1 Samuel 1:1-28
1 Ay jtul efraimita-winik te nainem ta Ramataim-Zofim* te ay ta witstikil yuʼun Efraín, Elcaná sbiil, jaʼ snichʼan te Jeroham. Te Jeroham jaʼ snichʼan Elihú; te Elihú jaʼ snichʼan Tohu, te Tohu jaʼ snichʼan te Zuf.
2 Te Elcaná ay chaʼtul yinam-a. Ana sbiil te jtule, Peniná sbiil te yane. Te Peniná ay yalatak stukel, pero maʼyuk yalatak stukel te Ana.
3 Ta jujun jaʼbil, te winik ini ya xlokʼ bael ta slumal yuʼun ya xbajt ta Siló swenta ya yichʼ ta mukʼ* te Jehová te jwolwanej yuʼun te soldadoetik* sok yuʼun ya yakʼ milbil majtaniletik. Jaʼ te banti ya x-abatinik ta sacerdoteetik yuʼun Jehová te Hofní sok te Finehás, jaʼ te chaʼtul snichʼnab te Elí.
4 Ta jun buelta, te Elcaná la yakʼ milbil majtanil ta stojol Dios sok la yakʼbey sparte te Peniná te yiname, soknix la yakʼbey sparte te skerem-alatak sok te achʼixetik yuʼun te Peniná,
5 yan stukel te sparte te la yakʼbey te Ana jaʼ te bin lekxane, melel jaʼ te machʼa kʼux-xan ta yoʼtane. Pero, jaʼnix te Jehová te ma la yakʼ alajuk te Ana.
6 Te skontrae jaʼ te yan yinam te Elcaná, spisil-ora la slaban te Ana yuʼun jich la yakʼbey smel yoʼtan, melel jaʼnix te Jehová te ma xyakʼ alajuk te Ana.
7 Jich ya spasulan ta jujun jaʼbil te Peniná. Te kʼalal ya xmo bael ta jujun buelta ta sna Jehová te Ana, kʼax bayal ya xlabanot yuʼun te yan yinam te Elcaná te jich puro okʼel ya skʼan te Ana sok te ma xweʼ yuʼune.
8 Pero, jich albot yuʼun te Elcaná te jaʼ smamalal: «Ana, ¿bin yuʼun te yakat ta okʼele? ¿Bin yuʼun te ma xweʼate? ¿Bin yuʼun te ayat ta tulan mel-oʼtane? Liʼ ayon te joʼone, ¿mabal jaʼuk mukʼxan skʼoplal-abi te bin-utʼil lajuntul alnichʼanetik?».
9 Te kʼalal laj yoʼtanik ta weʼ uchʼajel ta Siló, bajt te Ana. Ta yorail-abi, te Sacerdote Elí nakal ta stsʼeel te puerta yuʼun te templo* yuʼun te Jehová.
10 Kʼax bayal smeloj yoʼtan te Ana te jich jajch skʼopon te Jehová sok yak ta okʼel.
11 Sok jich jamal la yal te Ana: «¡Kajwal, Jehová te jwolwanejat yuʼun te soldadoetik!* Ilawil te ayon ta tulan wokole. Teme maba chʼayemon ta awoʼtan sok teme ayon ta awoʼtan te j-abaton awuʼune, soknix teme ya awakʼbon jtul jkerem-al, yame kakʼbat ta atojol Jehová swenta ya x-abatin ta atojol te jayeb kʼajkʼal kuxul ta kʼinale. Jaʼnix jich, maʼyuk bin-ora ya yichʼ setʼbeyel te stsotsel sjole».
12 Te kʼalal jalajix te Ana ta skʼoponel te Jehová, te Elí yak ta yilel te bitʼil yak ta stijel te stiʼil yee.
13 Te Ana yak ta skʼoponel Dios ta yoʼtan. Yak ta nijkel te stiʼil yee, pero ma chikan te bin yak ta yalele. Jaʼ yuʼun, te Elí la skuy te yakuben te Ana.
14 Jaʼ yuʼun, te Elí jich la yalbey: «¿Binto-ora ya awijkitay te yakubele? Ijkitayaix te yuchʼel te vinoe».
15 Jich la yal te Ana: «¡Maʼuk, kajwal! Maba kuchʼoj vino sok maʼyuk kuchʼoj yantik uchʼbalil te ya xyakubteswan. Ayon ta tulan mel-oʼtan,* jaʼ yuʼun yakon ta sjambeyel koʼtan te Jehová.
16 Mame jichuk xa awilon te maʼyuk jkʼoplale. Te bitʼil jich yakon ta kʼop* ya awile, jaʼ ta skaj te kʼax bayal ayon ta mel-oʼtan sok kʼax bayal jwokol».
17 Jich albot yuʼun te Elí: «Lamalukme awoʼtan ya xbaat sok akʼame yakʼbat te Dios yuʼun Israel te bin la akʼanbeye».
18 Jich la yal te Ana: «Spisiluk-ora lek jkʼoplal ta atojol». Jich sujt bael te Ana, weʼ uchʼaj sok chʼay te mel-oʼtan ta sit yelawe.
19 Ta yan kʼajkʼal, buen sab jajchik sok la snijan sbaik ta stojol te Jehová, tey-abi sujtik bael ta snaik ta Ramá. Te Elcaná la sjokin ta wayel te Ana te yiname, jich te Jehová jul ta yoʼtan te Ana.
20 La yikʼ yal ta schʼujt te Ana, te k’alal mato sta jun jaʼbil-ae,* ayin* jtul chʼin kerem yuʼun. La yakʼbey sbiilin Samuel,* melel jich la yal: «Jaʼ Jehová te machʼa la jkʼanbeye».
21 Ta patil, te Elcaná mo bael sok spisil te machʼatik ay yuʼun ta sna ta yakʼbeyel te Jehová te milbil majtanil te ya yichʼ akʼel ta jujun jaʼbil soknix te majtanil ta swenta te bin jamal la yal ta stojol te Diose.
22 Pero maba mo bael stukel te Ana, melel jich la yalbey te smamalal: «Te kʼalal maba ya kakʼbeyix schuʼ-a te chʼin kereme, yame kikʼ bael swenta ya kakʼ ta stojol te Jehová sok teyme ya xjilix-a».
23 Jich albot yuʼun te Elcaná te smamalal: «Pasa te bin lek ya awile. Jilan liʼi jaʼto te kʼalal ya awijkitaybey te schuʼe. Akʼa kʼotuk ta pasel yuʼun te Jehová te bin la awalbeye». Jich jil ta sna te Ana, jaʼto te kʼalal la yijkitay ta yakʼbeyel schuʼ te schʼin kereme.
24 Te k’alal la yijkitay ta yakʼbeyel schuʼ te schʼin kereme, la yikʼ bael ta Siló. Jaʼnix jich la yikʼ bael jkojt toro te oxeb jaʼbil yaʼbilal, la yichʼ bael jun efá* yuʼun harina sok jun mukʼul jarra yuʼun vino. Yikʼoj kʼoel te schʼin kerem ta sna te Jehová ta Siló.
25 Tey-abi la smilik te toro sok la yikʼik bael te chʼin kerem ta stojol te Elí.
26 Te Ana jich la yalbey te Elí: «¡Kajwal, pasbon perdón! Kajwal, jamal ya kalbat te joʼonme te ants te ay ta atsʼeel-a te yak ta skʼoponel-a te Jehová.
27 La jkʼopon te Jehová yuʼun la jkʼanbey te chʼin kerem ini, jich la yakʼbon te bin la jkʼanbeye.
28 Jaʼ yuʼun, ta ora ini ya kakʼbey* te Jehová. Te jayeb kʼajkʼal kuxul ta kʼinale jaʼme yuʼun ya xkʼot te Jehová».
Jich la snijan sba* ta stojol te Jehová.
Notaetik
^ O «ta Ramá, jaʼ jtul zufita-winik».
^ O «snijan sba ta stojol».
^ Jaʼ skʼoplal te chʼul-abatetik ta chʼulchan.
^ Jaʼ skʼoplal te nailpakʼ templo.
^ Jaʼ skʼoplal te chʼul-abatetik ta chʼulchan.
^ O «Spichʼoj sba koʼtan».
^ Ta yantik variante «aʼiyej».
^ O jaʼniwan ya skʼan ya yal «te k’alal la sta yoraile».
^ Ta yantik variante «pʼejkaj», «tojk».
^ Te ya sk’an ya yal «sbiil te Dios».
^ Jaʼniwan 22 litro. Ilawil ta apéndice, B14.
^ Ta hebreo: «kakʼbey smajan».
^ Jich yilel te jaʼ skʼoplal te Elcaná.
