1 Samuel 10:1-27
10 Te Samuel la stsak tal te yawil aceite sok la smalbey ta sjol te Saúl. La yujtsʼuy* sok jich la yalbey: «La stsaatix te Jehová yuʼun ya x-ochat ta jwolwanej ta lum yuʼun.
2 Yoʼtik, te kʼalal ya awijkitayone sok te kʼalal ya xkʼaxat ta nopol* smukenal te Raquel te ay ta skʼinal Benjamín ta Zelzá, yame ata chaʼtul winiketik. Jichme ya yalbat: ‹Te meʼ burraetik te yakat ta sleel-ae, la staikix. Ta ora ini, te atate, ma jaʼuk ya smelix yoʼtan yuʼun te meʼ burraetik, jaʼ ya smelix yoʼtan ta atojolik sok jich yak ta yalel: «¿Bin ya jpas yuʼun ya jta-a te jkereme?»›.
3 Tojme ya xkʼaxat bael jaʼto te kʼalal ya xkʼoat ta mukʼul teʼ te ay ta Tabor. Teyme ya ata oxtul winiketik te yakik ta moel bael ta Betel yuʼun ya xbajt yichʼik ta mukʼ te smelelil Diose.* Te jtule yikʼoj oxkojt jkolel* tat tentsunetik, te schebale yichʼoj oxpejch pan, te yoxebale yichʼoj jun mukʼul jarra yuʼun vino.
4 Yame sjojkʼoyik te bin awilel sok yame yakʼbat chaʼpejch pan te winiketike. Tsakame.
5 Ta patil yame xkʼoat ta chʼin wits yuʼun te smelelil Dios* sok yame awil jtsojb soldadoetik yuʼun filisteoetik tey-a. Te kʼalal ya xkʼoat ta mukʼul lum, yame awil jtsojb j-alwanejetik te yakik ta koel tal ta toyol awilal.* Jichme yakik ta kʼop te bin-utʼil ya xkʼopoj te j-alwanejetik sok ayme machʼatik nailajem ta stojolik te yakik ta stijel aʼtejibal yuʼun música te ay scuerdail, yakikme ta stijel pandereta, yakikme ta yokʼesinel amay* sok yakikme ta stijel arpa.
6 Yame yakʼbat awip te espíritu yuʼun te Jehová, yame ajokinlan bael sok jichme ya xkʼopojat te bin-utʼil ya xkʼopoj te j-alwanejetike. Yanatme ta winikil ya xkʼoat-a.
7 Te kʼalal kʼoemix ta pasel spisil-a te bin la kalbate, pasa spisil te bin ya skʼan awoʼtan ya apase, melel sjokinojat te smelelil Diose.*
8 Tey-abi yame xnailajat koel kuʼun ta Guilgal. Teyme ya jta jbatik-a yuʼun ya kakʼtik chikʼbil majtaniletik sok milbil majtaniletik ta swenta lamalkʼinal. Maliyawon jukeb kʼajkʼal jaʼto te kʼalal ya xkʼoone, tey-abi yame kalbat te bin ya skʼan ya apase».
9 Jaʼnax te kʼalal la sut sba te Saúl yuʼun ya yijkitayix-a te Samuel, te Diose la sjelbey te yoʼtan yuʼun yan ta winikil ya xkʼot-a, ta kʼajkʼal-abi kʼot ta pasel spisil te bin la yichʼ albeyele.
10 Te kʼalal kʼotik ta banti chʼin wits, tey la sta sbaik sok-a te jtsojb j-alwanejetike. Ta yorail-abi akʼbot yip yuʼun te espíritu yuʼun te Diose, jich jajch yal albilkʼopetik ta yolil te j-alwanejetik.
11 Te machʼatik ya snaʼbeyik sba-a te Saúl, jich talel kʼaxel la yalbey sbaik te kʼalal la yilik te sjokinlanoj te j-alwanejetik sok te jich yak ta kʼop-euk te bin-utʼil ya xkʼopoj te j-alwanejetike: «¿Bin la spas te snichʼan Quis? ¿Yuʼunbal j-alwanejix-euk te Saule?».
12 Ay jtul winik te jich la yal te tey ay-ae: «¿Machʼatik snichʼnab te yantik j-alwanejetike?». Jaʼ yuʼun, jich jil te kʼop ini «¿Yuʼunbal j-alwanejix-euk te Saule?».
13 Te kʼalal laj yoʼtan ta kʼop jich te bin-utʼil ya xkʼopoj te j-alwanejetike, mo bael ta toyol awilal.*
14 Tey-abi, te stajun* te Saúl jich la sjojkʼoybey te Saúl sok te j-abat yuʼune: «¿Banti kʼoex?». Jich la yal te Saúl: «Jaʼ kʼot jletik te meʼ burraetik, pero te bitʼil maba la jtatike, bajt kiltik te Samuel».
15 Jich jojkʼoybotik yuʼun te stajun* te Saúl: «¿Bin la yalbeyex te Samuel? Cholbonik kaʼiy, awokoluk».
16 Te Saúl jich la yalbey te stajune:* «La yalbonkotik te la yichʼix tael te meʼ burraetike». Pero maba la yalbey jpʼaluk te stajun te albot yuʼun te Samuel te ya x-och ta ajwalile.
17 Jich yuʼun, te Samuel la stsob tal te lum Israel ta stojol te Jehová ta Mizpá
18 sok jich la yalbey te israeletik: «Jich ya yal te Jehová te Dios yuʼun Israel: ‹Joʼon te la jlokʼes tal ta Egipto te lum Israel sok joʼon te la jlokʼes tal ta skʼab te egipcioetik soknix ta skʼab spisil te ajwaliletik te akʼbot swokolik yuʼune.
19 Pero, ta ora ini la apʼajonikix joʼon te Dioson awuʼunik te Jkoltaywanejon awuʼunik, joʼon te la jkoltayex lokʼel ta spisil te bintik ma lek soknix ta swenta te awokolike. Jich la awalik: «¡Maʼyuk bin ya spas! Lea jtul ajwalil yuʼun ya swentainotik». Jich yuʼun, ta ora ini tejkʼana abaik ta alugarik ta stojol te Jehová ta jujunchajp tsʼumbaliletik sok ta jujun familia ta jujuntsojb ta mil›».
20 Jich yuʼun, te Samuel la yakʼ noptsajuk* tal spisil te stsʼumbal Israel, te machʼa la yichʼ tsaele jaʼ te stsʼumbal Benjamín.
21 Jich yuʼun la yakʼ noptsajuk* tal ta jujun familia te stsʼumbal Benjamín. Te familia te la yichʼ tsaele jaʼ te matritaetik. Tey-abi, te machʼa la yichʼ tsael jaʼ te Saúl snichʼan Quis. La sleik, pero maba la staik.
22 Jich yuʼun la sjojkʼoybeyik te Jehová: «¿Liʼbal ay te winik-abi?». Jich albotik yuʼun te Jehová: «Tey, tey snakʼoj sba te banti ay te ijkatsil».
23 Jich bajtik ta animal sok la slokʼesik tal te banti snakʼoj sbae. Te kʼalal la stejkʼan sba te Saúl ta yolil te lume, la yilik te kʼax najt te maʼyuk machʼa ya xjelaw kʼaxel ta snejkʼel.
24 Te Samuel jich la yalbey te lum: «¡Ilawilik te machʼa la stsa te Jehová! Maʼyuk machʼa pajal sok ta spisil te lum Israel». Jich awunik ta spisilik: «¡Jal akʼa kuxinuk te ajwalil!».
25 Jich yuʼun, te Samuel la yalbey te lum te bintik-a te sderecho te ajwaliletike, la stsʼibay ta jun libro sok la yakʼ ta stojol Jehová te libro-abi. Ta patil la stikunlan sujtel ta snaik ta spisilik.
26 Jaʼnix jich, te Saúl sujt bael ta sna ta Guibeá, sok jokinotik bael yuʼun te soldadoetik te tijbilix yoʼtanik yuʼun-a te Jehová.
27 Pero, jich la yalik chaʼoxtul winiketik te ma xtuunike: «¿Yuʼun-nixbal ya xjuʼ ya skoltayotik-a te winik ini?». La spʼajik sok maba la yichʼbeyik bael smajtan. Pero, maʼyuk bin la yal* yuʼun te Saule.
Notaetik
^ Ta yantik variante «sbujtsʼi».
^ Ta yantik variante «tijil».
^ Ta yantik variante «jchʼiel».
^ O «flauta».
^ O «stio».
^ O «stio».
^ O «stioe».
^ Ta yantik variante «jijtsʼajuk», «tijtsajuk».
^ Ta yantik variante «jijtsʼajuk», «tijtsajuk».
^ Ta hebreo: «jich te bin-utʼil umaʼ».
