1 Samuel 21:1-15
21 Ta patil, te David bajt ta Nob te banti ay-a te sacerdote Ahimélec. Te k’alal kʼot te David, jajch ta nijkel yuʼun xiwel te Ahimélec sok jich la sjojkʼoybey: «¿Bin yuʼun te atukele? ¿Bin yuʼun te maʼyuk machʼa sjokinojate?».
2 Te David jich la yalbey te sacerdote Ahimélec: «Ay bin la yakʼbon jpas te ajwalil, pero jich la yalbon: ‹Mame ayuk machʼa ya xjuʼ ya sna’ te bin la kakʼbat apas ni jaʼuk te bitʼil la kalbat te ya apase›. La kalbey te jwiniktak te ay banti ya jta jba soke.
3 Jich yuʼun akʼbon teme ay joʼpejch pan awuʼun o chikan te jayeb ay awuʼune».
4 Pero, te sacerdote jich la yalbey te David: «Maʼyuk biluknax pan ay kuʼun, jaʼnax ay pan te chʼultesbile. Ya xjuʼ ya kakʼbat-abi jaʼnax teme maʼyuk wayemik sok antsetik te awiniktake».
5 Te David jich la yalbey te sacerdote: «Jamal ya kalbat te maʼyuk jokinejtik ta wayel ants jichnix te bitʼil ay yantik buelta te lokʼemotik ta yakʼel guerra. Teme ya schʼultes sbaik te winiketik te kʼalal ya xbajtik ta guerra, ¡¿jaʼuktobalix-a ta ora ini?!».
6 Jich yuʼun, te sacerdote jaʼ la yakʼbey te pan te chʼultesbil, melel maʼyuk yantik pan-a. Te pan ini maba ayix ta nailpakʼ templo yuʼun-a te Jehová, melel la yichʼ jeltayel ta pan te paselto te bin kʼajkʼalil te ya yichʼ jeltayele.
7 Ta kʼajkʼal-abi ay jtul j-abat yuʼun te Saúl —jaʼ te machʼa swentainoj te jkanantuminchijetik— ay ta stojol Jehová ta nailpakʼ templo. Doeg sbiil te edomita-winike.
8 Te David jich la yalbey te Ahimélec: «¿Mabal ayuk jchʼixuk lanza awuʼun o junuk espada? Melel maba la kichʼ tal te espada kuʼun ni jaʼuk te kaʼtejib yuʼun guerra ta skaj te oranax ya skʼan pasel te bin la skʼanbon te ajwalile».
9 Jich la yal te sacerdote: «Liʼ kichʼoj te yespada te Goliat te filisteo-winik te la amil ta spamlej yuʼun Elá. Ay ta spat te efod,* potsbil ta pakʼ. Jaʼnax te bin ya xjuʼ ya kakʼbate. Teme ya xtuun awuʼune, ichʼa bael». Jich la yal te David: «Yak, akʼbon bael. Maʼyuk yan te pajal soke».
10 Ta kʼajkʼal-abi lokʼ bael te David sok anxan bael ta stojol te Saúl. Tey-abi kʼot ta Gat te banti ay te ajwalil Akís.
11 Jich yuʼun, te j-abatetik yuʼun te Akís jich la yalbeyik te ajwalil yuʼunike: «¿Mabal jaʼuk te David ini te ajwalil yuʼunik ta skʼinalike? ¿Mabal jaʼuk te machʼa jich la yalbeyik skʼoplal ta kʼayoj sok ta ajkʼot:‹Te Saúl la smiltiklan jmil ta tul,te David la smiltiklan 10 mil ta tul›?».
12 Kʼot ta yoʼtan te David te bin la yalike, jaʼ yuʼun te David bayal la xiʼ te Akís te ajwalil yuʼun Gat.
13 Jich yuʼun jajch sjel stalel ta yolilik sok la spas sba te sojkem sjole. Bilukxanix bin jajch stsʼibay ta puertaetik yuʼun te mukʼul lum sok la yakʼ maluk koel te yaʼlel ye ta yisim.
14 Te Akís jich la yalbey te j-abatetik yuʼune: «¡Sojkem sjol te winik ini! ¿Bin yuʼun te la awikʼbonik tal ta jtojole?
15 ¿Yuʼunbal maʼyuk bayal machʼa sojkem sjol liʼi te yato awikʼbonik tal te winik ini yuʼun bilukxanix bin ya spas ta jtojol? ¿Yabal akuyik te ya kotses ta jnae?».
