1 Samuel 18:1-30
18 Jaʼnax te kʼalal laj yoʼtan ta kʼop* te David sok te Saúl, jajch yamigoin sbaik ta lek te Jonatán sok te David. Te Jonatán kʼux ta yoʼtan te David jich te bitʼil kʼux ya yaʼiy sba stukele.
2 Jaʼto tal ta kʼajkʼal-abi, te Saúl la yikʼ jilel ta sna te David, maba la yakʼix sujtel ta sna te state.
3 Te Jonatán kʼux ta yoʼtan te David jich te bitʼil kʼux ya yaʼiy sba stukele, te Jonatán sok te David la schap skʼopik.
4 Jich yuʼun, te Jonatán la slokʼes te snajtil kʼuʼ te maʼyuk skʼab te slapoj-ae, la yakʼbey te David. Jaʼnix jich la yakʼbey te skʼuʼ yuʼun guerra, te yespada, te stʼimalteʼ sok te schujkil schʼujte.
5 Te David jajch ta bael ta yakʼel guerra, chikan te banti tikunot yuʼun te Saúl, spisil-ora juʼ yuʼun tsalaw.* Jich yuʼun, te Saúl la yakʼbey swentain te winiketik yuʼun guerra. Jich te j-abatetik yuʼun te Saúl sok spisil te lume leknax yoʼtanik yuʼun.
6 K’alal te David sok te soldadoetik ya sujtik tal ta stsalel te filisteoetik, ta spisil te mukʼul lumetik yuʼun Israel ya xlokʼik tal te antsetik ta stael te ajwalil Saúl. Yakik ta kʼayoj sok yakik ta ajkʼot sok stseʼelil yoʼtanik, yakik ta stijel panderetaetik sok stijojibal música te oxlijkʼ scuerdail.
7 Te antsetik te jich la spasik-abi, jich ya yalik ta kʼayoj:
«Te Saúl la smiltiklan jmil ta tul,te David la smiltiklan 10 mil ta tul».
8 Te Saúl kʼax bayal ilin ta swenta-abi. Jkʼaxel maba la smulan te kʼayojile. Jich la yal: «Ta stojol te David ya yalik 10 mil ta tul, yan te joʼone... jaʼnax jmil ta tul. ¡Jaʼxanix te ma xyotsesik ta ajwalile!».
9 Jaʼto tal ta kʼajkʼal-abi, te Saúl spisil-ora maʼyukix smukʼul yoʼtan ta stojol-a te David.
10 Ta yan kʼajkʼal, te Dios la yakʼ chopol espíritu ta stojol te Saúl te uʼuninot yuʼun te jich jajch spas sba te bin-utʼil machʼa sojkem sjol ta yutil sna. Jaʼ ini kʼot ta pasel te kʼalal yak ta stijel arpa-a te David, jich te bitʼil spasoj talele. Te Saúl yichʼoj jun lanza ta skʼab
11 sok la schʼojbey ta stojol te David, melel jich la yal ta yoʼtan: «Ya jtsʼap ta pajkʼ te David sok te lanzae». Cheb buelta jich la spas te Saúl, pero ta schebal la snaʼ skʼasesel te Davide.
12 Te Saúl la xiʼ te David, melel te Jehová sjokinoj te David, pero yijkitayojix stukel-a te Saule.
13 Jich yuʼun, te Saúl ma la skʼanix te ya xjokinot yuʼun te David sok la yotses ta capitán yuʼun jmil soldadoetik. Jaʼ te David te machʼa la swol te soldadoetik ta guerra.*
14 Spisil te bin la spas te David lek lokʼ yuʼun,* melel jokinbil yuʼun te Jehová.
15 Te k’alal la yil te Saúl te spisil lek ya xlokʼ yuʼun te David, la xiʼ.
16 Pero, ta spisil te lum Israel sok ta Judá kʼux ta yoʼtanik te David, melel jaʼ ya xwolotik yuʼun ta yakʼel guerra.
17 Tey-abi, te Saúl jich la yalbey te David: «Ya kakʼbat te kantsil nichʼan Merab, te wixile, yuʼun ya xnujpunat sok. Jaʼnax ya jkʼan te yakuk x-abatinat sok yip awoʼtan ta jtojol sok ya jkʼan te ya xbaat ta guerraetik yuʼun te Jehová». Melel te Saúl jich la yal ta yoʼtan: «Ma joʼukon ya jmil, jaʼ akʼa milotuk yuʼun te filisteoetike».
18 Pero, te David jich la sjojkʼoybey te ajwalil Saúl: «¿Snujpʼbal te ya anialinon te bitʼil maba mukʼ jkʼoplal sok te maba mukʼ skʼoplalik-euk te machʼatik ay kuʼun, jaʼ te machʼatik ay yuʼun te jtat ta lum Israel?».
19 Te kʼalal kʼot yorail te ya yichʼ akʼbeyel te David te Merab, te yantsil nichʼan Saúl, jaʼ yakʼojbeyikix yinamin-a te Adriel te meholatita-winike.
20 Te Mical, te yan yantsil nichʼan te Saúl, ya smulan-a te Davide. Te kʼalal la yakʼbeyik snaʼ te Saúl, lek la yaʼiy.
21 Te Saúl jich la yal ta yoʼtan: «Ya kakʼbey yinamin te kantsil nichʼan, jaʼ ya jtuuntes ta pejtsʼ swenta ya xyal ta skʼab te filisteoetik te Davide». Jich yuʼun, te Saúl jich la yalbey ta schebal buelta te David: «Yoʼtik yame jnialinat».
22 Te Saúl jaʼnix jich la yalbey ta mantal te j-abatetik yuʼune: «Jichme muken xa awalbeyik te David: ‹Kʼax tseʼel yoʼtan ta atojol te ajwalil sok kʼuxat ta yoʼtan spisil te j-abatetik yuʼune. Jich yuʼun ak’a snialinat te ajwalile›».
23 Kʼalal te j-abatetik yuʼun te Saúl jich la yalbeyik te David, jich la yal te David: «¿Yabal akuyik te kʼun te ya x-ochon ta snial te ajwalil te bitʼil pobreon sok te maba mukʼ jkʼoplale?».
24 Jich yuʼun, te j-abatetik yuʼun te Saúl la yalbeyik yaʼiy te bin la yal te David.
25 Pero, te Saúl jich la yalbey ta mantal te j-abatetik yuʼune: «Jich xa awalbeyik te David: ‹Te jayebnax stojol ya skʼan ta swenta te yantsil nichʼan te ajwalil, jaʼ 100 ta lijkʼ snujkulel sjol skʼunil sbakʼetalik te filisteoetik swenta ya yakʼbey spakol-a te skontratake›». Melel te Saúl jich yak ta schapel swenta ya xlaj ta skʼab filisteoetik te David.
26 Jich te j-abatetik yuʼun te Saúl bajt yalbeyik yaʼiy te David, lek la yaʼiy te ya xnialinot yuʼun te ajwalile. Te kʼalal mato staoj-a te bin kʼajkʼalil albile,
27 te David lokʼ bael sok te swiniktak, la smil 200 ta tul filisteoetik sok la yichʼbey tal te ajwalil te snujkulel sjol skʼunil sbakʼetalik te filisteoetik swenta ya xnialinot yuʼun te ajwalile. Jich yuʼun, te Saúl la yakʼbey yinamin te David te Mical, te yantsil nichʼane.
28 Te Saúl la snaʼ stojol te jokinbil yuʼun Jehová te David soknix la yil te kʼanbil yuʼun te Mical.
29 Ta swenta-abi, te Saúl kʼaxtoxan la xiʼ te Davide. Jich yuʼun, te jayeb kʼajkʼal kuxul te Saúl la skontrain te David.
30 Ta jujun buelta te ya xlokʼik ta yakʼel guerra te machʼatik yichʼoj mukʼ yaʼtelik yuʼun te filisteoetik, te David jaʼ bayalxan juʼ yuʼun tsalaw ta guerra* te bitʼil te j-abatetik yuʼun te Saúl sok kʼax ichʼbil ta mukʼ te sbiile.
Notaetik
^ Ta yantik variante «aʼiyej».
^ O «la yakʼ ta ilel spʼijil yoʼtan».
^ Ta hebreo: «ya x-och xlokʼ ta stojol te lume».
^ O «Te David la yakʼ ta ilel spʼijil yoʼtan ta spisil te bin la spas».
^ O «jaʼ la yakʼxan ta ilel spʼijil yoʼtan».
