1 Samuel 16:1-23
16 Ta patil, te Jehová jich la yalbey te Samuel: «¿Jayebxan kʼajkʼal ya amel awoʼtan ta stojol te Saúl? ¿Yuʼunbal ma xa awil te la jpʼajix bitʼil ajwalil ta lum Israel? Nojesa ta aceite te xulubil sok baan te banti ya jtikunate. Ya jkʼan te ya xbajt awil te Jesé te betlemita-winik, melel la jtsaix jtul snichʼan yuʼun ya x-och ta ajwalil».
2 Pero, te Samuel jich la yal: «¿Bitʼil-a te ya xboone? Teme la snaʼ stojol te Saule, yame smilon». Jich albot yuʼun te Jehová: «Ikʼa bael jkojt jkolel* meʼ wakax sok jichme xa awal: ‹Talon ta yakʼbeyel milbil majtanil te Jehová›.
3 Ikʼa tal te Jesé te kʼalal ya awakʼ te milbil majtanile sok yame kalbat te bin ya skʼan ya apase. Yame amalbon aceite ta sjol te machʼa ya kalbate».
4 Jich la spas te Samuel te bin albot yuʼun te Jehová. Te kʼalal kʼot ta Belén sok te ilot yuʼun te jwolwanejetik yuʼun te mukʼul lume, jajchik ta nijkel yuʼun xiwel sok jich la sjojkʼoybeyik: «¿Swentabal lamalkʼinal te talate?».
5 Jich la yal te Samuel: «Jaʼ, swenta lamalkʼinal. Talon ta yakʼel milbil majtanil ta stojol te Jehová. Chʼultesa abaik swenta ya ajokinonik te kʼalal ya kakʼ te milbil majtanile». Jich yuʼun, te kʼalal schʼultesojix-a te Jesé sok te snichʼnab, la yikʼtiklan tal swenta te kʼalal ya yakʼ te milbil majtanil tey ayik-a.
6 Te kʼalal kʼotike, te Samuel la yil te Eliab sok jich la yal: «Jaʼ ini te machʼa stsaoj te Jehová».
7 Pero, te Jehová jich la yalbey te Samuel: «Mame jaʼuk xa awil te bin yilel ni jaʼuk te snajtile, melel ma jaʼuk jtsaoj. Te Dios ma jaʼuk ya yil te bin ya yil te ants winike. Te ants winike jaʼnax ya yil te bin chikan ta sit, yan stukel te Jehová jaʼ ya yil te oʼtanile».
8 Tey-abi, te Jesé la yikʼ tal te Abinadab sok la stejkʼan ta stojol te Samuel, pero jich la yal te Samuel: «Jaʼnix jich ini maba tsabil yuʼun te Jehová».
9 Ta patil, te Jesé la stejkʼan te Samá ta stojol te Samuel, pero jich la yal te Samuel: «Jaʼnix jich maba tsabil yuʼun te Jehová».
10 Te Jesé la yakʼ kʼaxuk ta stojol te Samuel ta jujuntul te juktul snichʼnabe, pero te Samuel jich la yalbey te Jesé: «Maʼyuk jtuluk liʼi te tsabil yuʼun te Jehová».
11 Ta slajibal, te Samuel jich la sjojkʼoybey te Jesé: «¿Jaʼnaxbal anichʼnab ini?». Jich la yal: «Jaʼxanix ma talem te ijtsʼinale. Yak ta skanantayel te tuminchijetike». Jaʼ yuʼun, te Samuel jich la yalbey te Jesé: «Tikuna ta ikʼel, melel jaʼtome ya jnajkan jbatik ta weʼel-a teme jule».
12 Jich yuʼun la stikun ta ikʼel sok la yikʼik tal. Jaʼ jtul tsajal kerem, tʼujbilnax sbakʼ sit sok tʼujbil kerem. Jich la yal te Jehová: «¡Jaʼ ini! Malbeya aceite ta sjol».
13 Jich te Samuel la stsak tal te xulubil te yichʼoj aceite sok la smalbey ta sjol te David ta stojol te sbankiltake. Jaʼto tal ta kʼajkʼal-abi, te espíritu yuʼun te Jehová la yakʼbey bayal yip te David. Ta patil, te Samuel bajt ta Ramá.
14 Te Jehová la spojbey te Saúl te espíritu yuʼune sok la yakʼ chopol espíritu te Jehová ta stojol te Saúl yuʼun ya x-utsʼinbot yoʼtan.
15 Te j-abatetik yuʼun te Saúl jich la yalbeyik: «Jamal chikan ta ilel te la yakʼ jun chopol espíritu te Dios ta atojol yuʼun ya yutsʼinbat awoʼtan.
16 Awokoluk, kajwal, tikuna te j-abatetik awuʼun ini ta sleel jtul winik te ya snaʼ stijel ta lek te arpa. Jich te kʼalal ya yutsʼinbat awoʼtan te chopol espíritu te yakʼoj ta atojol te Diose, te winike jaʼme ya stij te arpa yuʼun jich ya xlekub kʼinal ya awaʼiy-a».
17 Jaʼ yuʼun, te Saúl jich la yalbey te j-abatetik yuʼun: «Jichuk, awokolukik, leaik tal jtul winik te ya snaʼ stijel ta lek te arpa sok ikʼbonik tal».
18 Ay jtul j-abat yuʼun te jich albot yuʼune: «Ay ya jnaʼbey sba jtul snichʼan te Jesé te betlemita-winik te ya snaʼ stijel ta lek te arpa, ay yip sok ma xiw ta yakʼel guerra. Jaʼnix jich ya snaʼ ta lek kʼop* sok jaʼ tʼujbil kerem soknix jokinbil yuʼun te Jehová».
19 Jich yuʼun, te Saúl jich la stikun ta albeyel te Jesé: «Tikunbon tal te David te anichʼan te yak ta skanantayel te tuminchijetike».
20 Jich yuʼun, te Jesé la yikʼ tal jkojt burro te la yakʼbey bael skuch pan, jun nujkul te yichʼoj vino sok jkojt jkolel* tat tentsun yuʼun la stikunbey bael te Saúl, jaʼ la yichʼ bael te David te snichʼane.
21 Jich bajt te David te banti ay te Saúl sok och ta abatinel ta stojol. Te Saúl kʼax kʼux la yaʼiy ta yoʼtan te David sok la yotses ta jkuch-aʼtejibal yuʼun guerra yuʼun.
22 Tey-abi, te Saúl jich la stikunbey ta albeyel te Jesé: «Awokoluk, akʼa te yakuk x-abatinxan ta jtojol te David, melel kʼax tseʼel koʼtan yuʼun».
23 Te kʼalal ya x-utsʼinbot yoʼtan te Saúl yuʼun te chopol espíritu te la yakʼ te Dios ta stojol, te David ya stsak tal te arpa yuʼun ya stij. Jich xkuxetnax kʼinal ya yaʼiy te Saúl sok leknax kʼinal ya yaʼiy yuʼun, jich ya xlokʼ ta stojol te chopol espiritue.
Notaetik
^ Ta yantik variante «jchʼiel».
^ Ta yantik variante «aʼiyej».
^ Ta yantik variante «jchʼiel».
