1 Samuel 11:1-15
11 Te Nahás te ammonita-winik mo bael sok te swiniktak sok la spas scampamentoik swenta ya yakʼbeyik guerra te lum Jabés te ay ta Galaad. Spisil te winiketik yuʼun Jabés jich la yalbeyik te Nahás: «Ak’a jchap jkʼoptik yuʼun jich ya kakʼ jbatik ta abatinel ta atojol».
2 Jich la yal te Nahás te ammonita-winik: «Ya jchap jkʼop sok jaʼex jaʼnax teme ya achʼuunik spasel te bin ya kale: jaʼ te ya jlokʼesbeyex ta apisilik te swaʼel asitik. Jichme ya jkʼexlaltes te lum Israel».
3 Jich la yalik te jwolwanejetik yuʼun te lum Jabés: «Akʼbonkotik jukeb kʼajkʼal yuʼun ya jtikuntik ta alel ta spamal skʼinal Israel. Teme maʼyuk machʼa tal skoltayotike, yame kakʼ jbatik ta akʼab».
4 Te kʼalal kʼotik ta Guibeá te machʼatik yichʼojik bael te kʼope, jaʼ te banti ay ta nainel te Saúl, la yalbeyik yaʼiy te yajwalul te lum te bin la yichʼ alel, jich jajchik ta tulan okʼel ta spisilik.
5 Ta yorail-abi, te Saúl yak ta sujtel tal ta skʼinal, smakoj tal te wakaxetik yuʼun. Jich la sjojkʼoy: «¿Bin la spas te jlumaltike? ¿Bin yuʼun te spisil yakik ta okʼele?». Jich la scholbeyik yaʼiy te bin la yalik te winiketik yuʼun Jabés.
6 Te kʼalal la yaʼiy stojol te Saúl, akʼbot bayal yip yuʼun te espíritu yuʼun te Dios sok kʼaxto bayal ilin yuʼun.
7 Jich yuʼun la stsak chaʼkojt toroetik, la sesenlan sok la yakʼtiklanbey bael te machʼatik kʼot yalik te kʼop swenta ya spuktiklanik ta spamal skʼinal Israel, jich yakik ta yalel bael: «¡Jichme ya yichʼ sesenbeyel swakax te machʼa ma stʼun te Saúl sok te Samuel!». Jich te Jehová la yakʼ ochuk xiwel ta yoʼtan te lume, jun-nax la syom sbaik ta spisilik.
8 Te kʼalal la yajtay te swiniktak te Saúl ta Bézec, la stsob sba 300 mil ta tul israeletik sok 30 mil ta tul winiketik yuʼun Judá.
9 Jich la yalbeyik bael te machʼatik yichʼoj tal te kʼope: «Jichme xa awalbeyik te winiketik yuʼun Jabés ta Galaad: ‹Pajel, te kʼalal kʼuxix-a te kʼajkʼale, yame jkoltayexkotik›». Jich sujtik bael te machʼatik yichʼojik tal te kʼope sok kʼot yalbeyik yaʼiy te winiketik yuʼun Jabés te bin la yichʼik albeyel baele, jich kʼax tseʼelnax yoʼtanik yuʼun.
10 Jich yuʼun, te winiketik yuʼun Jabés jich la yalbeyik te ammonitaetik: «Pajel, yame kakʼ jbakotik ta akʼabik sok pasaik te bin lek ya awilike».
11 Ta yan kʼajkʼal, te Saúl oxtsojb la slokʼes-a te swiniktak. Te kʼalal yakix ta sakubel-a te kʼinale,* la sjam ochel sbeik kʼalalto ta yolil te scampamentoik te ammonitaetik, yakik ta smilel-a te ammonitaetik jaʼto te kʼalal kʼuxix-a te kʼajkʼale. Te machʼatik kolik jilel, anik bael sok ta jujuntul bajtik.
12 Te ants winiketik jich la yalbeyik te Samuel: «¿Machʼatik-a te la yalik te ma skʼanik te ya x-och ta ajwalil kuʼuntik te Saúl? Akʼbotik ta jkʼabtik yuʼun ya jmiltik».
13 Pero, jich la yal te Saúl: «Yoʼtik, mame xyichʼ milel ni jtuluk winik, melel ta ora ini te Jehová la skoltay te lum Israel».
14 Ta patil, te Samuel jich la yalbey te lume: «Konik ta Guilgal yuʼun ya kakʼtikxan ta naʼel te jaʼ ajwalil te Saule».
15 Jich bajtik ta Guilgal spisil te lume, tey la yotsesik ta ajwalil-a te Saúl ta stojol te Jehová. Tey-abi, la yakʼbeyik milbil majtaniletik ta swenta lamalkʼinal te Jehová, jich tseʼelnax yoʼtanik la spasik kʼin te Saúl sok spisil te israeletik.
Notaetik
^ Jaʼ smakojbey skʼoplal ta cheb ora sakubel kʼinal jaʼto kʼalal ta wakeb ora ta sab.
