1 Samuel 15:1-35
15 Te Samuel jich la yalbey te Saúl: «Te Jehová la stikunon yuʼun la kotsesat ta ajwalil ta Israel ta lum yuʼun. Jaʼ yuʼun, ta ora ini chʼama awaʼiy te bin ya yalbat te Jehová.
2 Jaʼ ini te bin ya yal te Jehová te jwolwanej yuʼun te soldadoetike:* ‹Yame kakʼbey stoj te amalequitaetik ta swenta te bin la spasbeyik te lum Israel, jaʼ te la skontrainik te israeletik te kʼalal lokʼik tal ta Egipto.
3 Jaʼ yuʼun baan, miltiklana te amalequitaetik. Lajinbeya skʼoplalik sok spisil te bintik ay yuʼunike. Mame ayuk machʼa kuxul ya awijkitay.* Mila te winiketik sok te antsetik, te chʼin achʼix keremetik sok te alaletik, te toroetik sok te tuminchijetik, te camelloetik sok te burroetik›».
4 Jich yuʼun, te Saúl la stsob tal te soldadoetik sok la yajtay te winiketik ta Telaim. Ay 200 mil ta tul soldadoetik sok 10 mil ta tul winiketik yuʼun Judá.
5 Te Saúl kʼot kʼalal ta mukʼul lum Amalec sok la snakʼ sbaik ta nopol* spamlej.
6 Jich yuʼun, te Saúl jich la yalbey te quenitaetik: «Baanik, lokʼanik bael ta yolil te amalequitaetik swenta maba ya jmilex-euk. Melel te kʼalal lokʼik tal ta Egipto te israeletik, la awakʼbeyik yil te kʼuxul oʼtanil te ma x-ijkitaywan». Jich te quenitaetik lokʼik bael ta yolil te amalequitaetike.
7 Tey-abi, te Saúl jajch smiltiklan te amalequitaetik ta Havilá jaʼto te kʼalal kʼotik ta Sur te ay ta stsʼeel te Egipto.
8 Spisil la smiltiklan ta espada te ants winiketike, pero kuxul la stsak bael te Agag te ajwalil yuʼun Amalec.
9 Te Saúl sok te swiniktak maba la smilik te Agag, maba la smilik te lekil tuminchijetik sok te wakaxetik, te jujpʼen chambalametik soknix te tat tuminchijetik, maba la slajinik spisil te bintik lekike. Maba la skʼan la slajinik spisil-abi. Pero, spisil te bintik ma xtuun yuʼunik sok te maʼyuk skʼoplal ta yoʼtanike la slajinbeyik skʼoplal.
10 Jich yuʼun, te Jehová jich la yalbey te Samuel:
11 «Bayal ya jmel ko’tan yuʼun te la kotses ta ajwalil te Saúl, melel la yijkitayonix sok maba schʼuunojbon te jkʼope». Te Samuel bayal la smel yoʼtan sok sjunal ajkʼabal la skʼanbey wokol te Jehová.
12 Ta buen sab ta yan kʼajkʼal, te Samuel bajt yil te Saúl, pero jich la yichʼ albeyel: «Te Saúl bajt ta Carmelo sok tey la stejkʼan jun slokʼomba ta swenta snaʼojibal. Tey-abi bajt sok ko bael ta Guilgal».
13 Te kʼalal kʼot te Samuel te banti ay te Saúl, jich albot yuʼun te Saúl: «Akʼa yakʼbat bendición te Jehová. Lame jchʼuun spasel te bin la yal te Jehová».
14 Pero, te Samuel jich la sjojkʼoybey: «¿Bin yuʼun-nix-a te ya kaʼiy te xmeʼetik te wakaxetik sok te tuminchijetik?».
15 Jich la yal te Saúl: «Jaʼ yuʼunik-a te amalequitaetik. Melel te winiketik kuxul la yijkitayik te lekil tuminchijetik sok te wakaxetik swenta ya yakʼbeyik ta milbil majtanil te Jehová te Dios awuʼune. Pero, spisil te bintikxan ay tey-ae la jlajinbeytik skʼoplal».
16 Jaʼ yuʼun, te Samuel jich la yalbey te Saúl: «¡Chʼabanix! Ya kalbat awaʼiy te bin la yalbon ajkʼabey te Jehová». «Jichuk, albon kaʼiy», xchi te Saúl.
17 Jich albot yuʼun te Samuel: «¿Yatobal xjul ta awoʼtan te maʼyuk akʼoplal la awaʼiy aba te kʼalal ochat ta jwolwanej yuʼun te stsʼumbal Israel sok te kʼalal la stsaat ta ajwalil te Jehová ta stojol te lum Israel?
18 Ta patil, te Jehová ay bin la stikunat ta spasel sok jich la yalbat: ‹Lajinbeya skʼoplal spisil te jmulawil amalequitaetik. Akʼbeya guerra jaʼto te kʼalal ya alajinlan ta spisilike›.
19 Jich yuʼun, ¿bin yuʼun-nix-a te maba la achʼuunbey skʼop te Jehová? Te bin la apase, ¡jaʼ te oranax la apojbey te bintik ay yuʼun te akontrae sok la apas te bintik ma lek ya yil te Jehová!».
20 Pero, te Saúl jich la yalbey te Samuel: «¡Pero la jchʼuun te bin la yal ta mantal te Jehová! La jpas te bin la stikunon ta spasel te Jehová, la jlajinbey skʼoplal te amalequitaetik sok la kikʼ tal te Agag te ajwalil yuʼun Amalec.
21 Pero, te winiketik jaʼ la spojik tal te lekil tuminchijetik sok wakaxetik te albil skʼoplal te ya yichʼ lajinel swenta ya yakʼbeyik ta milbil majtanil ta stojol Jehová te Dios awuʼun ta Guilgal».
22 Jich albot yuʼun te Samuel: «¿Bin-a te lekxan yoʼtan yuʼun te Jehová: jaʼbal te chikʼbil majtaniletik sok te milbil majtaniletik, o jaʼbal te ya yichʼ chʼuunel te bin ya yal te Jehová? Ilawil: jaʼ lekxan ya yil te ya jchʼuunbeytik smantal ma jaʼuk te ya kakʼtik milbil majtanil sok jaʼ lekxan ya yil te ya jchʼuunbeytik skʼop ma jaʼuk te ya kakʼbeytik smajtanin te sjujpʼel* te tat tuminchijetike.
23 Melel te skʼaxuntayel mantal jaʼ kʼax tulan mulil jichnix te bitʼil naʼojel, te toybail jaʼ pajal sok te spasel magia sok te yichʼel ta mukʼ lokʼombaetik.* Ta skaj te la apʼajbey te skʼop te Jehová, jaʼnix jich ya spʼajat bitʼil ajwalil».
24 Jich yuʼun, te Saúl jich la yalbey te Samuel: «Jtaoj jmul. La jkʼaxuntaybey smantal te Jehová sok te bin la awalbone, melel la jxiʼ te winiketik, jaʼ yuʼun la jchʼuunbey te skʼopike.
25 Awokoluk, pasbon perdón yuʼun te jmule sok jokinawon bael yuʼun ya jnijan jba ta stojol te Jehová».
26 Pero, te Samuel jich la yalbey te Saúl: «Maba ya jokinat bael, melel la apʼajbey te skʼop te Jehová. Ta ora ini, te Jehová maba ya skʼanix te jaʼat ajwalilat ta lum Israel».
27 Te kʼalal la sut sba te Samuel yuʼun ya xbajtix-ae, te Saúl la stsakbey te stiʼil snajtil kʼuʼ te maʼyuk skʼabe, pero chʼiʼ* te skʼuʼe.
28 Ta swenta ini, te Samuel jich la yalbey te Saúl: «Jaʼme jich ya xkʼot ta pasel ta atojol-euk. Te Jehová yame spojbat te wentainel yuʼun te lum Israel. Jaʼme ya yotses ta ajwalil te machʼa jaʼ lekxan-a te bitʼil te jaʼate.
29 Jaʼnix jich, te Mukʼul Dios ta Israel yananix skʼotes ta pasel-a te bin ya yal sok ma sjel te bin ya snope, melel te Diose ma sjel te bin ya yal jich te bitʼil ya spas te ants winiketike».
30 Jich la yal te Saúl: «Melelnix-a, jtaoj jmul. Pero, awokoluk, akʼawon ta ichʼel ta mukʼ ta stojol te jwolwanejetik yuʼun te lum kuʼune sok ta stojol te lum Israel. Jokinawon bael, jich ya jnijan jba ta stojol te Jehová te Dios awuʼune».
31 Jich yuʼun, te Samuel sujt bael sok te Saúl, jich la snijan sba ta stojol Jehová te Saúl.
32 Jich la yal te Samuel: «Ikʼbonik tal te Agag te ajwalil yuʼun Amalec». Jich te Agag sujbil* noptsaj* bael ta stojol te Samuel, melel jich la snop ta yoʼtan: «Lajix te jwokole, maba ya smilonikix».
33 Pero, te Samuel jich la yalbey te Agag: «Jich bitʼil te bayal antsetik maʼyuk jilel yalatak ta skaj te la amiltiklan ta espadae, te anane* jaʼnix jich maʼyuk yalatak ya xjil». Te kʼalal lajnax yoʼtan ta yalel-abi te Samuel, la sesen te Agag ta stojol te Jehová ta Guilgal.
34 Te Samuel bajt ta Ramá. Te Saúl bajt ta sna te ay ta Guibeá.
35 Te jayebxan kʼajkʼal kuxin ta kʼinal* te Samuel maʼyuk bin-ora la yil te Saúl, pero kʼax bayal la smel yoʼtan ta stojol te Saúl. Te Jehová bayal la smel yoʼtan yuʼun te la yotses ta ajwalil te Saúl ta lum Israel.
Notaetik
^ Jaʼ skʼoplal te chʼul-abatetik ta chʼulchan.
^ O «Mame ayuk machʼa ya anaʼbey yoʼbolil sba».
^ Ta yantik variante «tijil».
^ Ta yantik variante «xepuil».
^ Ta hebreo: «terafim».
^ Ta yantik variante «xetʼ».
^ O jaʼniwan ya skʼan ya yal «sok smukʼul yoʼtan».
^ Ta yantik variante «jijtsʼaj», «tijtsaj».
^ Ta yantik variante «ameʼe», «amamae».
^ Ta hebreo: «Jaʼto te kʼalal laj».
