1 Samuel 2:1-36
2 Te Ana jich la skʼopon te Diose:
«Tseʼel koʼtan ta stojol te Jehová;jaʼ ya yakʼbon kip* te Jehová.
Ya jam ke yuʼun ya jsutbey skʼop te jkontratake,melel ya yakʼbon stseʼelil koʼtan te bitʼil ya xkoltaywanate.
2 Maʼyuk yan chʼul Dios jich te bin-utʼil jaʼat Jehová.Maʼyuk yan jich te bin-utʼil te jaʼate.Maʼyuk yan mukʼul ton jich te bin-utʼil jaʼat Dios kuʼuntik.
3 Ijkitayaik te toyba kʼop.Mame xlokʼ ta aweik toyba kʼopetik,melel te Jehová jaʼ jun Dios te spisil ya snaʼsok jaʼ ya stsajtaybey* ta lek yaʼtel te ants winiketike.
4 Te stʼimalteʼik te winiketik te bayal yipik yame xwakʼik,*yan te machʼatik maʼyuk yipik* yame x-akʼbot yipik.
5 Te machʼatik bayal sweʼelik-ae yame skʼan ya x-aʼtejik yuʼun ya sta sweʼelik,yan te machʼatik ay swiʼnalik-ae maʼyukix swiʼnalik.
Te ants te ma x-alaj-ae la sta juktul yalatak,yan te ants te bayal yalatak-ae stukel ayix.
6 Te Jehová ya yakʼ lajel sok ya yakʼ kuxlejalil.Jaʼ te machʼa ya x-akʼawan koel ta Mukenal* sok jaʼ te machʼa ya x-ikʼawan moel tal.
7 Te Jehová ya x-akʼawan ta pobre sok ya yakʼ kʼulejalil.Jaʼ ya spejkʼan jkʼoplaltik sok jaʼ ya stoy jkʼoplaltik.
8 Ya sjach moel ta tan te machʼa pekʼel yoʼtansok ya sjach moel te pobre te nakal ta tan*swenta ya snajkan ta stojol te machʼatik yichʼojik mukʼ yaʼteliksok ya yakʼ xnajkaj ta jun lugar te banti ya yichʼ ichʼel ta mukʼ.
Te Jehová jaʼ yakʼojbey yiptajib te balumilalsok la yakʼ lumkʼinal ta sba.
9 Jaʼ ya skanantay te banti ya xbeen te machʼatik jun yoʼtanik ta stojol,yan te machʼatik chopolik* maba ya yakʼ xkʼopojikix ta ijkʼal kʼinal, jaʼ te mukenal,melel te winike ma xjuʼ ya yaʼiy tsalaw ta swentanax yip.
10 Te Jehová yame slajin te machʼatik ya xkontrainot yuʼun,*yame xtʼom te yilinba ta stojolik jich te bin-utʼil chawuk kʼalalto ta chʼulchan.
Te Jehová yame x-ichʼawan ta kʼop kʼalalto ta stiʼil te balumilal.Yame yakʼbey yip te ajwalil yuʼune.Yame yakʼbey yip te machʼa* tsabil yuʼune».
11 Tey-abi bajt ta sna te Elcaná te ay ta Ramá. Pero jil ta abatinel* ta stojol te Jehová te chʼin kereme, jaʼ jil ta swenta te sacerdote Elí.
12 Te skerem nichʼnab te Elí kʼax chopolik,* maba ya yichʼik ta mukʼ te Jehová.
13 Te sacerdoteetik ma jaʼuknax la stsakik te bin-nix ay ta swentaik-a te ya x-akʼbotik yuʼun te lume, te bin la spasike jaʼ ini: kʼalal jtul winik ya yakʼ te milbil majtanil yuʼune, ya xkʼot jtul yabat te sacerdote sok jun mukʼul trinche te oxchʼix sniʼ te banti yak ta bul te tiʼbal
14 sok ya smul ochel ta oxom te cheb schikin, o ta caldera o ta oxom te jun-nax schikine. Spisil te bin ya stsak lokʼel tal te trinche jaʼ yuʼun spisil te sacerdotee. Jich ya spasbeyik spisil te israeletik te ya xkʼotik ta Siló.
15 Jaʼnix jich, te kʼalal mato xyichʼ chikʼel-a te sjujpʼel* te tiʼbale, jtul yabat te sacerdote jich ya xkʼot yalbey te winik te ya yakʼ te milbil majtanil: «Akʼbeya tiʼbal te sacerdote yuʼun ya swo, melel maba ya skʼan paybil tiʼbal. Jaʼnax ya skʼan tseel tiʼbal».
16 Te kʼalal jich ya yal te winik «Nail akʼa yichʼ chikʼel te sjujpʼel* te tiʼbal, ta patil tsaka te jayeb ya akʼane», jich ya yal te yabat te sacerdote «Maʼuk, akʼbonix te tiʼbale. Teme maba ya awakʼbone, yame jpojbat».
17 Kʼax tulan mulil kʼot ta stojol te Jehová te bin la spasik te yabat te sacerdoteetike, melel maba la yichʼik ta mukʼ te milbil majtanil yuʼun te Jehová.
18 Manchukme chʼin keremto-a te Samuel yak ta abatinel ta stojol te Jehová, slapoj* jlijkʼ efod* te pasbil ta lino.
19 Te snane* ya spasbey ta jujun jaʼbil jlijkʼ schʼin najtil kʼuʼ te maʼyuk skʼabe sok ya yichʼbey bael te kʼalal ya xmo bael ta Siló sok te smamalal ta yakʼel te milbil majtanil te ya yichʼ akʼel ta jujun jaʼbil.
20 Jich te Elí la yakʼbey bendición te Elcaná sok te yiname. Jich la yal: «Akʼame yakʼbat te Jehová jtul akerem sok te awinam ini, yuʼun jaʼ ya sjelolin te chʼin kerem te la yakʼ te awinam ta stojol te Jehová». Jich sujtik bael ta snaik.
21 Te Jehová la snaʼbey yoʼbolil sba te Ana, jich la yikʼxan yal ta schʼujt. Ayin* oxtul skerem sok chaʼtul achʼixetik yuʼun. Jich te chʼin Samuel bejbe* yak ta chʼiel ta stojol te Jehová.
22 Te Elí kʼax mamalix-a sok yaʼiyoj spisil te bintik ya spasik te snichʼnab ta stojol spisil te israeletik. Jaʼnix jich snaʼoj-a te ya xwayik sok te antsetik te ya x-abatinik ta yochibal te nailpakʼ ta swenta tsoblej.
23 Te Elí jich ya yaltiklanbey-a te snichʼnabe: «¿Bin yuʼun te ya apasik spisil ini? Spisil te yajwalul te lume, chopol* te bin ya scholbonik ta atojolike.
24 Ma jichuk ya skʼan ya apasik jnichʼnab. Te bin yakik ta yalel ta atojolik te lum yuʼun te Jehová, ma lekuk.
25 Teme ay machʼa ya sta smul ta stojol yan, ayniwan machʼa ya xjuʼ ya xkʼoponbot Jehová ta stojol. Pero, teme ay machʼa ya sta smul ta stojol Jehová, ¿machʼa ya xjuʼ ya xkʼoponbot Dios ta stojol?». Pero maba la schʼuunbeyik skʼop te statike, melel te Jehová la staix ta nopel te ya slajinbey te skuxlejalike.
26 Te kʼalal jich yak ta kʼoel ta pasel-abi, te chʼin Samuel bejbe* yak ta chʼiel sok kʼax bayal kʼanbil yuʼun te Jehová soknix te ants winiketike.
27 Jtul j-alwanej yuʼun Dios tal ta stojol te Elí ta yalbeyel jich ini: «Jich ya yal te Jehová: ‹¿Yuʼunbal ma jamaluk la kakʼ jba ta ilel ta stojol te sfamilia te antiguo ameʼ atat te kʼalal ayikto ta Egipto-a sok te kʼalal ayik ta mosoinel ta sna-a te faraón?
28 Ta spisil te stsʼumbal Israel jaʼ la yichʼ tsael te antiguo ameʼ atatik yuʼun ya x-abatinik ta sacerdoteil ta jtojol. Jaʼ la yichʼ tsael yuʼun jaʼ ya yakʼ te milbil majtaniletik ta skajtajib chikʼbil majtanil, yuʼun jaʼ ya schikʼ te pom sok yuʼun jaʼ ya slap te efod* te kʼalal ya xtal ta jtojol. Sok jaʼ la kakʼbey te antiguo ameʼ atatik te ya xjuʼ stsakik jun parte te tiʼbal te ya yichʼik tal te israeletik ta jtojol.
29 ¿Bin yuʼun te maʼyuk skʼoplal ta awoʼtanik te milbil majtaniletik kuʼun soknix te majtaniletik te kaloj ta mantal te ya yichʼ akʼel ta jnae? ¿Bin yuʼun te jaʼ kʼax bayal skʼoplal ta awoʼtan te anichʼnab te bitʼil te joʼone? Te jaʼexe yakex ta jujpʼel ta skaj te jaʼ ya atsakik te lekil majtaniletik te ya yakʼ te lum kuʼune, jaʼ te Israel.
30 »›Jaʼ yuʼun, jich ya yal te Jehová te Dios yuʼun Israel: «Melelnix-a te la kal te jaʼ spisil-ora ya x-abatin ta jtojol te afamilia sok te sfamilia te antiguo ameʼ atate». Pero, jich ya yal te Jehová ta ora ini: «Maba ya kakʼix te jich ya xkʼot ta pasele, melel yame kichʼ ta mukʼ te machʼa ya yichʼonik ta mukʼe, pero te machʼatik ya spʼajonik jaʼnixme jich ya yichʼik pʼajel».
31 Yakme ta noptsajel* te skʼajkʼalel te ya jlajinbat te awip sok yame jlajinbey yip te sfamilia te atate, mame ayuk ni jtuluk winik ta afamilia te ya xmamalub.
32 Spisil te bintik lek ya sta te lum Israel, te jaʼate yame x-ayin akontra ta jna soknix ta afamilia, maʼyuk ni jtuluk winik te ya xkuxin bayal jaʼbil te ya xmamalub.
33 Ayme atsʼumbal te ya xjil ta abatinel ta jtojol ta skajtajib te chikʼbil majtanil kuʼun, jaʼme ya yakʼ te ya xlaj te sbakʼ asit sok jaʼme ya yakʼbat bayal awokol. Pero, jteb ma spisil te machʼatik ay awuʼune yame yichʼik milel ta swenta te espada yuʼun te winiketike.
34 Te bin ya xkʼot ta stojol te chaʼtul anichʼnab jaʼ te Hofní sok te Finehás, jaʼme señail ya xkʼot awuʼun: ta jun-nax kʼajkʼal ya xlajik ta schebalik.
35 Jich yuʼun yame jtsa jtul sacerdote kuʼun te jun yoʼtan ta jtojol. Jaʼme ya skʼotes ta pasel te bin ya skʼan te koʼtane. Yame jpasbey jun sna* te maʼyuk bin-ora ya xlaj skʼoplal sok spisil-ora ya x-abatin ta stojol te machʼa tsabil kuʼune.
36 Te jayebxan machʼatik ya xjil awuʼune yame xtal snijan sbaik ta stojol yuʼun ya skʼan stojolik sok sweʼelik. Jichme ya yalik: «Awokoluk, akʼbon kaʼtel ta sacerdoteil swenta jich ya jta jtebuk jweʼel-a»›».
Notaetik
^ Ta yantik variante «yilbey».
^ Ta yantik variante «xkʼasik».
^ O «ya skʼojchin yokik».
^ O jaʼniwan ya skʼan ya yal «te banti busul kʼaʼpal».
^ Ta yantik variante «ma lek stalelik».
^ O jaʼniwan ya skʼan ya yal «Yame xnijk yoʼtanik te machʼatik ya skontrainik te Jehová».
^ O «och ta j-abat».
^ Ta yantik variante «ma lek stalelik».
^ Ta yantik variante «xepuil».
^ Ta yantik variante «xepuil».
^ Ta hebreo: «schukoj».
^ Ta yantik variante «smeʼe», «smamae».
^ Ta yantik variante «Pʼejkaj», «Tojk».
^ Ta yantik variante «xkechkon».
^ Ta yantik variante «ma lek».
^ Ta yantik variante «xkechkon».
^ Ta yantik variante «jijtsʼajel», «tijtsajel».
^ Jaʼ ya yalbey skʼoplal te stsʼumbal sacerdoteetik.
