1 Samuel 22:1-23
22 Jich bajt te David sok la snakʼ sba ta yutil chʼen yuʼun Adulam. Te kʼalal la yaʼiy stojol te sbankiltak sok spisil te machʼatik ay yuʼun te state, koik bael te banti ay te Davide.
2 Jaʼnix jich tʼunot yuʼun spisil te machʼatik ayik ta wokol sok te machʼatik ay sbetik soknix te machʼatik chebajem yoʼtanik, jich te David och ta jwolwanej yuʼunik. Ayniwan 400 ta tul winiketik te jokinbil yuʼune.
3 Tey-abi lokʼ bael te David, bajt ta Mizpé yuʼun Moab sok jich la yalbey te ajwalil yuʼun Moab: «Awokoluk, akʼbon permiso yuʼun ya xjil sjokinex te jtat sok te jnan* jaʼto teme la jnaʼ te bin ya xbajt spas te Dios ta jtojole».
4 Jich yuʼun, tey la yijkitaylan sok-a te ajwalil yuʼun Moab, tey jilik-a te jayeb tiempo la snakʼ sba te Davide.
5 Te j-alwanej Gad jich la yalbey te David: «Mame teyuk ya xjilat-a te banti anakʼoj abae. Baan ta skʼinal Judá». Jich bajt te David sok och bael te banti ay te toyem teʼetik yuʼun Héret.
6 Te Saúl la snaʼ stojol te banti snakʼoj sba te David sok te winiketik te jokinbil yuʼune: Te kʼalal kʼot ta albeyel yaʼiy te Saúl, nakal ta yeʼtal tamarisco-teʼ te ay ta toyol kʼinal yuʼun Guibeá. Stsakoj-a te slanza sok joytaybil yuʼun spisil te j-abatetik yuʼune.
7 Jaʼ yuʼun, te Saúl jich la yalbey te j-abatetik yuʼun te joytaybil yuʼune: «Awokoluk, winiketik yuʼun Benjamín, aʼiya awaʼiyik stojol te jkʼope. ¿Yabal akuyik te ya yakʼbeyex akʼinalik-euk sok tsʼusubiltik awuʼunik te snichʼan Jesé? ¿Yabal akuyik te ya yotsesex ta capitán yuʼun jmil ta tul soldadoetik sok capitán yuʼun 100 ta tul soldadoetik?
8 ¡Te jaʼexe, akontrainojonik ta apisilik! ¡Maʼyuk machʼa la yalbon kaʼiy te la schap skʼopik te jnichʼan sok te snichʼan Jesé! Maʼyuk machʼa la snaʼbon yoʼbolil jba sok maʼyuk machʼa la yalbon te jaʼnix te jnichʼan te la stijbey yoʼtan te j-abat kuʼun yuʼun ya skontrainon, jich te bitʼil yak ta kʼoel ta pasel ta ora ini».
9 Jich yuʼun, te Doeg te edomita-winik, jaʼ te jwolwanej yuʼun te j-abatetik yuʼun te Saúl, jich la yal: «La kil te snichʼan Jesé te kʼot ta Nob, kʼot yil te Ahimélec snichʼan Ahitub.
10 Te Ahimélec ay bin la sjojkʼoybey te Jehová ta swenta te David sok la yakʼbey te bintik ya xtuun yuʼune. Jaʼnix jich la yakʼbey te espada yuʼun te Goliat te filisteo-winike».
11 Jich yuʼun, te ajwalil la stikun ta ikʼel ta oranax te sacerdote Ahimélec snichʼan Ahitub sok spisil te sacerdoteetik te jaʼ sfamilia te stat te ayik ta Nob. Jich bajtik ta spisilik ta stojol te ajwalile.
12 Jich la yal te Saúl: «¡Aʼiya awaʼiy stojol, snichʼan Ahitub!». Jich la yal te Ahimélec: «Liʼ ayoni, kajwal».
13 Jich la yal te Saúl: «¿Bin yuʼun te jun-nax la awakʼ aba sok te snichʼan Jesé yuʼun ya akontrainonik? ¿Bin yuʼun te la awakʼbey pan, la awakʼbey jun espada sok ay bin la ajojkʼoy ta stojol Dios ta swenta sbiil te Davide? Jaʼ jkontra sok ya skʼan ya smakon ta be yuʼun ya smilon, jaʼ te bin yak ta spasel ta ora ini».
14 Te Ahimélec jich la yalbey te ajwalil te kʼalal la yaʼiy stojol-abi: «¿Aybal yan j-abat awuʼun te jun yoʼtan ta atojol jich bitʼil te David? Jaʼ anial, ajwalil, jaʼ jwolwanej yuʼun te jkananetik awuʼune sok ichʼbil ta mukʼ ta yutil ana.
15 ¿Yuʼunbal sbabial buelta te ay bin ya jojkʼoybey te Dios ta stojol te Davide? ¡Maʼyuk bin-ora ay bin ya jpas yuʼun ya jkontrainat! Kajwal, mame xa awakʼbon jmulin sok mame xa awakʼbey smulin-euk te machʼatik ay yuʼun te jtate. Maʼyuk kaʼiyojbey jtebuk skʼoplal te bin la awale».
16 Pero, jich albot yuʼun te ajwalile: «¡Yame xlajat, Ahimélec! Jaʼat sok spisil te machʼatik ay yuʼun te atate».
17 Tey-abi, te ajwalil jich la yalbey te swiniktak te joytaybil yuʼune: «¡Milaik te sacerdoteetik yuʼun te Jehová! ¡Melel jaʼ jun ayikix sok te Davide! ¡Snaʼojik-a te yak ta anel ta jtojole, pero maʼyuk bin la yalbonik!». Pero, te swiniktak te ajwalil maba la skʼan la sjach skʼabik ta stojol te sacerdoteetik yuʼun te Jehová.
18 Jich yuʼun, te ajwalil jich la spas ta mantal te Doeg te edomita-winik: «¡Baan, jaʼat xa amil te sacerdoteetike!». Jich te Doeg bajt smil ta oranax te sacerdoteetike. Ta kʼajkʼal-abi la smil 85 ta tul winiketik te slapojik te efod* te pasbil ta lino.
19 Jaʼnix jich la smiltiklan te ants winiketik ta Nob, te jaʼ jpam mukʼul lum yuʼun te sacerdoteetike. La smiltiklan ta espada te winiketik sok te antsetik, te chʼin achʼix keremetik sok te alaletik, jaʼnix jich la smiltiklan te toroetik, burroetik sok te tuminchijetike.
20 Pero, te Abiatar snichʼan Ahimélec, snichʼan Ahitub, kol lokʼel ta anel sok bajt te banti ay te Davide.
21 Te Abiatar jich la yalbey te David: «Te Saúl la smiltiklan te sacerdoteetik yuʼun te Jehová».
22 Te kʼalal jich la yaʼiy stojol te David, jich la yalbey te Abiatar: «Ta kʼajkʼal-abi la jna’ stojol te ya xbajt yalbey Saúl te Doeg te edomita-winik te la yilone, melel tey ay-a. Joʼon jmul te la yichʼ milel spisil te machʼatik ay yuʼun te atate.
23 Jokinawon liʼi. Mame xiwat, melel teme ay machʼa ya skʼan ya smilate, jich kʼoem te ya skʼan ya smilon-euke. Joʼonme ya jkanantayat».
Notaetik
^ Ta yantik variante «jmeʼ», «jmama».
