1 Samuel 19:1-24
19 Ta patil, te Saúl la yalbey te Jonatán te snichʼane sok spisil te j-abatetik yuʼun te ya skʼan ya smil te David.
2 Pero, te Jonatán te kʼax kʼux ta yoʼtan te David, la scholbey yaʼiy te David. Jich la yal: «Te jtate ya skʼan ya smilat. Awokoluk, tsajtaya* aba pajel ta sab. Lea banti ya anakʼ aba sok jilan tey-a.
3 Yame xlokʼon ta beel sok te jtat ta kʼinal te banti nopol* ya xjilate. Lekme akʼoplal ya kalbat ta stojol te jtate, yame kalbat awaʼiy teme ay bin la kaʼiy stojole».
4 Jich yuʼun, te Jonatán la yalbey lek skʼoplal te David ta stojol te Saúl, te state. Jich la yalbey: «Ajwalil, mame xa ata amul ta stojol te David te j-abat awuʼune, melel maʼyuk staoj smul ta atojol. Spisil te bintik spasoje jaʼ ta swenta alekilal.
5 Te kʼalal la smil te filisteo-winik, snaʼoj-a te ya xjuʼ ya xlaje. Ta swenta-abi, te Jehová la yakʼ te tsalawan spisil te lum Israel. Jaʼatnix la awil sok la yakʼbat bayal stseʼelil awoʼtan. ¿Bin yuʼun te ya ata amul ta smilel te David te maʼyuk bin chopol* spasoje? Teme jich ya apase, yame amalbey schʼichʼel te machʼa maʼyuk smule».
6 Te Saúl la yaʼiybey skʼop te Jonatán sok jich la yal: «Jamal ya kal ta stojol Jehová te kuxul Dios te maba ya jmile».
7 Ta patil, te Jonatán la yikʼ tal te David sok la scholbey yaʼiy spisil. Tey-abi, la yikʼ bael te banti ay te Saúl, jich abatinxan te David ta stojol te Saúl te bitʼil spasoj tale.
8 Chaʼjajchxan te guerrae, jich te David bajt yakʼbey guerra te filisteoetik sok kʼax bayal machʼatik la smil. Jich yuʼun lokʼik bael ta anel te filisteoetik ta stojol te Davide.
9 Te kʼalal nakal ta sna-a te Saúl sok stsakoj-a te slanzae, te Jehová la yakʼ chopol espíritu ta stojol te Saúl. Te David yak ta stijel-a te arpa.
10 Te Saúl kʼan stsʼap ta pajkʼ te David sok te slanza, pero te David la snaʼ skʼasesel, jich tsʼapal kʼoel ta pajkʼ te lanzae. Ta ajkʼabalnix-abi lokʼ ta anel te David.
11 Ta patil, te Saúl la stikun chaʼoxtul winiketik ta stsajtayel te sna te David yuʼun ya smilik ta yan kʼajkʼal ta buen sab. Jich albot yuʼun te yinam te David, jaʼ te Mical: «Teme ma x-anat lokʼel ta ajkʼabal ini, pajel lajematixme-a».
12 Te Mical ta oranax la skoltay te David yuʼun ya x-an lokʼel ta ventana.
13 Jich yuʼun, te Mical la stsak tal te lokʼomba te ya yichʼ ta mukʼ te sfamilia,* la smejtsʼan ta wayibal, la yak’ jlijkʼ pakʼ te pasbil ta stsotsel tentsun te banti ya yakʼ sjol te David sok la smuk ta jlijkʼ pakʼ.
14 Te kʼalal kʼotik te winiketik te la stikun te Saúl ta stsakel te David, jich la yichʼik albeyel yuʼun te Mical: «Ay ta chamel».
15 Te Saúl la schaʼtikun te winiketik ta yilel te David sok jich la yaltiklanbey: «Ikʼbonik tal sok swayib yuʼun ya jmil».
16 Te kʼalal ochik te winiketik ta sna te David, jaʼnax la staik jun lokʼomba* te metsel ta wayibal sok stsotsel tentsun te banti snujpʼ ay sjol te Davide.
17 Te Saúl jich la sjojkʼoybey te Mical: «¿Bin yuʼun te la aloʼlayone? ¿Bin yuʼun te la awakʼ anuk bael te jkontrae?». Jich la yal te Mical: «Melel jich la yalbon ‹¡Akʼawon bael, teme maʼuke ya jmilat!›».
18 Te kʼalal lokʼ bael ta anel te David, bajt yil te Samuel ta Ramá sok la scholbey yaʼiy spisil te bin pasbot yuʼun te Saule. Ta patil bajt schebalik ta Nayot sok tey jilik-a.
19 Ta patil, jich la yalbeyik yaʼiy te Saúl: «Te David ay ta Nayot ta Ramá».
20 Te Saúl ta oranax la stikun chaʼoxtul winiketik ta stsakel te David. Te kʼalal kʼotik tey-ae sok te la yilik te yakik ta yalel albilkʼopetik te j-alwanejetik te ayix yaʼbilalik sok te jaʼ jwolwanej yuʼunik te Samuel, jul ta stojolik-euk te espíritu yuʼun te Diose, jich jajchik ta kʼop te bin-utʼil ya xkʼopoj te j-alwanejetike.
21 Jaʼnax te kʼalal jich la yaʼiy stojol te Saúl, la stikunxan yantik winiketik, jaʼnix jich jajchik ta kʼop-euk te bin-utʼil ya xkʼopoj te j-alwanejetike. Jich yuʼun, te Saúl la stikunxan yantik winiketik ta yoxebal buelta, jaʼnix jich jajchik ta kʼop-euk te bin-utʼil ya xkʼopoj te j-alwanejetike.
22 Ta patil, jaʼnix bajt ta Ramá te Saúl. Te kʼalal kʼot ta mukʼul pozo te ay ta Secú, jich la sjojkʼoy: «¿Banti ay te Samuel sok te David?». Jich la sjakʼik: «Ayik ta Nayot ta Ramá».
23 Te kʼalal yak ta bael te Saúl ta Nayot ta Ramá, jaʼnix jich tal ta stojol-euk te espíritu yuʼun te Diose. Ta sjunal be jich yak ta kʼop bael te bin-utʼil ya xkʼopoj te j-alwanejetik jaʼto te kʼalal kʼot ta Nayot ta Ramá.
24 Jaʼnix jich la slokʼes skʼuʼ sok jich jajch ta kʼop te bin-utʼil ya xkʼopoj te j-alwanejetik ta stojol te Samuel. Jich yuʼun, sjunal kʼajkʼal sok sjunal ajkʼabal tʼanal* ta lum. Jaʼ yuʼun, jich la yichʼ alel «¿Yuʼunbal j-alwanejix-euk te Saule?».
Notaetik
^ Ta yantik variante «ila».
^ Ta yantik variante «tijil».
^ Ta yantik variante «ma lek».
^ Ta hebreo: «terafim».
^ Ta hebreo: «terafim».
^ O «jtebxanix skʼuʼ».
