1 Samuel 23:1-29
23 Ta patil, jich la yalbeyik te David: «Te filisteoetik yakik ta yakʼbeyel guerra te Queilá sok yakik ta yelkʼanel te sit awal tsʼunubile».
2 Te David jich la sjojkʼoybey te Jehová: «¿Yabal xbajt kakʼbey guerra te filisteoetik?». Jich albot yuʼun te Jehová: «Baan, baan akʼbeya guerra te filisteoetik sok koltaya te Queilá».
3 Pero, jich albot yuʼun te swiniktak te David: «Teme ayotikix ta xiwel te bitʼil liʼ ayotik ta Judá, ¡¿jaʼuktobalix-a teme ya xbootik ta Queilá yuʼun ya kakʼbeytik guerra te soldadoetik yuʼun te filisteoetike?!».
4 Jich yuʼun, te David la schaʼjojkʼoybey te Jehová, ta ora ini jich albot yuʼun te Jehová: «Baan, koan bael ta Queilá, melel yame kakʼbat ta akʼab te filisteoetik».
5 Jich te David bajt sok te swiniktak ta Queilá sok la yakʼbey guerra te filisteoetike. Kʼax bayal machʼatik la smil sok la yikʼ bael te chambalametik yuʼun. Jaʼ jich te bitʼil te David la skoltaylan te machʼatik nainemik ta Queilá.
6 Jich yuʼun, te kʼalal an bael ta Queilá te Abiatar snichʼan Ahimélec yuʼun ya sta sba sok te David, yichʼoj bael ta skʼab jlijkʼ efod.*
7 Jich la yalbeyik yaʼiy te Saúl: «Ay ta Queilá te David». Te Saúl jich la yal: «Te Diose la yakʼbonix ta jkʼab te David, melel jaʼnix stukel och bael ta jun mukʼul lum te ay puertaetik yuʼun sok skʼatal teʼel. Ma xjuʼ ya xlokʼix ta anel».
8 Jich yuʼun, te Saúl la stsob tal spisil te swiniktak ta yakʼel guerra, koik bael ta Queilá ta sjoytayel te David sok te swiniktake.
9 Te kʼalal la snaʼ stojol te David te bin ya skʼan ya xpasbot yuʼun te Saúl, jich la yalbey te sacerdote Abiatar: «Ichʼa tal te efod* liʼi».
10 Te David jich la yal: «Kajwal, Jehová, Dios yuʼun Israel, la kaʼiy stojol te ya skʼan ya xtal te Saúl ta Queilá sok te ya skʼan ya slajin ta jwentae.
11 ¿Yabal yakʼonik ta skʼab Saúl te jwolwanejetik* yuʼun Queilá? ¿Melelbal te ya xko tal te Saúl jich te bitʼil la yaʼiy stojol te j-abat awuʼun ini? Kajwal, Jehová, Dios yuʼun Israel, joʼon te j-abaton awuʼune, akʼbon jnaʼ awokoluk». Jich albot yuʼun te Jehová: «Yak, ya xko tal».
12 Jich la sjojkʼoyxan te David: «¿Yabal yakʼonkotik ta skʼab Saúl te jwolwanejetik yuʼun Queilá te joʼon sok te jwiniktake?». Jich albot yuʼun te Jehová: «Yak, yame yakʼex ta skʼab».
13 Jaʼ yuʼun, te David oranax lokʼ bael ta Queilá sok te swiniktak —te ayniwan 600 ta tul—, ya xtal xbajtik ta yanyantik lugaretik. Te kʼalal la yaʼiy stojol te Saúl te lokʼix bael ta anel ta Queilá te David, maba la skʼan snutsix bael.
14 Te David la snakʼ sba ta lugaretik yuʼun jochol takin kʼinal te chujkul ochel sbelal te ay ta witstikil yuʼun te jochol takin kʼinal yuʼun Zif. Te Saúl maba la skom sba ta sleel te David, pero maba akʼbot ta skʼab yuʼun te Jehová.
15 Te kʼalal ay ta jochol takin kʼinal yuʼun Zif ta Hores te David, snaʼoj-a* te yak ta leel yuʼun te Saúl yuʼun ya xmilot.
16 Te Jonatán snichʼan Saúl bajt yil te David ta Hores sok la skoltay yuʼun ya smukʼulinxan yoʼtan te Jehová.
17 Jich la yalbey te David: «Mame xiwat, melel maba ya staat ta leel te Saúl te jtate. Te jaʼate yame x-ochat ta ajwalil yuʼun Israel, yan te joʼone maba kʼax mukʼ jkʼoplal ya xkʼoon jich bitʼil te jaʼate. Te jtate snaʼoj ta lek te jich ya xkʼot ta pasele».
18 Jich yuʼun la schap skʼopik ta schebalik ta stojol te Jehová. Tey-abi sujt bael ta sna te Jonatán, yan stukel te David jil ta Hores.
19 Ta patil, te winiketik yuʼun Zif moik bael te banti ay te Saúl sok jich la yalbeyik: «Te David nopol* snakʼoj sba ta banti ayonkotik, ta lugaretik te chujkul ochel ta Hores, ta chʼin wits yuʼun Hakilá te ay ta stojol sur* yuʼun Jesimón.*
20 Jich yuʼun, ajwalil, koan bael te bin-ora ya akʼan ya xkoat baele, yame kakʼbatkotik ta akʼab te Davide».
21 Jich albotik yuʼun te Saúl: «Akʼa yakʼbeyex bendición te Jehová, melel la anaʼbonik yoʼbolil jba.
22 Awokoluk, baanik, ilawilik te bantinix ay-a te Davide sok machʼanix-a te la yil tey-ae. Melel ay yalojbonik te kʼax pʼije.
23 Ilawilik ta lek te bantinix ya snakʼ sba-ae sok ichʼbonik tal junuk señail, jichme ya jokinex bael. Teme yuʼun-nix ay ta akʼinalik-ae yame jle ta jujun familia ta jujuntsojb ta mil ta stsʼumbal Judá».
24 Jich yuʼun, te winiketik jaʼ nailajik bael ta Zif. Ta yorail-abi, te David sok te swiniktak ayik ta jochol takin kʼinal yuʼun Maón te ay ta Arabá ta stojol sur yuʼun Jesimón.
25 Ta patil, te Saúl sok te swiniktak kʼotik ta sleel te David. Te kʼalal la snaʼ stojol te David, ko bael te banti ay te mukʼul ton sok tey jil ta jochol takin kʼinal yuʼun Maón. Te kʼalal la snaʼ stojol te Saúl, jajch snuts te David ta jochol takin kʼinal yuʼun Maón.
26 Te David sok te swiniktak ayik ta jejch wits-a te kʼalal kʼot ta yan jejch wits-euk te Saúl. Jich te David oranax lokʼ bael ta anel, pero te Saúl sok te swiniktake jtebxanix ma stsakik-a te David sok te swiniktake.
27 Pero ay machʼa jich tal ta albeyel yuʼun te Saúl: «¡Sujtan bael ta oranax, melel te filisteoetik yakik ta yakʼbeyel guerra te jlumaltik!».
28 Jich yuʼun, te Saúl la yijkitay snutsel te David, jaʼ bajt yakʼbey guerra te filisteoetike. Jaʼ yuʼun, Mukʼul ton yuʼun Xatomba la yichʼ akʼbeyel sbiil te lugar-abi.
29 Jaʼ yuʼun, te David lokʼ bael tey-a, bajt snakʼ sba ta lugaretik te chujkul ochel ta En-Guedí.
Notaetik
^ O jaʼniwan ya skʼan ya yal «te yajwalik te kʼinal».
^ O jaʼniwan ya skʼan ya yal «xiʼoj-a».
^ Ta yantik variante «tijil».
^ Ta hebreo: «ta waʼel kʼabal».
^ O jaʼniwan ya skʼan ya yal «jochol takin kʼinal».
