1 Reyes 9:1-28
9 Te kʼalal juʼ yuʼun spasbeyel sna te Jehová te Salomón sok te sna te ajwalil sok spisil te bintik la skʼan yoʼtan la spase,
2 te Jehová la yak’ sba ta ilel ta schebal buelta ta stojol te Salomón, jich te bitʼil la yak’ sba ta ilel ta stojol ta Gabaón.
3 Te Jehová jich la yalbey te Salomón: «La kaʼiy stojol te oración awuʼun sok te bin la akʼanbon ta wokol. Lame jchʼultesix te na te la apasbon, jaʼ te banti la kakʼ x-ayin te jbiil ta sbajtelkʼinal sok spisilme-ora tey ya kakʼ jsit sok te koʼtan.
4 Teme ya atʼun te beetik kuʼun jich te bitʼil la spas te David te atate, teme jun awoʼtan sok toj awoʼtan ta jtojol, teme ya apas spisil te bin ya kalbat ta mantal, teme ya achʼuun spasel te leyetik kuʼun sok te bintik jchapoj,
5 joʼonme ya kakʼbey yichʼ yip ta sbajtelkʼinal te wentainel awuʼun ta stojol te lum Israel, jich te bitʼil la kalbey ta jamal te David te atat te kʼalal jich la kalbey ‹Spisilme-ora ya x-ayin jtul atsʼumbal te ya xnajkaj ta mukʼul naktajibal yuʼun Israel›.
6 Pero, teme ya awijkitayonik sok ya yijkitayonik te anichʼnabik sok teme maba ya achʼuunik te mantaliletik kuʼun sok te bintik kalojbeyexe, teme ya awichʼik ta mukʼ yantik diosetik sok te ya anijan abaik ta stojolike,
7 yame jlajinbey skʼoplal te lum Israel ta kʼinal te kakʼojbeye, yame jkʼej bael jsit ta stojol te na te la jchʼultes ta swenta te jbiile, yame yichʼ pʼajel te lum Israel sok yame yichʼ labanel yuʼun spisil te yantik lumetike.
8 Jinem ya xjil te na ini. Spisil te machʼatik ya xkʼaxik tey-ae yan-naxme ya yilik-a, yame xuxubajik sok jichme ya yalik: ‹¿Bin yuʼun te jich la spas te Jehová ta stojol te kʼinal ini sok te na ini?›.
9 Jich ya yalik: ‹Jaʼ yuʼun te la yijkitayik te Jehová te Dios yuʼunik, jaʼ te machʼa la slokʼeslan tal te antiguo smeʼ statik ta Egipto. La yichʼik ta mukʼ yantik diosetik, la snijan sbaik ta stojolik sok la yakʼ sbaik ta abatinel ta stojolik. Jaʼ yuʼun, te Jehová la yakʼ tal ta stojolik spisil te wokolil ini›».
10 Te Salomón ta 20 jaʼbil juʼ yuʼun spasel ta schebal te nae, te sna te Jehová sok te sna te ajwalil.
11 Te ajwalil Salomón la yakʼbey te Hiram, te ajwalil yuʼun Tiro, 20 ta pam mukʼul lumetik ta skʼinal Galilea. Te Hiram la yakʼbey te ajwalil Salomón cedro-teʼetik, enebro-teʼetik sok bayal oro jaʼ chikan te jayeb kʼanbote.
12 Jich te Hiram lokʼ bael ta Tiro yuʼun bajt yil te mukʼul lumetik te akʼbot yuʼun te Salomón, pero maba la smulan.
13 Jich la yal te Hiram: «Kermano, ¿binxanix mukʼul lumetik te la awakʼbone?». Jaʼ yuʼun la yakʼbeyik sbiilin Skʼinal Cabul* jaʼto ta ora ini.
14 Te Hiram la stikunbey te ajwalil 120 talento* yuʼun oro.
15 Jaʼik ini te machʼatik la yikʼ tal te ajwalil Salomón yuʼun ya x-aʼtejik ta stojol swenta ya spasik te sna te Jehová, te sna te ajwalil, te chʼin wits,* te stsʼajkʼul te Jerusalén, te Hazor, Meguidó sok stsʼajkʼul te Guézer.
16 (Te faraón, te ajwalil yuʼun Egipto, la yakʼbey guerra te mukʼul lum Guézer sok la yuʼunin. La schikʼ te mukʼul lum sok la smil te cananeoetik te ayik ta nainel tey-a. Jaʼ yuʼun, te faraón la skʼebanbey jilel* te yantsil nichʼan te mukʼul lum ini, jaʼ te yinam te Salomón).
17 Te Salomón la schaʼpas te stsʼajkʼul te Guézer, te Bet-Horón ta alan,
18 te Baalat, Tamar, te ay ta jochol takin kʼinal yuʼun te lum,
19 jaʼnix jich la schaʼpas te stsʼajkʼul spisil te mukʼul lumetik te banti ya skʼej te weʼelil te Salomón, te mukʼul lumetik te banti ay te carretaetik, te mukʼul lumetik yuʼun te machʼatik ya xkajajik ta caballo sok la spas spisil te bin la skʼan yoʼtan te Salomón ta Jerusalén, ta Líbano sok ta spamal te kʼinal te banti swentainoje.
20 Te jayeb ta tul amorreoetik, hititaetik, perizitaetik, heveoetik sok te jebuseoetik te maba la yichʼik milel te ma jaʼuk stsʼumbalik te lum Israel,
21 te Salomón la stsob tal te patil alnichʼanetik yuʼunik te jilemik ta kʼinal —jaʼ te machʼatik maba juʼ yuʼunik slajinel te israeletik— swenta ya spasik tulan aʼtelil jich bitʼil mosoetik, jaʼ jich ayik jaʼto ta ora ini.
22 Pero, te Salomón maʼyuk la smosoin ni jtuluk israel-winik, melel jaʼ soldadoetik yuʼun, j-abatetik yuʼun, yichʼoj mukʼ yaʼtelik yuʼun, capitanetik yuʼun soldadoetik yuʼun, jwolwanejetik yuʼun te machʼatik ya stijik te carretaetik yuʼun sok te machʼatik ya xkajajik ta caballoetik yuʼun.
23 Ay 550 ta tul te swentainojik yilel te machʼatik yichʼoj mukʼ yaʼtelik ta yilel te aʼtelil yuʼun te Salomón, jaʼik te machʼatik ya yilik te aʼtelil ya spasik te ants winiketik.
24 Jich te yantsil nich’an te faraón lokʼ bael ta Mukʼul lum yuʼun David, bajt ta sna, jaʼ te banti pasbot yuʼun te Salomón. Jaʼ yuʼun, te Salomón jajch spas te chʼin wits.*
25 Te Salomón ya yakʼ oxeb buelta ta jun jaʼbil chikʼbil majtaniletik sok milbil majtaniletik ta swenta lamalkʼinal tey ta skajtajib chikʼbil majtanil te la spasbey te Jehová, jaʼnix jich la yakʼ te xtomet schʼailel te chikʼbil majtanil ta sba te skajtajib chikʼbil majtanil te ay ta stojol te Jehová. Jich juʼ yuʼun spasel te nae.
26 Te Salomón la spas bayal barcoetik ta Ezión-Guéber, te ay ta stsʼeel Elot, ta stiʼil te mar Rojo, te ay ta skʼinal Edom.
27 Te Hiram la stikun j-abatetik yuʼun ta barcoetik, jaʼ te machʼatik ya snaʼik stijel ta lek te barcoetik swenta ya sjokinik ta aʼtel te j-abatetik yuʼun te Salomón.
28 Tey-abi bajtik ta Ofir, tey la yichʼik tal 420 talento* yuʼun oro sok la yichʼbeyik tal te ajwalil Salomón.
Notaetik
^ Jaʼniwan ya skʼan ya yal «Kʼinal te ma xtuun».
^ Jaʼ 4,104 kilo. Ilawil ta apéndice, B14.
^ O «Miló». Jaʼ jpʼal kʼop ta hebreo kʼop te ya skʼan ya yal «butʼbil».
^ O «la yakʼbey smajtanin ta swenta te nujpun».
^ O «Miló». Jaʼ jpʼal kʼop ta hebreo kʼop te ya skʼan ya yal «butʼbil».
^ Jaʼ 14,364 kilo. Ilawil ta apéndice, B14.
