1 Samuel 12:1-25
12 Ta slajibal, te Samuel jich la yalbey te lum Israel: «La jpas* spisil te bin la akʼanbonike sok la kakʼbeyex jtul ajwalil yuʼun ya swentainex.
2 ¡Liʼme ay te ajwalil te ya xnailaj bael ta atojolik! Te joʼone mamalonix sok sakix jol, jaʼnix jich ay ta awolilik te jnichʼnab. Joʼon te jwentainojex tal ta jkeremilto jaʼto ta ora ini.
3 Ta ora ini, liʼ ayon ta atojolik. ¿Aybal bin-ora ay machʼa jpojojbey jkojt storo o jkojt sburro? ¿Aybal machʼa jloʼlayoj o kakʼojbey swokol? ¿Aybal machʼa la jtsakbey stakʼin yuʼun la jmukbey te smule? Teme ay jich jpasoje, albonik te jmul ta stojol te Jehová sok ta stojol te machʼa tsabil yuʼune sok joʼon-nixme ya sujtesbeyex».
4 Jich la yal te lum: «Maʼyuk bin-ora aloʼlayojotik sok maʼyuk awakʼoj jwokoltik. Maʼyuk machʼa atsakojbey stakʼin yuʼun la amukbey smul».
5 Te Samuel jich la yal: «Jaʼ yuʼun, ta ora ini jaʼme testigo awuʼunik te Jehová sok te machʼa tsabil yuʼun te maʼyuk la atabonik jmule».* Jich la yal te lum: «Jich, jaʼ testigo kuʼuntik».
6 Te Samuel jich la yalbey te lum: «Te Jehová, jaʼme testigo ta swenta ini, jaʼ te machʼa la stuuntes te Moisés sok te Aarón sok te la slokʼes tal ta Egipto te antiguo ameʼ atatike.
7 Jich yuʼun, ta ora ini tejkʼana abaik ta alugarik yuʼun ya jchajpanex ta stojol te Jehová sok yame jultesbeyex ta awoʼtanik spisil te bintik lek spasoj te Jehová ta atojolik soknix ta stojol te antiguo ameʼ atatike.
8 »Te kʼalal bajt ta Egipto te Jacob sok te kʼalal la skʼanbeyik koltayel te Jehová te antiguo ameʼ atatik, te Jehová la stikun te Moisés sok te Aaron swenta la slokʼeslan tal ta Egipto sok la yakʼ nainukik liʼi.
9 Pero, te antiguo ameʼ atatik la yijkitayik te Jehová te Dios yuʼunike, jaʼ yuʼun la yakʼtiklan* jilel ta skʼab te Sísara, jaʼ te capitán yuʼun te soldadoetik yuʼun te Hazor. Jaʼnix jich la yakʼtiklan jilel ta skʼab te filisteoetik soknix ta skʼab te ajwalil yuʼun Moab, jaʼik te machʼatik la yakʼik guerra soke.
10 Jaʼ yuʼun la skʼanbeyik koltayel te Jehová, jich la yalik: ‹Jtaoj jmultik ta atojol, Jehová, melel la kijkitayatkotik sok la kichʼtik ta mukʼ te Baaletik soknix te lokʼombaetik yuʼun Astoret. Pero, ta ora ini koltayawotik lokʼel ta skʼab te jkontrataktik swenta jich ya kichʼatkotik ta mukʼ›.
11 Jich yuʼun, te Jehová la stikun te Jerubaal, Bedán, Jefté sok te Samuel yuʼun ya skoltayex lokʼel ta skʼab te akontratakik te sjoytayojex swenta jun awoʼtan ya xnainex-a.
12 Pero, te kʼalal la awilik te tal yakʼbeyex guerra te Nahás, te ajwalil yuʼun te ammonitaetik, bayal buelta la akʼanbonik ‹¡Ya jkʼantik jtul ajwalil!›, manchukme anaʼojik te jaʼ Ajwalil awuʼunik te Jehová te Dios awuʼunik.
13 Jich yuʼun liʼ ay te ajwalil te la atsaike sok te la akʼanike. ¡Ilawilik! Te Jehová la yakʼbeyex jtul ajwalil.
14 Teme ya axiʼik* te Jehová, teme ya awakʼ abaik ta abatinel ta stojol sok teme ya achʼuunbeyik te skʼop, teme maba ya atoy abaik ta swenta te smantal te Jehová, teme ya atʼunik te Jehová te Dios awuʼunik sok teme jich ya spas-euk te ajwalil awuʼunike, lekme ya xbajt te akuxlejalike.
15 Pero, teme maba ya achʼuunbeyik te skʼop te Jehová sok teme ya atoy abaik ta swenta te smantal te Jehová, te skʼab te Jehová yame yakʼbeyex castigo sok te ameʼ atatike.
16 Jich yuʼun tejkʼana abaik ta alugarik sok ilawilik te bin chajpnax ya xbajt spas ta atojolik te Jehová.
17 ¿Mabal jaʼuk yorail te stsobel te trigoe? Ya jkʼanbey te Jehová te ya yakʼ tʼomuk chawuk sok te ya yakʼ xtal jaʼal. Jichme ya anaʼik sok yame xkʼot ta awoʼtanik te kʼax chopol* te bintik la apasik ta stojol te Jehová te kʼalal la akʼanik jtul ajwalil».
18 Tey-abi, te Samuel la skʼanbey bayal wokol te Jehová, jich la yakʼ tʼomuk chawuk te Jehová sok la yakʼ taluk jaʼal ta kʼajkʼal-abi. Jich yuʼun, spisil te lume bayal la xiʼik* te Jehová sok te Samuel.
19 Ta spisil te lum jich la yalbeyik te Samuel: «Kʼopona te Jehová te Dios awuʼun ta jtojolkotik, te j-abatotik awuʼune, melel ma jkʼan ya xlajotik sok jaʼ jmultikxan kʼot te kʼalal la jkʼantik jtul ajwalil».
20 Te Samuel jich la yalbey te lum: «Mame xiwex. Melelnix-a te apasojik spisil te bintik chopol* ini. Pero, ta ora ini mame xa awijkitayik stʼunel te Jehová. Akʼa abaik ta abatinel ta stojol te Jehová sok spisil awoʼtanik.
21 Mame xa awijkitayik te Dios ta swentanax sleel te bintik maʼyuk skʼoplal te jkʼaxel ma xtuunik sok te ma xjuʼ ya xkoltaywane, melel jkʼaxel maʼyuk skʼoplal.
22 Ta swenta te smuk’ul biile, te Jehová maba ya yijkitay te lum yuʼune. Melel te Jehová yalojix te jaʼ lum ya xkʼoex yuʼune.
23 Jaʼnix jich, te joʼone ma xjuʼ ya kijkitay skʼoponel Dios ta atojolik. Te yakuk kijkitay spasele, ya jta jmul ta stojol te Jehová. Yame kakʼbeyex awilik te lekil be sok te stojile.
24 Pero, te jaʼexe xiʼaikme* te Jehová. Junukme awoʼtanik* ya x-abatinex ta stojol sok ta spisil awoʼtanik. Jultesa ta awoʼtanik te chajp aʼteliletik te la spas ta atojolike.
25 Yan teme jaʼ ya apasik te bin ma lek sok teme jich ya spas-euk te ajwalil awuʼunike, yame awichʼik lajinel».
Notaetik
^ Ta hebreo: «La kaʼiybeyex akʼopik ta swenta».
^ Ta hebreo: «maʼyuk bin la atabonik ta jkʼab».
^ Ta hebreo: «chonotik».
^ Ta yantik variante «ma lek».
^ Ta yantik variante «ma lek».
^ O «Smelelilukme».
