1 Samuel 24:1-22
24 Te k’alal sujt tal te Saúl ta snutsel te filisteoetik, jich la yalbeyik yaʼiy: «Te David ay ta jochol takin kʼinal yuʼun En-Guedí».
2 Jich yuʼun, te Saúl la yikʼ bael 3 mil ta tul soldadoetik yuʼun spisil te lum Israel te pʼijubenik ta lek ta yakʼel guerra yuʼun jich bajt sleik te David sok te swiniktak ta stiʼil toyol tontikil te banti ayik te jaʼmal tentsunetike.
3 Jich yuʼun, te Saúl kʼot te banti ay te corraletik yuʼun te tuminchijetik te pastiklanbil ta ton te ay ta tiʼbe. Ay chʼen tey-a, och bael tey-a te Saúl ta tsaʼnel. Pero, te David sok te swiniktak nakajtik ta mero yutil te chʼene.
4 Jich albot te David yuʼun te swiniktak: «Jaʼme te kʼajkʼal ini te jich yak yalbelat te Jehová: ‹Ilawil, liʼme ya kakʼbat ta akʼab te akontrae. Pasa te bin ya skʼan awoʼtan ta stojol›». Jich yuʼun, muken jajch te David, la setʼbey lokʼel te stiʼil snajtil kʼuʼ te Saúl, jaʼ te skʼuʼ te maʼyuk skʼabe.
5 Pero, ta patil te David maba lek la yaʼiy sba yuʼun te la setʼbey lokʼel te stiʼil snajtil kʼuʼ te Saúl, jaʼ te skʼuʼ te maʼyuk skʼabe.
6 Jich la yalbey te swiniktak: «Ma xjuʼ te jich ya jpasbey ini te kajwal, melel jaʼ te machʼa tsabil yuʼun te Jehová. Jnaʼoj te maba lek ya yil Jehová teme ya jkontrain te machʼa tsabil yuʼun te Jehová».
7 Ta swenta te bin la yal te David, jich la skom* te swiniktak yuʼun maba la stsak smilik-a te Saule. Yan te Saúl lokʼ tal ta yutil chʼen, jich la stsakxan bael sbe.
8 Jich lokʼ tal ta yutil chʼen-euk te David sok jich la yawtay te Saúl: «¡Kajwal, ajwalil kuʼun!». Te kʼalal la sut sit ta spat te Saúl, la spajkan sba kʼalal ta lum te David sok la snijan sba ta stojol.
9 Te David jich la sjojkʼoybey te Saúl: «¿Bin yuʼun ya achʼuun te machʼatik jich ya yalik: ‹Te David ay bin chopol* ya skʼan ya spasbat›?
10 Yoʼtik, jaʼatnix ya xjuʼ ya awil te la yakʼat ta jkʼab te Jehová ta yutil chʼen. La yalbonik te yakuk jmilate, pero la jnaʼbat yoʼbolil aba sok jich la kal ta koʼtan: ‹Maba ya jkontrain te kajwal, melel jaʼ te machʼa tsabil yuʼun te Jehová›.
11 Ilawil, kajwal, ilawil te stiʼil te anajtil kʼuʼ te maʼyuk skʼab te jtsakoje. Te kʼalal la jsetʼbat lokʼele juʼ te lajuk jmilate, pero maba la jpas. Jich yuʼun ya xjuʼ ya awil sok ya anaʼ stojol te maʼyuk bin chopol* ya jkʼan ya jpasbat ni jaʼuk te ya jtoy jba ta atojole. Te joʼone, maʼyuk jtaoj jmul ta atojol. Yan te jaʼate yak alebelon yuʼun ya amilon.
12 Jaʼ akʼa schajpanotik ta jchebaltik te Jehová. Jaʼ akʼa yakʼbat spakol stukel te Jehová ta swenta te bin ya apasbone, yan te joʼone maʼyuk bin-ora ya jkontrainat.
13 Jich te bitʼil ya yal te antiguo kʼop ini ‹Te machʼatik chopolik,* jaʼ ya spasik te bin chopole›. Jich yuʼun, maba ya kakʼ jkʼab ta atojol.
14 ¿Machʼa-a te ya akʼan ya atsak, ajwalil yuʼun Israel? ¿Machʼa-a te yakat ta snutsele? ¿Joʼonbal te jichon te bin-utʼil chamen tsʼiʼ sok jich te bin-utʼil jkojt chʼak te maʼyuk skʼoplale?
15 Jaʼ akʼa ochuk ta juez ta jtojoltik te Jehová sok jaʼ akʼa schajpanotik ta jchebaltik. Jaʼme ya yil te bin yak ta kʼoel ta pasel sok jaʼme ya skoltayon. Jaʼme ya yal teme ay jmul sok jaʼ ya skoltayon lokʼel ta akʼab».
16 Te kʼalal lajnax yoʼtan te David ta yalel-abi, jich la sjojkʼoy te Saúl: «¿Jaʼatbal, jnichʼan David, te yakat ta kʼope?».* Jich jajch ta tulan okʼel te Saúl.
17 Te Saúl jich la yalbey te David: «Te jaʼate jaʼ kʼax tojxan awoʼtan-a te bitʼil te joʼone, melel te jaʼate lek awoʼtan ta jtojol, yan te joʼone ma lek te bintik jpasoj ta atojole.
18 Yoʼtik la awalbonix kaʼiy te bin lek la apas ta jtojole, melel la yakʼon ta akʼab te Jehová, pero maba la amilon.
19 ¿Machʼa-a te ya sta te skontra te jichnax ya skoltay bael te maʼyuk bin ya spasbeye? Te Jehová yame smajtantesat ta swenta te bin lek la apas ta jtojol ta kʼajkʼal ini.
20 Yoʼtik la jnaʼix stojol te jaʼat ya x-ochat ta ajwalil sok te jaʼ ya xjil ta akʼab te wentainel yuʼun Israel.
21 Jich yuʼun albon ta jamal ta stojol te Jehová te maba ya alajinbon te jtsʼumbal te kʼalal maba kuxulonix-ae. Albon kaʼiy ta jamal te maba ya alajinbey skʼoplal te jbiil ta sfamilia te jtate».
22 Jich te David la yalbey ta jamal te Saúl te ya skʼotes ta pasel te bin kʼanbote. Tey-abi sujt bael ta sna te Saúl, yan stukel te David sok te swiniktak moik bael te banti snakʼoj sbaik-ae.
Notaetik
^ O jaʼniwan ya skʼan ya yal «la spuktiklan bael».
^ Ta yantik variante «ma lek».
^ Ta yantik variante «ma lek».
^ Ta yantik variante «ma lek stalelik».
^ Ta yantik variante «aʼiyeje».
