la spas yan slejchelul na ta yochibal sok balal oyetik te la yakʼbey smujkil ta sbae.
7 Jaʼnix jich la spas te Na yuʼun Chajpanwanej, jaʼ te banti ya xchajpanwan te ajwalil, te la yakʼbey sbiilin Snail smukʼul naktajib ajwalil. Te spajkʼul te la yakʼbeyike jaʼ cedro-teʼ te jajch tal ta spisoal jaʼto kʼalal ta stsʼamteʼal.
8 Te na te banti ya xnain te ajwalil, te ay ta yan jejch amakʼ, maba jun ay sok te Na yuʼun Chajpanwanej, pero pajal te bitʼil pasbilike. Jaʼnix jich la spas yan na te pajal yilel sok te na ini yuʼun tey ya xnain-a te yantsil nichʼan faraón te nujpun sok te Salomón.
9 Spisil te naetik ini —kʼalalto ta yiptajib jaʼto kʼalal ta spajkʼul te toyol ayik sok ta spat jaʼto kʼalal ta mukʼul amakʼ— la yichʼ pasel ta juxbil tonetik te toyol stojol, te setʼtiklanbil ta sierra ta yutil sok ta spat.
10 Te yiptajib te la yakʼbeyike jaʼ mukʼul tonetik te toyol stojol; ay tonetik te lajuneb xujkʼubil* smukʼul sok ay yantik te waxakeb xujkʼubil* smukʼul.
11 Ta sba te tonetik ini ay yantikxan tonetik te toyol stojol, juxbilik sok pʼisbilik ta lek, jaʼnix jich yichʼoj cedro-teʼetik.
12 Ta sjoyobal te mukʼul amakʼ la spasbey stsʼajkʼul te la scholan moel oxchol juxbil tonetik sok la skajanbey tsʼamteʼetik yuʼun cedro ta sba, jich bitʼil te yamakʼul sna te Jehová te ay ta yutil sok te slejchelul te nae.
13 Te ajwalil Salomón la stikun ta ikʼel tal te Hiram ta Tiro.
14 Jaʼ yal jtul meʼba ants te talem ta stsʼumbal Neftalí. Te stat te Hiram talem ta Tiro, ya snaʼ spasel bayal ta chajp aʼteliletik ta cobre;* te Hiram ya snaʼ lek aʼtel, kʼax pʼij sok bayal aʼtelil ya snaʼ spasel sok te cobre. Jich yuʼun bajt ta stojol te ajwalil Salomón sok la spas spisil te bintik akʼbot spase.
15 La spas chaʼbal oyetik ta ultesbil cobre.* Te stoyolil te jujun balal oy la spase jaʼ 18 xujkʼubil,* swenta ya yichʼ pʼisel-a te sbalejal te jujun oye ya skʼan te ayuk jlijkʼ chʼajan te 12 xujkʼubil* snajtil.
16 Jaʼnix jich la spas ta ultesbil cobre* chaʼwol takʼinetik, la skajanlan ta sba te balal oyetike. Te june jaʼ joʼeb xujkʼubil* stoyolil, te yane jaʼnix jich joʼeb xujkʼubil stoyolil.
17 Te chaʼwol takʼinetik te kajajtik ta sba te balal oyetik yichʼoj jalbil takʼinetik, ta jujunwol yichʼoj juklijkʼ jalbil takʼinetik.
18 La spas chaʼchol slokʼombail granadaetik* te la yakʼ ta sjoyobal te jalbil takʼinetik swenta jich la spotsik-a te chaʼwol takʼinetik te ayik ta sba te chaʼbal oyetik; jich la spasbey ta schaʼwolol te takʼinetike.
19 Te chaʼwol takʼinetik te ay ta sba te balal oyetik te ay ta slejchelul na jichik yilel te bin-utʼil te lirio-nichim te ay chaneb xujkʼubil* stoyolil.
20 Te chaʼwol takʼinetik kajajtik ta sba te chaʼbal oyetik, nakal te banti ay bin sepel ta sjol te balal oy te banti ay te jalbil takʼinetik. La spas 200 ta pʼij slokʼombail granadaetik* te cholanbil ta sjoyobal te jujunwol takʼinetik.
21 Tey-abi la stejkʼan moel te balal oyetik yuʼun te slejchelul na yuʼun te temploe.* Jaʼ nail la stejkʼan moel te balal oy te ay ta waʼel kʼabal,* Jakín* la yakʼbey sbiilin, tey-abi la stejkʼan moel te balal oy te ay ta kʼexam kʼabal,* Boaz* la yakʼbey sbiilin.
22 Te sjol te balal oyetik jaʼ jichik yilel te bin-utʼil lirio-nichim. Jaʼ jich juʼ ta pasel te balal oyetike.
23 Jaʼnix jich la spas jun Mukʼul yawil jaʼ te pasbil ta ultesbil takʼinetik. Sepel la spas, lajuneb xujkʼubil* sjamalul ta stiʼiltiʼil, joʼeb xujkʼubil* stoyolil sok ya skʼan te ayuk jlijkʼ chʼajan te 30 xujkʼubil* snajtil yuʼun ya xjuʼ ta pʼisel-a te sjamalul sjoylejal.
24 Ta sjoyobal te yalanil stiʼiltiʼil ay wolatik chʼumetik tey-a te jaʼ schʼalile; ay lajuneb ta pʼij chʼumetik ta jujun xujkʼubil,* jich ay ta sjoyobal te Mukʼul yawil jaʼe. Yichʼoj chaʼchol chʼumetik te jun-nax pasbil sok te Mukʼul yawil jaʼe.
25 Kajal ta spat 12 ta kojt toroetik: oxkojt yakik ta yilel bael ta stojol norte, oxkojt yakik ta yilel bael ta stojol smalib kʼajkʼal, oxkojt yakik ta yilel bael ta stojol sur sok oxkojt yakik ta yilel bael ta stojol slokʼib kʼajkʼal. Kajal ta sbaik te Mukʼul yawil jaʼ sok jaʼ ochem bael te skubik ta yeʼtal te Mukʼul yawil jaʼ.
26 Chaneb yal kʼabal* spimil te stiʼil te Mukʼul yawil jaʼe, te stiʼil jaʼ jich yilel te bin-utʼil stiʼil copa, jich yilel te bin-utʼil lirio-nichim. Ya x-och 2 mil bato* jaʼ tey-a.
27 Jaʼnix jich la spas lajunkojt carroetik te pasbilik ta cobre.* Te jujun carro chaneb xujkʼubil* snajtil, chaneb xujkʼubil sjamalul sok oxeb xujkʼubil* stoyolil.
28 Te carroetik jich pastiklanbil ini: la yakʼbey spajkʼul ta jujunjejch sok ay marcoetik yuʼun te jujun spajkʼule.
29 Ta yutil te marcoetik yuʼun te spajkʼul ay slokʼombail león-chojetik, toroetik sok querubinetik tey-a. Jaʼnix jich pasbil te lokʼombaetik-abi ta stiʼiltiʼil te marcoetike. Ta sba sok ta yeʼtal te slokʼombail león-chojetik sok toroetik ay schʼalil te tsʼotajtik pasbile.
30 Te jujun carro ay chansejp yok te pasbilik ta cobre* sok ay skʼatal takʼinal ta yolil te jaʼnix jich pasbil ta cobre sok ay chanchʼix yoyal ta jujunxujk te banti yichʼoj yipe. Te yiptajib te yawil jaʼe ay ta yeʼtal, ta jujunjejch ay schʼalil te tsʼotajtik pasbile.
31 Te stiʼil te banti ya xkʼot te yawil jaʼ ay scoronail te jun xujkʼubil* stoyolil kʼaxem-a. Sepel te stiʼil sok jun xujkʼubil sok olil* stoyolil sok spisil te banti yichʼtiklanoj yipe, ay yichʼoj pasbeyel lokʼombaetik ta stiʼiltiʼil. Te spajkʼul ta spatpat cuadrado pasbil, maba sepajtik.
32 Te chansejp yok ayik ta ye’tal te spajkʼul te ayik ta jujunjejch, te banti yichʼtiklanoj yip te yoke, jun-nax pasbil sok te carroe. Te jujunsejp yok jaʼ jun xujkʼubil sok olil* stoyolil.
33 Sepajtik pasbil te yok jaʼ jich te bin-utʼil yok te carretaetik. Te banti yichʼtiklanoj yip te yok, te yok te sepajtik, te stakʼinal yok sok te smajkil yok te ay ta yolil spisil pastiklanbil ta ultesbil takʼinetik.
34 Te jujun carroe ay chanchʼix te banti yichʼtiklanoj yip te ayik ta jujunxujk. Te banti yichʼtiklanoj yip ta jujunxujk jun-nax pasbil sok te carroe.
35 Kʼalalto ta sba te carro ay bin joyol tey-a te olil xujkʼubil* stoyolil. Te smarcoil sok te spajkʼul te ayik ta jujunxujk ta sba te carroe jun-nax pasbilik.
36 Ta smarcoil sok ta spajkʼul te ayik ta jujunjejch la spasbey slokʼombail querubinetik, león-chojetik sok palmeraetik tey-a, jaʼ chikan te jayeb sjamalul ta jujune, sok tsʼotajtik schʼalil ta sjoyobal.
37 Jich la spas te lajunkojt carroetik. Pajal la yichʼik pasel ta ultesbil takʼinetik, pajalnax smukʼulik sok pajalnax te bitʼil la yichʼik pasele.
38 La spas lajuneb yawil jaʼ ta cobre.* Te jujune ya x-och 40 bato* jaʼ tey-a sok chaneb xujkʼubil* sjamalul te stiʼiltiʼil. Te jujunkojt carro la yakʼbey jujun yawil jaʼ.
39 Jich yuʼun, joʼeb carro la yakʼ ta swaʼel te na sok joʼeb carro la yakʼ ta skʼexam* te nae. Te Mukʼul yawil jaʼ la yakʼ ta swaʼel te na ta stojol sureste.
40 Te Hiram jaʼnix jich la spas yantikxan yawil jaʼ, palaetik sok tazaetik.
Jich juʼ yuʼun spasel spisil te aʼtelil kʼanbot yuʼun te ajwalil Salomón ta swenta te sna te Jehová:
41 te chaʼbal oyetik sok te chaʼwol takʼinetik te jichik yilel te bin-utʼil bojch te kajajtik ta sba te balal oyetik; te cheb jalbil takʼinetik te potsbil-a te chaʼwol takʼinetik te jichik yilel te bin-utʼil bojch te ay ta sba te balal oyetik;
42 te 400 ta pʼij slokʼombail granadaetik* ta swenta te cheb jalbil takʼinetik —chaʼchol slokʼombail granadaetik ta jujun jalbil takʼinetik— te potsbil-a te chaʼwol takʼinetik te jichik yilel te bin-utʼil bojch te ay ta sba te chaʼbal oyetik;
43 te lajuneb ta kojt carroetik sok te lajuneb yawil jaʼ te ayik ta sba te carroetik;
44 te Mukʼul yawil jaʼ sok te 12 ta kojt toroetik te ayik ta yeʼtal te Mukʼul yawil jaʼ;
45 la spas cubetaetik, palaetik, tazaetik sok spisil te yantikxan aʼtejibaletik. Te Hiram la spas ta juxbil cobre* spisil te bintik kʼanbot yuʼun te ajwalil Salomón ta swenta te sna te Jehová.
46 Te ajwalil la yakʼ ta ultesel spisil te takʼinetik ta moldeetik te pasbilik ta ajchʼal ta spamlej yuʼun Jordán te ay ta yolil Sucot sok Zaretán.
47 Te Salomón maba la spʼisbeyix yalal te aʼtejibaletik te la yichʼik pasel, melel kʼax bayal. Maba la yichʼ naʼel te jayeb yalal ta spisil te cobree.*
48 Te Salomón la spas spisil te aʼtejibaletik yuʼun te sna te Jehová: te skajtajib schikʼojibal pom te pasbil ta oro; te mesa te pasbil ta oro te banti ya yichʼ akʼel te pan te ya yichʼ akʼel ta stojol te Dios;
49 te skajtajib kʼajkʼetik te pastiklanbil ta batsʼil oro, joʼchʼix la yichʼ akʼel ta waʼel kʼabal sok joʼchʼix ta kʼexam kʼabal* te ay ta stojol te Mero chʼul awilal;* te nichimetik, te yawil kʼajkʼetik sok te stupʼojibal smechail kʼajkʼ te pastiklanbil ta oro;
50 te yawil jaʼetik, te stupʼojibal kʼajkʼ, tazaetik, copaetik sok te yawil akʼal te pastiklanbil ta batsʼil oro soknix pastiklanbil ta oro te banti ya xnajkaj te yoyal te puertaetik te ay ta mero yutil te nae, jaʼ te Mero chʼul awilal, soknix te banti ya xnajkaj te yoyal te puertaetik yuʼun te temploe.
51 Jich te ajwalil Salomón juʼ yuʼun spasel spisil te aʼtelil ta swenta te sna te Jehová. Tey-abi la yichʼ tal spisil te biluketik te la schʼultes te David te stat sok la skʼej te plata, te oro sok te biluketik ta yawil kʼulejalil ta sna te Jehová.
Notaetik
^ Jaʼ 44.5 metro. Ilawil ta apéndice, B14.
^ Jaʼ 22.25 metro.
^ Jaʼ 13.35 metro.
^ Jaʼ 22.25 metro. Ilawil ta apéndice, B14.
^ Jaʼ 13.35 metro.
^ Jaʼ 4.45 metro. Ilawil ta apéndice, B14.
^ Jaʼ 3.56 metro.
^ O «bronce».
^ O «bronce».
^ Jaʼ 8.01 metro. Ilawil ta apéndice, B14.
^ Jaʼ 5.34 metro.
^ O «bronce».
^ Jaʼ 2.22 metro. Ilawil ta apéndice, B14.
^ Jaʼ sit teʼ te tsajtsajtik sbonil te jich yilel te bin-utʼil manzana.
^ Jaʼ 1.78 metro. Ilawil ta apéndice, B14.
^ Jaʼ sit teʼ te tsajtsajtik sbonil te jich yilel te bin-utʼil manzana.
^ Liʼi jaʼ skʼoplal te Chʼul Awilal.
^ O «ta stojol sur».
^ Te ya skʼan ya yal «jaʼ ya yakʼbey yichʼ yip, [jaʼ skʼoplal te Jehová]».
^ O «ta stojol norte».
^ Jaʼniwan ya skʼan ya yal «ay yip».
^ Jaʼ 4.45 metro. Ilawil ta apéndice, B14.
^ Jaʼ 13.35 metro.
^ Jaʼ 2.22 metro.
^ Jaʼ 44.5 centímetro. Ilawil ta apéndice, B14.
^ Jaʼniwan 7.4 centímetro. Ilawil ta apéndice, B14.
^ Jaʼ 44 mil litro. Ilawil ta apéndice, B14.
^ O «bronce».
^ Jaʼ 1.78 metro. Ilawil ta apéndice, B14.
^ Jaʼ 1.33 metro.
^ O «bronce».
^ Jaʼ 44.5 centímetro. Ilawil ta apéndice, B14.
^ Jaʼ 66.75 centímetro.
^ Jaʼ 66.75 centímetro. Ilawil ta apéndice, B14.
^ Jaʼ 22.25 centímetro. Ilawil ta apéndice, B14.
^ O «bronce».
^ Jaʼ 880 litro. Ilawil ta apéndice, B14.
^ Jaʼ 1.78 metro. Ilawil ta apéndice, B14.
^ Ta yantik variante «xin k’ab».
^ Jaʼ sit teʼ te tsajtsajtik sbonil te jich yilel te bin-utʼil manzana.
^ O «bronce».
^ O «broncee».
^ Ta yantik variante «xin kʼabal».
^ Ta hebreo: «cuarto te ay ta mero yutil».
