1 Samuel 13:1-23
13 Te Saúl ay [?]* yaʼbilal-a te kʼalal och ta ajwalil sok cheb jaʼbil wentainwan ta lum Israel.
2 Te Saúl la stsa 3 mil ta tul winiketik yuʼun Israel. Ay 2 mil ta tul te sjokinojik te Saúl ta Micmash sok ta witstikil yuʼun Betel, te jmilxan ta tul jaʼ sjokinojik te Jonatán ta Guibeá te ay ta skʼinal Benjamín. Te jayebxan ta tul jile la stikunlan sujtel ta snaik.*
3 Tey-abi, te Jonatán la stsal te jtsojb soldadoetik yuʼun te filisteoetik te ayik ta Gueba, jich te filisteoetik la yaʼiyik stojol te bin kʼot ta pasele. Te Saúl la yakʼ ta okʼesinel te xulubil ta spamal te kʼinal sok jich la stikun ta alel: «¡Akʼa yaʼiyik stojol ini te hebreoetik!».
4 Spisil te lum Israel la yaʼiy stojol te bin la yichʼ alele: «Te Saúl la stsal jtsojb soldadoetik yuʼun te filisteoetik, jich te filisteoetik kʼax maba lek la yilikix-a te lum Israel». Jich yuʼun la yichʼ ikʼel tal te winiketik swenta ya stsob sbaik sok te Saúl ta Guilgal.
5 Te filisteoetik jaʼnix jich la stsob sbaik yuʼun ya yakʼbeyik guerra te Israel. Ay 30 mil ta kojt scarretaik yuʼun guerra, ay 6 mil ta tul winiketik te kajajtik ta caballoetik sok kʼax bayalik ta tul soldadoetik yuʼunik te jichik yilel te bin-utʼil sjiʼal te stiʼil te mare. Te filisteoetik moik bael ta Micmash te ay ta slokʼib kʼajkʼal yuʼun Bet-Aven sok tey la spas scampamentoik-a.
6 Te winiketik yuʼun Israel la yil swokolik ta skaj te tal ta akʼbeyel guerra yuʼun te skontratakike. Jich yuʼun la snakʼ sbaik ta yutil chʼentikil, ta tonetik te jutajtik, ta tonetik te japajtik, ta yeʼtal lum te pasbil yuʼunik sok ta pozoetik.
7 Ay chaʼoxtul hebreoetik te kʼaxik bael ta jejch mukʼul jaʼ Jordán ta skʼinal Gat sok ta skʼinal Galaad. Pero, te Saúl ayto ta Guilgal stukel-a, sok ayik ta nijkel spisil te machʼatik jilik sok te Saule.
8 Te Saúl la smaliy jukeb kʼajkʼal jaʼto te kʼalal tsʼakaj te skʼajkʼalel te albil yuʼun te Samuele. Pero, te Samuel mato xkʼot ta Guilgal-a, jich yuʼun jajchik ta bael te swiniktake.
9 Ta patil, jich la yal te Saúl: «Ikʼbonik tal te chambalametik te ya yichʼ akʼel ta chikʼbil majtanil sok te ya yichʼ akʼel ta milbil majtaniletik ta swenta lamalkʼinal». Jich jajch yakʼ te chikʼbil majtanile.
10 Pero, jaʼnax te kʼalal laj yoʼtan ta yakʼel te chikʼbil majtanil, kʼot te Samuel. Jich te Saúl lokʼ sta yuʼun ya spatbey yoʼtan.*
11 Te Samuel jich la yalbey te Saúl: «¿Bin-a te la apase?». Jich la yal te Saúl: «La kil te jajch yijkitayonik te jwiniktake sok maba julat-a te bin skʼajkʼalel awaloje sok yakix ta stsobel sbaik-a te filisteoetik ta Micmash.
12 Jich la jnop: ‹Ya xkoik tal te filisteoetik ta Guilgal yuʼun ya yakʼbonik guerra, pero te joʼone maba jkʼanojbey koltayel te Jehová›. Jich yuʼun tenbil la kaʼiy jba ta yakʼel te chikʼbil majtanile».
13 Te Samuel jich la yalbey te Saúl: «Ma xa ana’ te bin la apase. Maba achʼuunoj te mantalil yakʼojbat te Jehová te Dios awuʼune. Te lajuk achʼuun te mantale, te Jehová la yakʼbey yip te wentainel awuʼun ta Israel ta sbajtelkʼinal te jichuke.
14 Jich yuʼun, te wentainel awuʼune maba ya xjalaj. Te Jehová yame sle jtul winik te lek yoʼtan yuʼune. Te Jehová yame yakʼ ta jwolwanej ta lum yuʼun te winik-abi, melel te jaʼate maba la achʼuun spasel te bin la yalbat ta mantal te Jehovae».
15 Jich yuʼun, te Samuel lokʼ bael ta Guilgal sok mo bael ta Guibeá te ay ta skʼinal Benjamín. Te Saúl la yajtay te jayebxan ta tul winiketik jokinbil yuʼun, ayniwan 600 ta tul.
16 Te Saúl sok te snichʼan, jaʼ te Jonatán soknix te winiketik te jokinbilikto yuʼune jilik ta Gueba te ay ta skʼinal Benjamín. Yan stukel te filisteoetik spasojik scampamentoik ta Micmash.
17 Ta campamento yuʼun te filisteoetik lokʼik bael oxtsojb soldadoetik. Te jtsojbe bajt ta sbelal Ofrá te ay bael ta skʼinal Sual,
18 te schebale bajt ta sbelal Bet-Horón, te yoxebale bajt ta stiʼil kʼinal te banti ya xchiknaj ta ilel te spamlej yuʼun Zeboím te ay bael ta stojol jochol takin kʼinal.
19 Ta yorail-abi, ta spamal skʼinal Israel maʼyuk machʼa ya x-aʼtej sok-a te tulan takʼinetik, melel jich la yalik te filisteoetik: «Mame xkakʼtik te ya spasik ni junuk yespadaik sok ni junuk slanzaik te hebreoetike».
20 Jich yuʼun, spisil te israeletik yananix skʼan xkoik tal-a te banti ay te filisteoetik yuʼun ya yakʼik ta juxbeyel ye te sjokʼojibal lum yuʼunik, te spicoik, yechejik sok te hocetik yuʼunike.
21 Ya skʼan ya stojik jun pim* yuʼun ya yakʼik ta juxbeyel ye te sjokʼojibal lum yuʼunik, te spicoik, yechejik, te yaʼtejibik te oxchʼix sniʼ sok te teʼ te ay sniʼ te ya xtuun yuʼunik ta stijel swakaxik.
22 Ta skʼajkʼalel te bajtik ta yakʼel guerra te winiketik te sjokinojik te Saúl sok te Jonatán maʼyuk yespadaik ni jaʼuk slanzaik. Jaʼnax te Saúl sok te snichʼan, jaʼ te Jonatán, ay yaʼtejibik yuʼun guerra.
23 Ay jtsojb soldadoetik yuʼun te filisteoetik kʼaxik ta banti chujkul be yuʼun Micmash.
Notaetik
^ Ta namey junetik te la yichʼ tsʼibayel ta hebreo kʼop maba chikan tey-a te jayeb yaʼbilale.
^ Ta hebreo: «ta snailpakʼik».
^ Ta hebreo: «ya yakʼbey bendición».
^ Jaʼ jich sbiil te kʼalal ay bin ya yichʼ pʼisel ta namey kʼinal te jaʼniwan 7.8 gramo. Ilawil ta apéndice, B14.
