1 Samuel 20:1-42
-
Te Jonatán jun yoʼtan la yakʼ sba ta stojol te David (1-42)
20 Jich te David lokʼ bael ta anel te banti ay-ae, jaʼ ta Nayot ta Ramá. Bajt yil te Jonatán sok jich la sjojkʼoybey: «¿Bin-a te jpasoje? ¿Bin-a te jmule? ¿Bin mulil jpasoj ta stojol te atat te ya skʼan ya smilone?».
2 Jich la yal te Jonatán: «¡Ma xjuʼ ya xlajat! ¡Maba ya xlajat! Chikan bin-a te ya spas te jtate, yananix yalbon-a. ¿Aybal swentail teme maba ya yalbone? Maʼuk, ma jichuk ya xkʼot ta pasel».
3 Pero, te David jich la yalbey ta jamal te Jonatán: «Snaʼoj ta lek te atat te kʼuxon ta awoʼtane sok jichniwan ya xjuʼ ya yal ta yoʼtan: ‹Jaʼniwan lek te maba ya snaʼ stojol te Jonatán swenta maba ya smel yoʼtan-a›. ¡Jamal ya kal ta stojol Jehová te kuxul Dios sok te kuxulat-euk te jtebxanix ya skʼan ya xlajon te joʼone!».
4 Te Jonatán jich la yalbey te David: «Yame jpas te bin ya akʼanbone».
5 Te David jich la yalbey te Jonatán: «Te pajele jaʼ yuninal u sok jaʼ yorail te ya xnajkajon ta weʼel sok te ajwalile. Jich yuʼun, jaʼ ya jpastik ini: Te jaʼate yame awakʼon bael sok yame xbajt jnakʼ jba, jaʼtome ya xlokʼon tal chaʼbej ta mal kʼajkʼal.
6 Teme la yil te atat te maba tey ayon-ae, jichme xa awalbey: ‹Te David la skʼanbon permiso yuʼun bajt ta oranax ta slumal ta Belén, melel spisil te sfamiliae ya yakʼik te milbil majtanil te ya yichʼ akʼel ta jujun jaʼbile›.
7 ‹Lek ay› teme xchie, jaʼ ya skʼan ya yal te maʼyuk bin ya skʼan ya jxiʼe. Pero, teme ya x-iline, jichme ya anaʼ te yuʼun-nanix ay bin chopol* ya spasbon-ae.
8 Akʼbon kil te kʼuxul oʼtanil te ma x-ijkitaywan, melel la achap akʼop sok joʼon ta stojol te Jehová, te j-abaton awuʼune. Pero, teme ay jtaoj jmule, jaʼatnix xa amilon. Ma puersauk te ya awakʼon ta skʼab te atate».
9 Jich la yal te Jonatán: «¡Ma xa awal jich! ¿Mabal yakuk kalbat teme la kaʼiy stojol te ay bin chopol* ya skʼan ya spasbat te jtate?».
10 Jich yuʼun, te David jich la sjojkʼoybey te Jonatán: «Pero, ¿machʼa ya xtal yalbon kaʼiy teme maba lek la yaʼiy te atate?».
11 Te Jonatán jich la yalbey te David: «Laʼ, konik ta stiʼil te mukʼul lum...». Jich bajtik ta schebalik,
12 te Jonatán jich la yalbey te David: «Jaʼme ya kakʼ ta testigo te Jehová te Dios yuʼun Israel, ta jich ora bael te pajel o chaʼbej, ya jpas tulan yuʼun ya jojkʼoybey te jtat te bin snopoj ya spase. Teme ya kil te lek yoʼtan ta atojole, yame jtikunbat ta alel.
13 Akʼa yakʼbon tulan castigo te Jehová teme la kaʼiy stojol te ay bin chopol* ya skʼan ya spasbat te jtat, teme maba ya kakʼbat anaʼ swenta ya ale banti ya anakʼ aba. Akʼa sjokinat te Jehová jich te bitʼil jokinot te jtate.
14 ¿Mabal yakuk awakʼbon kil te skʼuxul yoʼtan te Jehová te ma x-ijkitaywan te bitʼil kuxulonto sok te kʼalal lajemonix-ae?
15 Mame ayuk bin-ora ya awijkitay ta yakʼel ta ilel te kʼuxul oʼtanil te ma x-ijkitaywan ta stojol te machʼatik ay kuʼune, ni jaʼuk te kʼalal ya slajin te Jehová spisil te akontratak ta balumilale».*
16 Jich te Jonatán la schap skʼop sok te stsʼumbal te David. Jaʼnix jich la yal: «Te Jehová yame yakʼbey stoj smul te skontratak te Davide».
17 Te Jonatán la skʼanbey te ya yal ta jamal yan buelta te David te kʼux ya x-aʼiyot yuʼune, melel te Jonatán kʼux ta yoʼtan te David jich te bitʼil kʼux ya yaʼiy sba stukele.
18 Te Jonatán jich la yalbey te David: «Te pajel jaʼ yuninal u sok yame awichʼ naʼel, melel jochol ya x-ayin te anaktajibe.
19 Te chaʼbej kʼaxtoxan ya awichʼ naʼel-a. Jaʼ yuʼun yame skʼan ya xtalat te banti la anakʼ aba te yan kʼajkʼale sok liʼ nopol* ya awakʼ aba ta ton ini.
20 Yame jtʼimuy bael oxeb flechaetik ta stsʼeel te ton te jich yilel te ay bin yakon ta stojlinele.
21 Te kʼalal ya jtikun bael te j-abat kuʼune, jich ya kalbey: ‹Baan, baan lea tal te flechaetike›. Teme jich la awaʼiy te la kalbeye ‹Te flechaetik liʼ ayxan talele, tamtiklana tal›, teme xchione, jaʼ ya skʼan ya yal-abi te ya xjuʼ ya sujtat tal, jichme jamal ya kalbat ta stojol Jehová te kuxul Dios te lek ay spisil sok te maʼyuk bin ya skʼan ya axiʼe.
22 Pero, teme jich ya awaʼiy te ya kalbey te j-abat kuʼune ‹Te flechaetik kʼaxemtoxan bael te banti ayate› teme xchione, yame skʼan te ya xbaate, melel jich ya skʼan te Jehová.
23 Jaʼuk testigo ya xkʼot te Jehová ta sbajtelkʼinal ta swenta te chapbilkʼop la jpastik ta jchebaltike».
24 Jich yuʼun, te David la snakʼ sba ta stiʼil te mukʼul lum. Te kʼalal kʼot skʼajkʼalel te yuninal ue, te ajwalil la snajkan sba ta weʼel ta smesa.
25 Te ajwalil nakal te bantinix ay snaktajib-ae, ta stsʼeel te pajkʼe. Te Jonatán nakal ta sit te Saúl, te Abner nakal ta stsʼeel te Saúl. Pero, jochol te snaktajib te David.
26 Ta kʼajkʼal-abi, maʼyuk bin la yal te Saúl, melel jich la yal ta yoʼtan: «Ayniwan bin kʼot ta pasel ta stojol te jich boloben skʼoplal. Jaʼniwan-abi, yuʼun mato lekuben skʼoplal».
27 Pero, ta skaj te jocholxan te snaktajib te David ta schebal kʼajkʼal yuʼun te yuninal ue, te Saúl jich la sjojkʼoybey te Jonatán te snichʼane: «¿Bin yuʼun te ma tal ta weʼel wojey ni yoʼtik te snichʼan Jesé?».
28 Te Jonatán jich la yalbey te Saúl: «Te David la skʼanbon permiso yuʼun ya xbajt tal ta Belén.
29 Jich la yalbon: ‹Awokoluk, akʼawon bael, melel te jfamilia ya yakʼik milbil majtanil tey ta mukʼul lume, jaʼnix la yalbon te jbankil te yakuk xboone. Jich yuʼun, teme lek ya awile, ya jkʼanbat wokol te yakuk awakʼbon permiso yuʼun ya xbajt kil te jbankiltake›. Jaʼ swentail te bin yuʼun ma tal ta weʼel ta smesa te ajwalile».
30 Jich yuʼun, te Saúl kʼax bayal ilin ta stojol te Jonatán sok jich la yalbey: «¡Skeremat jtoyba ants! ¿Yuʼunbal maba jnaʼoj ya akuy te lek awiloj aba sok te snichʼan Jesé? ¡Kʼexlaltik aba sok ya awakʼ ta kʼexlal te anane!*
31 Te jayeb tiempo ya xkuxin ta kʼinal te snichʼan Jesé, maba ya xjalajat ta kʼinal sok maba ya xjalaj-euk te wentainel awuʼune. Jaʼ yuʼun tikuna ta leel, melel yame skʼan ya yichʼ milel».
32 Pero, te Jonatán jich la sjakʼbey te Saúl te state: «¿Bin yuʼun te ya skʼan ya yichʼ milele? ¿Bin-a te spasoje?».
33 Jich yuʼun, te Saúl la schʼojbey te lanza ta stojol te Jonatán yuʼun ya smil, tey la snaʼ-a te Jonatán te snopoj ta yoʼtan te stat te ya smil te David.
34 Kʼax ilinem la stejkʼan sba jajchel ta mesa te Jonatán. Ta schebal kʼajkʼal yuʼun te yuninal u, maʼyuk bin la sweʼ. Bayal smeloj yoʼtan ta stojol te David sok ta swenta te kʼexlaltesot yuʼun te state.
35 Ta sab lokʼ bael ta stiʼil mukʼul lum te Jonatán jich te bitʼil schapoj sok te David, la yikʼ bael jtul yabat te keremtoe.
36 Jich la yalbey te yabate: «Animal baan lea tal te flechaetik te la jtʼimuy baele». Jich animal bajt te j-abat yuʼune, te flecha te la stʼimuy bael te Jonatán jelawxan bael te banti ay te j-abate.
37 Te kʼalal kʼot te j-abat te banti ay te flecha te la stʼimuy bael te Jonatane, jich awtayot yuʼun te Jonatán: «¿Mabal lumuktoxan ay bael te flechae?».
38 Te Jonatán jaʼnix jich la yawtay: «¡Suja aba! ¡Animajan! ¡Mame xa achʼay tiempo!». Jich te j-abate la stamtiklan tal te flechaetik sok sujt tal ta stojol te yajwale.
39 Pero, maʼyuk bin la snaʼ stukel te j-abat yuʼune, jaʼnax te Jonatán sok te David snaʼojbeyik swentail te bin la yichʼ pasele.
40 Tey-abi, te Jonatán la yakʼbey te yabat te yaʼtejib yuʼun guerra sok jich la yalbey: «Baan, ichʼa bael ta mukʼul lum».
41 Te kʼalal bajtix-a te j-abate, te David lokʼ tal te banti nopol* snakʼoj sba te ay ta stojol sur. Jich yuʼun la spajkan sba kʼalal ta lum sok oxeb buelta la snijan sba. Tey-abi la yujtsʼuy* sbaik sok talel jkʼaxel la yokʼetay sbaik, pero jaʼ kʼax bayal okʼxan te Davide.
42 Te Jonatán jich la yalbey te David: «Junukme awoʼtan ya xbaat, melel jamal la kaltikix jkʼoptik ta swenta sbiil te Jehová. Jich la kaltik: ‹Jaʼuk testigo akʼa kʼotuk kuʼuntik ta sbajtelkʼinal te Jehová, jaʼnix jich akʼa kʼotuk ta pasel ta stojol te atsʼumbal sok te jtsʼumbale›».
Tey-abi bajt te David sok sujt bael ta mukʼul lum te Jonatán.
Notaetik
^ Ta yantik variante «ma lek».
^ Ta yantik variante «ma lek».
^ Ta yantik variante «ma lek».
^ Ta hebreo: «te skontratak te David».
^ Ta yantik variante «tijil».
^ Ta yantik variante «ameʼe», «amamae».
^ Ta yantik variante «tijil».
^ Ta yantik variante «sbujtsʼi».
