1 Reyes 8:1-66
-
La yichʼik tal te skaxaul chapbilkʼop ta templo (1-13)
-
Te Salomón kʼopoj ta stojol te lum (14-21)
-
Te oración la spas te Salomón te kʼalal la yakʼ ta stojol Dios te templo (22-53)
-
Te Salomón la yakʼbey bendición spisil te lum Israel (54-61)
-
Te milbil majtaniletik sok te kʼin la spas te Salomón (62-66)
8 Ta yorail-abi, te Salomón la stsob tal te jwolwanejetik yuʼun te Israel: spisil te jwolwanejetik yuʼun te stsʼumbal Israel sok te jolaletik yuʼun te familiaetik yuʼun te stsʼumbal Israel. Tal yilik te ajwalil Salomón ta Jerusalén swenta ya yichʼik tal te skaxaul chapbilkʼop yuʼun te Jehová te ay ta Mukʼul lum yuʼun David, jaʼ te Sion.
2 Spisil te winiketik yuʼun Israel la stsob sbaik ta stojol te ajwalil Salomón ta yorail te kʼine,* ta yuilal etanim,* jaʼ te sjukebal u.
3 Jich yuʼun talik spisil te jwolwanejetik yuʼun te Israel. Jich te sacerdoteetik la skʼechik tal te skaxaul chapbilkʼop.
4 La yichʼik moel tal te skaxaul chapbilkʼop yuʼun te Jehová, te nailpakʼ ta swenta tsoblej sok spisil te chʼultesbil aʼtejibaletik te ayik ta nailpakʼ-ae. Jaʼ la yichʼik tal te sacerdoteetik sok te levitaetik.
5 Te ajwalil Salomón la stejkʼan sba ta stojol te skaxaul chapbilkʼop sok spisil te lum Israel te la stikun ta ikʼele. Kʼax bayal la yakʼik ta milbil majtanil tuminchijetik sok wakaxetik te ma juʼix ta ajtayele.
6 Jich yuʼun, te sacerdoteetik la yichʼik bael te skaxaul chapbilkʼop yuʼun te Jehová ta yawil, ta yutil te cuarto te ay ta mero yutil, jaʼ te Mero chʼul awilal, tey kʼot yakʼik ta yeʼtal xikʼ te querubinetike.
7 Te xikʼ te querubinetik slichʼojik ta stojol te lugar yuʼun te skaxaul chapbilkʼop te jich la yaxintesik te skaxaul chapbilkʼop sok te steʼele.
8 Kʼax najtik te steʼel te ya xchiknaj te sniʼil kʼalalto ta Chʼul Awilal te snujpʼsitayoj sba sok te cuarto te ay ta mero yutil, pero maba chikanik ta ilel ta fuera. Jaʼto ta ora ini tey ayik-a.
9 Maʼyuk bin ay ta yutil te skaxaul chapbilkʼop jaʼnax te chaʼpejch tonetik te la yakʼ tey-a te Moisés ta Horeb, jaʼ te kʼalal te Jehová la schap skʼop sok te lum Israel te kʼalal lokʼik tal ta skʼinal Egipto.
10 Te kʼalal lokʼik te sacerdoteetik ta chʼul awilal, noj ta tokal te sna te Jehová.
11 Te sacerdoteetik maba juʼ jilik ta spasel te yaʼtelik tey-a ta skaj te tokale, melel te yutsilal te Jehová noj ta sna te Jehová.
12 Te Salomón jich la yal: «Te Jehová yaloj te ya xnain ta yolil pimil tokal.
13 Pero juʼix kuʼun spasel te ana te kʼax tʼujbil te banti ya xjuʼ ya xnainat ta sbajtelkʼinal».
14 Tey-abi la sut sba te ajwalil ta stojol te lum Israel te tey tekʼajtik-ae sok jajch yakʼbey bendición.
15 Jich la yal: «Akʼa yichʼ albeyel yutsil skʼoplal te Jehová te Dios yuʼun Israel, jaʼ te machʼa la skʼotes ta pasel te bin jamal la yalbey te David te jtate:
16 ‹Jaʼto te bin kʼajkʼalil la jlokʼes tal ta Egipto te lum Israel kuʼun, maʼyuk jtsaoj junuk mukʼul lum yuʼun te lum Israel swenta ya yichʼ pasel jun na yuʼun tey ya x-ayin-a te jbiile. Pero, jaʼ la jtsa te David yuʼun jaʼ ya swentainbon te lum Israel kuʼun›.
17 Te David te jtat jaʼ lokʼ ta yoʼtan spasel jun na ta swenta sbiil te Jehová te Dios yuʼun Israel.
18 Pero, te Jehová jich la yalbey te David te jtate: ‹Lokʼ ta awoʼtan spasel jun na ta swenta te jbiile, kʼax lek te jich la skʼan te awoʼtane.
19 Pero, ma jaʼukat ya apas te nae. Te anichʼan te yato x-ayine* jaʼme te machʼa ya spasbon jun na ta swenta te jbiile›.
20 Te Jehová la skʼotes ta pasel te bin jamal la yale, melel joʼon la jelolin jilel te David te jtate, joʼon nakalon ta mukʼul naktajibal yuʼun Israel, jich te bitʼil la yal ta jamal te Jehová. Jaʼnix jich juʼix kuʼun spasel te na ta swenta sbiil te Jehová te Dios yuʼun Israel,
21 sok tey la jpasbey jun lugar yuʼun te skaxaul chapbilkʼop te banti ay te chapbilkʼop te la spas te Jehová sok te antiguo jmeʼ jtatik te kʼalal la slokʼeslan tal ta skʼinal Egipto».
22 Jich yuʼun, te Salomón la stejkʼan sba ta stojol te skajtajib chikʼbil majtanil yuʼun te Jehová sok tey ayik-a te lum yuʼun Israel. La stoy moel skʼab ta chʼulchan
23 sok jich la yal: «Kajwal, Jehová, Dios yuʼun Israel. Maʼyuk yan Dios ta chʼulchan sok ta balumilal jich bitʼil te jaʼate. Te jaʼate ya akʼotes ta pasel te chapbilkʼop ya apas sok ya awakʼbey yil te kʼuxul oʼtanil te ma x-ijkitaywan te j-abatetik awuʼun te spisil yoʼtanik ya stʼunik te beetik awuʼune.
24 La akʼotesix ta pasel te bin jamal la awalbey te David te j-abat awuʼun, jaʼ te jtate. Ta ora ini la akʼotesix ta pasel te bin jaʼatnix jamal la awale.
25 Jich yuʼun, Kajwal, Jehová, Dios yuʼun Israel, kʼotesa ta pasel te bin jamal la awalbey te David te j-abat awuʼun, jaʼ te jtat, te kʼalal jich la awalbeye: ‹Teme ya stsajtay* sbaik ta swenta te bin ya spas ta skuxlejalik te anichʼnab jich te bitʼil la apas te jaʼate, spisilme-ora ya x-ayin jtul atsʼumbal te ya xnajkaj ta mukʼul naktajibal yuʼun Israel›.
26 Jaʼ yuʼun, awokoluk, Dios yuʼun Israel, akʼa kʼotuk ta pasel awuʼun te bin la awalbey ta jamal te David te j-abat awuʼun, jaʼ te jtate.
27 »Pero, ¿yuʼun-nixbal ya xjuʼ ya xnain-a te Dios ta balumilal? Manchukme kʼax mukʼ sjamalul te chʼulchan, ma xjuʼ ya xnainat tey-a. ¡¿Jaʼuktobalix-a te na ini te la jpase?!
28 Jich yuʼun aʼiybon awaʼiy te jkʼop sok aʼiybon awaʼiy te wokol ya jkʼanbat ta atojole. Kajwal, Jehová Dios kuʼun, aʼiybon awaʼiy te koltayel ya jkʼanbat ta atojol sok aʼiybon awaʼiy te oración kuʼun te yakon ta spasel ta atojol ta ora ini.
29 Ta kʼajkʼal ajkʼabal akʼa asit ta stojol te na ini —jaʼ te banti jich la awalbey skʼoplal ‹Teyme ya x-ayin-a te jbiil›— swenta ya awaʼiybey skʼop te j-abat awuʼun ini te kʼalal ya xtal skʼoponat ta lugar ini.
30 Aʼiybeya awaʼiy te koltayel ya skʼanbat te j-abat awuʼun ini sok te koltayel ya skʼanbat te lum Israel ta lugar ini. Aʼiybonkotik te jkʼoptik kʼalalto ta chʼulchan, jaʼ te banti nainemate. Aʼiybonkotik te jkʼoptik sok pasbonkotik perdón.
31 »Teme ay machʼa ya sta smul ta stojol yan winik sok te ay bin ya sujot ta yalel ta jamal* —manchukme ya xjuʼ ya sta swokol yuʼun— sok te jich ya xtal ta stojol te skajtajib chikʼbil majtanil awuʼun liʼ ta na ini,
32 aʼiybeya awaʼiy te skʼop kʼalalto ta chʼulchan sok koltaya. Ichʼa ta kʼop te j-abatetik awuʼun: jaʼat xa awal te machʼa chopole* sok akʼa kʼotuk ta stojol te castigo ta swenta te bin chopol spasoje; jaʼat xa awal te maʼyuk smul te machʼa toj yoʼtan sok akʼbeya smajtan ta swenta te bin lek spasoje.
33 »Te kʼalal ya yichʼ tsalel yuʼun te skontratak te lum Israel awuʼun ta skaj smulik ta atojol, pero teme ya sujtik tal ta atojol, teme ya yalbeyik yutsil skʼoplal te abiil, teme ya skʼoponat sok teme ya yalbat wokol liʼ ta na ini,
34 aʼiybeya awaʼiy te skʼopik kʼalalto ta chʼulchan sok pasbeya perdón te smul te lum Israel awuʼun sok ikʼa sujtel tal ta kʼinal te banti la awakʼbey te antiguo smeʼ statike.
35 »Te kʼalal ya xmajk te chʼulchan sok te maba ya yakʼ tal jaʼal ta skaj te staoj smulik ta atojole, pero teme ya skʼoponat ta lugar ini, teme ya yalbeyik yutsil skʼoplal te abiil sok teme ya yijkitayik ta spasel te bintik chopol* ta skaj te la apejkʼanbey skʼoplalik,
36 aʼiybeya awaʼiy te skʼopik kʼalalto ta chʼulchan sok pasbeya perdón te smul te j-abatetik awuʼun, jaʼ te lum Israel —melel jaʼat ya anojptes ta swenta te lekil be ya skʼan ya stʼunik baele—, sok ak’a tal jaʼal ta stojol te lumkʼinal te la awakʼbey te lum awuʼune.
37 »Teme ay ya xtal wiʼnal ta kʼinal, tulan chamel, tulan kʼixin ikʼ, teme ay ya xtaot ta uch te awal tsʼunubil, ya xtal bayal kʼulubetik o ay ya yichʼik joytayel yuʼun te skontratakik ta mukʼul lum kuʼunkotik, o ya xchiknaj yantik wokolil o chamel,
38 chikan bin-a te ya awichʼ kʼanbeyel ta oración, chikan bin koltayel ya skʼanbat jtul ants winik o spisil te lum Israel awuʼun te ya stoy moel skʼab ta na ini (melel ta jujuntul ya snaʼ te bin wokolil ay ta yoʼtan),
39 aʼiybeya awaʼiy te skʼopik kʼalalto ta chʼulchan, jaʼ te banti nainemate, pastiklanbeya perdón sok koltaylana. Jichme xa awakʼbey smajtan ta jujuntul ta swenta te bin spasojik, melel jaʼat ya anaʼ te bin ay ta yoʼtanik (jaʼatnax atukel ya anaʼ te bin ay ta yoʼtan ta jujuntul te ants winiketike),
40 swenta jich ya xiʼat* te jayeb kʼajkʼal kuxulik ta kʼinal te la awakʼbey te antiguo jmeʼ jtatike.
41 »Jaʼnix jich, te jyanlum te ma jaʼuk slumal te lum Israel awuʼun sok te kʼax namal* te banti ya xtal ta swenta te abiil
42 sok te ya skʼoponat ta na ini (melel yame yaʼiybeyik skʼoplal te smukʼul te abiil, te yip te akʼab sok te awuʼele),
43 aʼiybeya awaʼiy te skʼop kʼalalto ta chʼulchan, jaʼ te banti nainemat sok akʼbeya te bin ya skʼanbat te jyanlume, swenta jich ya snaʼbat abiil spisil te lumetik ta balumilal, swenta ya xiʼat* —jich te bitʼil ya spas te lum Israel awuʼun— sok te ya snaʼik te liʼ ay te abiil ta na ini te joʼon la jpase.
44 »Teme ya xbajt yakʼbey guerra te skontratak te lum awuʼun chikan te banti beil ya atikun bael sok teme ya skʼoponik te Jehová ta stojol te mukʼul lum te jaʼatnix atsaoj sok ta stojol te na te joʼon la jpas ta swenta te abiile,
45 aʼiybeya awaʼiy te skʼopik kʼalalto ta chʼulchan sok te koltayel ya skʼanik ta atojol soknix ilawil te lekuk ya yichʼik chajpanele.
46 »Teme la sta smulik ta atojol (melel maʼyuk machʼa ma sta smul) sok te ya x-ilinat ta stojolik te jich ya awakʼ ta skʼab skontratak sok te ya yichʼik chukel bael ta slumal te machʼatik tsalotik yuʼune, chikan teme namal* o nopol,*
47 sok teme la sujtes yoʼtanik tey ta kʼinal te banti la yichʼik chukel bael sok sujtik tal ta atojol soknix teme la skʼanbat koltayel ta atojol ta skʼinal te machʼatik tsalotik yuʼun te jich ya yalik ‹Jtaoj jmulkotik sok jpasojkotik te bin ma leke›,
48 teme ya sujtik tal ta atojol sok spisil yoʼtanik sok spisil skuxlejalik te kʼalal ayik ta skʼinal te skontratakik te chukotik bael yuʼun, sok ya skʼoponat tal ta stojol te kʼinal te la awakʼbey te antiguo smeʼ statik sok ta stojol te mukʼul lum te jaʼatnix atsaoj soknix ta stojol te na te joʼon la jpas ta swenta te abiile,
49 aʼiybeya awaʼiy te skʼopik kʼalalto ta chʼulchan, jaʼ te banti nainemat, sok aʼiya awaʼiy te koltayel ya skʼanik ta atojol soknix ilawil te lekuk ya yichʼik chajpanele,
50 pasbeya perdón te lum awuʼun te la sta smul ta atojole. Pasbeya perdón spisil te smulik te spasojik ta atojole. Akʼa te kʼuxuk ya x-aʼiyotik sok te yakuk xnaʼbot yoʼbolil sbaik yuʼun te machʼatik tsalotik yuʼune
51 (jaʼ lum awuʼun sok jaʼ tsabil awuʼun te mukʼ skʼoplal te la alokʼes tal ta Egipto, ta horno te banti ya yichʼ ultesel takʼinetik).
52 Chʼama awaʼiy* te koltayel ya skʼanbat te j-abat awuʼun ini sok te lum Israel awuʼun, aʼiybeya awaʼiy spisil-ora te skʼopik te kʼalal ya skʼoponate.
53 Kajwal Jehová, Mukʼul Ajwalil, jaʼat parte la awakʼ ta stojol spisil te lumetik ta balumilal swenta ja’ awuʼun kʼot jich te bitʼil la awalbey te Moisés te j-abat awuʼun te kʼalal la alokʼeslan tal ta Egipto te antiguo jmeʼ jtatike».
54 Te kʼalal laj yoʼtan ta skʼoponel Jehová te Salomón sok ta yalel wokol ta stojol te skajtajib chikʼbil majtanil yuʼun te Jehová, la stejkʼan sba te banti kejel sok te stoyoj moel skʼab ta chʼulchan-ae.
55 Te kʼalal tekʼelix-ae, la yakʼbey bendición spisil te lum Israel, jich tulan la yal:
56 «Ak’a yichʼ albeyel yutsil skʼoplal te Jehová te la yakʼbey jun lugar te banti ya skux yoʼtan te lum Israel yuʼune, jich te bitʼil la yal ta jamale. Kʼot ta pasel spisil te bintik lek la yal ta jamal ta swenta te Moisés te j-abat yuʼune.
57 Jichme akʼa sjokinotik te Jehová te Dios kuʼuntik, jich te bitʼil la sjokin te antiguo jmeʼ jtatike. Te manchuk ya yijkitayotik sok ya spijtesotik.
58 Akʼa stij koʼtantik yuʼun ya xtalotik ta stojol swenta jich ya jtʼuntik spisil te beetik yuʼun sok te yakuk jchʼuunbeytik te mantaliletik yuʼun, te yakuk jchʼuuntik te bintik yaloj sok te bitʼil ya xchajpanwan jich te bitʼil la yalbey ta mantal te antiguo jmeʼ jtatike.
59 Jich yuʼun, ta kʼajkʼal ajkʼabal akʼa juluk ta yoʼtan te Jehová te Dios kuʼuntik spisil te bin la jkʼanbey ta wokol te Jehová, swenta stojil ya schajpan te j-abat yuʼun sok te lum Israel yuʼun, jaʼ chikan te bin-utʼil ya xtuun ta jujun kʼajkʼale.
60 Jichme ya snaʼik spisil te lumetik ta balumilal te jaʼ smelelil Dios* te Jehová. ¡Maʼyuk yan!
61 Junukme awoʼtanik ya x-abatinex ta stojol te Jehová te Dios kuʼuntik, chʼuunaik te bintik yaloj sok chʼuunbeyaik te mantaliletik yuʼun jich te bitʼil yakex ta spasel ta ora ini».
62 Te ajwalil sok spisil te lum Israel la yakʼbeyik bayal milbil majtanil te Jehová.
63 Te Salomón la yakʼbey te Jehová milbil majtaniletik ta swenta lamalkʼinal: 22 mil ta kojt wakaxetik sok 120 mil ta kojt tuminchijetik. Jich yuʼun, te ajwalil sok spisil te israeletik la spasbeyik skʼinul te sna te Jehová ta swenta te juʼix ta pasele.
64 Ta kʼajkʼal-abi, te ajwalil la schʼultes te yolil te amakʼ te ay ta stojol te sna te Jehová, melel tey la yakʼ-a te chikʼbil majtanil, te majtaniletik yuʼun sit awal tsʼunubiletik sok te sjujpʼel* te milbil majtaniletik ta swenta lamalkʼinal. Ta swenta te bayal la yichʼ akʼel te chikʼbil majtaniletik, te majtaniletik yuʼun sit awal tsʼunubiletik sok te sjujpʼel te milbil majtaniletik ta swenta lamalkʼinal, maba och ta skajtajib chikʼbil majtanil te pasbil ta cobre te ay ta stojol te Jehová, melel chʼin jil yuʼun.
65 Ta yorail-abi, te Salomón sok spisil te lum Israel la spasik kʼin ta stojol te Jehová te Dios kuʼuntik, la stsob sbaik bayal ta tul ants winiketik te kʼax namal* te banti talemik jich bitʼil ta Lebó-Hamat* sok kʼalal ta be jaʼetik yuʼun Egipto. Jukeb kʼajkʼal jalaj te kʼine sok la spasikxan jukeb kʼajkʼal, ta spisil jalaj 14 kʼajkʼal.
66 Ta yan kʼajkʼal,* te ajwalil la stikunlan sujtel te ants winiketik, jich la skʼanbeyik bendición te Dios ta stojol te ajwalil, ta patil tseʼelnax yoʼtan sujtik bael ta snaik sok bujtsʼan-nax kʼinal la yaʼiyik ta swenta te slekil yoʼtan te Jehová te la yakʼ ta ilel ta stojol te David te j-abat yuʼun sok te lum Israel yuʼune.
Notaetik
^ Jaʼ ya skʼan ya yal te Kʼin yuʼun axibal naetik.
^ Ilawil ta apéndice, B15.
^ Ta yantik variante «xpʼejkaje», «xtojke».
^ Ta yantik variante «yil».
^ O «teme albot te ay bin chopol ya xkʼot ta stojol». Jaʼ skʼoplal te bin jamal ya yichʼ alel te ay bin chopol ya xkʼot ta pasel te jaʼ castigo ya xkʼot yuʼun teme maba smeleliluk te bin jamal la yal o teme maba ya skʼotes ta pasel te bin la yale.
^ Ta yantik variante «ma leke».
^ Ta yantik variante «ma lek».
^ Ta yantik variante «jakal», «kʼubul».
^ Ta yantik variante «jakal», «kʼubul».
^ Ta yantik variante «tijil».
^ Ta hebreo: «Jamalukme asit ta yilel».
^ Ta yantik variante «xepuil».
^ Ta yantik variante «jakal», «kʼubul».
^ O «yochibal Hamat».
^ Ta hebreo: «swaxakebal kʼajkʼal». Jaʼ skʼoplal te yan kʼajkʼal yuʼun te schebal semana te la spasik te kʼine.
