1 Samuel 25:1-44
25 Ta patil laj te Samuel. Spisil la stsob sbaik tal te israeletik yuʼun la yokʼetayik te Samuel sok la smukik ta Ramá te banti ay-a te snae. Tey-abi, te David ko bael ta jochol takin kʼinal yuʼun Parán.
2 Ay jtul jkʼulej winik ta Maón te ay bayal schambalam ta Carmelo.* Ay 3 mil ta kojt tuminchijetik yuʼun sok jmil ta kojt tentsunetik yuʼun. Ta jun buelta yak ta sjoxbeyel* te stsotsel te tuminchijetik yuʼun ta Carmelo.
3 Nabal sbiil te winik, talem ta stsʼumbal Caleb, Abigaíl sbiil te yiname. Ay spʼijil yoʼtan sok tʼujbil ants, yan stukel te smamalale tulan yoʼtan sok chopol* te bintik ya spase.
4 Te k’alal ay ta jochol takin kʼinal-a te David, la yaʼiy stojol te yak ta sjoxbeyel* te stsotsel te tuminchijetik yuʼun te Nabal.
5 Jich yuʼun, te David la stikun lajuntul swiniktak sok jich la yalbey: «Moanik bael ta Carmelo, teme kʼoex te banti ay te Nabal, jojkʼoybeya awaʼiyik ta jwenta teme lek aye.
6 Jichme ya awalbeyik: ‹Kuxinan bayal jaʼbil, ayukme lamalkʼinal awuʼun sok lekukme ayik spisil te machʼatik ay awuʼun sok spisil te bintik ay awuʼune.
7 La kaʼiy stojol te yakat ta sjoxbeyel* te stsotsel te tuminchijetik awuʼune. Te kʼalal sjokinojonkotik-a te jkanantuminchijetik awuʼune, maba la kutsʼinkotik* sok maʼyuk bin la yichʼik pojbeyel te jayeb tiempo ayinik ta Carmelo.
8 Jojkʼoybeya te j-abatetik awuʼune, jaʼme ya yalbat awaʼiy. Jich yuʼun ya jkʼanbat wokol te lekuk ya awilbon te jwiniktake, melel ta kʼajkʼal ini jaʼ yorail bayal tseʼel oʼtanil. Awokoluk, akʼbeya te j-abatetik awuʼun sok te David te anichʼan chikan bin-a te ya akʼan ya awakʼbonkotike›».
9 Jich moik bael te swiniktak te David sok kʼot yalbeyik yaʼiy te Nabal te bin albotik bael yuʼun te David. Te kʼalal lajnax yoʼtanik ta yalbeyele,
10 te Nabal jich la yalbey te swiniktak te David: «¿Machʼa-a te Davide? ¿Machʼa ya skuy sba-a te snichʼan Jesé? Ta ora ini bayal ta tul j-abatetik te ya xlokʼik ta anel ta stojol te yajwalike.
11 ¿Bin yuʼun ya kakʼbey te pan kuʼun, te kaʼal sok te jtiʼbal te yantik winiketik te ma jnaʼ te banti talemik te jaʼ jchajpanoj ta stojol te machʼatik ya sjoxbeyik* te stsotsel te tuminchijetike?».
12 Jich sujtik tal te swiniktak te David sok la scholbeyik yaʼiy spisil te bin la yal te Nabal.
13 Te David jich la yalbey ta mantal ta oranax te swiniktake: «¡Tsaka te awespadaik ta jujuntul!». Ta spisilik la schuk yespadaik ta schʼujtik soknix-euk te Davide. Ayniwan 400 ta tul winiketik te jokinot moel yuʼun te David sok ayniwan 200 ta tul te jilik ta skanantayel te biluketike.
14 Te kʼalal jich yak ta kʼoel ta pasel-ae, ay jtul j-abat te jich bajt yalbey te Abigaíl te yinam te Nabal: «Te David te ay ta jochol takin kʼinal la stikun tal chaʼoxtul winiketik swenta ya spatbey yoʼtan te kajwale, pero te kajwale tulan la sutbey te skʼopik sok la schopolkʼoptay bael.
15 Te winiketik-abi kʼax lek la yilonkotik. Maʼyuk bin-ora la yutsʼinonkotik* sok maʼyuk machʼa ay bin la spojbotik te jayeb tiempo la jokinlantik ta Carmelo.
16 Ta kʼajkʼal ajkʼabal jich kʼotik te bin-utʼil tsʼajkʼ ta jtojolkotik. La skanantayotik te jayeb tiempo ayinotik ta skanantayel te tuminchijetike.
17 Nopa ta lek te bin ya apase, ayme bin chopol* ya xbajt kʼotuk ta stojol te kajwaltik sok ta stojol spisil te machʼatik ay yuʼun, melel jaʼ jtul winik te jkʼaxel ma xtuun sok te jkʼaxel ma xjuʼ ta kʼoponele».
18 Jich yuʼun, te Abigaíl la schajpan ta oranax 200 ta pejch pan, cheb mukʼul jarra yuʼun vino, joʼkojt tuminchijetik te milbilix bael yuʼun, joʼeb sea* chʼilbil sit awal tsʼunubil, 100 ta pejch tenbil takin tsʼusub sok 200 ta pejch tenbil takin higo, jich la yakʼbey bael skuch chaʼoxkojt burroetik.
19 Jaʼ yuʼun, jich la yalbey te j-abatetik yuʼune: «Nailajanik, yame jtʼunex bael». Pero, maʼyuk bin la yalbey te Nabal te smamalale.
20 Te k’alal yak ta koel tal ta wits-a te Abigaíl te kajal ta sburroe, maba ilot yuʼun te David sok te swiniktak, melel jaʼ makbil yuʼun te witse. Te David sok te swiniktak jaʼnix jich yakik ta koel tal-euk, jich la sta sbaik ta be.
21 Jich yak ta yalel-a te David: «Joʼon la jkanantaybey spisil te sbiluk ta jochol takin kʼinal te winik ini, pero tojolnax te bin la jpase. Maʼyuk machʼa ay bin pojbot yuʼun, manchukme jich-abi ya sujtesbon ta bin chopol* te bin lek la jpas ta stojole.
22 Teme ay kuxul jilel jtuluk kuʼun te swiniktak* ta sab pajel, akʼa akʼbotuk tulan castigo yuʼun Dios te jkontratake».*
23 Kʼalal te Abigaíl la yil te David, ta oranax ko ta sburro sok la spajkan sba kʼalal ta lum ta stojol te David.
24 La spajkan sba ta yok te David sok jich la yalbey: «Kajwal, joʼon akʼbon jmulin te bin kʼot ta pasele. Awokoluk, aʼiybon te jkʼope. Aʼiybeya te skʼop te j-abat awuʼun ini.
25 Awokoluk, kajwal, ma xa awichʼ ta mukʼ te bin la yal te Nabal. Jaʼ jtul winik te jkʼaxel ma xtuun, melel jaʼ jich stalel te bitʼil te sbiile. Nabal* sbiil sok jkʼaxel ma snaʼ kʼinal. Yan te joʼon, te j-abaton awuʼune, maba la kil te awiniktak te la atikune, kajwal.
26 Jich yuʼun, kajwal, jamal ya kalbat ta stojol te Jehová te kuxul Dios sok te kuxulat-euk te jaʼ Jehová te machʼa ya skomat yuʼun ma jaʼukat ya asutbey spakol sok te jich ya amulin smalel chʼichʼ. Jichukme ya xkʼot te bitʼil te Nabal te akontratak sok te machʼatik ya skʼan ya yutsʼinate.*
27 Jich yuʼun, kajwal, la kichʼbat tal te majtanil ini swenta ya awakʼbey te awiniktak te sjokinojate.
28 Awokoluk, pasbon perdón teme ay banti jelawon ta atojole. Kajwal, jnaʼoj te maʼyuk bin-ora ya yakʼ xlaj skʼoplal te atsʼumbal* te Jehová, melel jaʼ yuʼun Jehová te guerraetik te ya apase sok maʼyuk bin chopol* apasoj te jayeb kʼajkʼal kuxulate.
29 Kajwal, teme ay machʼa ya snutsat sok ya skʼan ya smilat, te Jehová te Dios awuʼun yame skʼejbat ta lek te akuxlejal ta morral yuʼun kuxlejalil. Yan stukel te skuxlejal te akontratake namalme* ya schʼoj bael stukel, jich te bin-utʼil ya yichʼ chʼojel bael te ton ta jimochʼ.
30 Te kʼalal skʼotesojix ta pasel spisil-a te bintik lek yalojbat ta jamal te Jehová sok te kʼalal yotsesojatix ta jwolwanej yuʼun-a te lum Israel,
31 mame ayuk bin ya amel awoʼtan yuʼun sok mame ayuk bin chopol* ya yalbat awoʼtan, melel ma jaʼukat la asutbey spakol sok maʼyuk te jichnax la amal chʼichʼ. Kajwal, te kʼalal ya yakʼbat bendición te Jehová, naʼawon joʼon te j-abaton awuʼune».
32 Ta swenta-abi, te David jich la yalbey te Abigaíl: «¡Akʼa yichʼ albeyel yutsil skʼoplal te Jehová te Dios yuʼun Israel te jaʼ la stikunat tal yuʼun ya ataon ta be ta kʼajkʼal ini!
33 ¡Bayalukme yutsil te spʼijil awoʼtan! Akʼa yakʼbat bendición te Dios ta swenta te la akomon te jich maba la jsutbey spakol sok te maba la jta jmul ta smalel chʼichʼ.
34 Jamal ya kalbat ta stojol Jehová te kuxul Dios, te Dios yuʼun Israel —te jaʼ la skomon yuʼun maba ya jmilat— te manchuk tal akʼoponon ta orae, maʼyuk ni jtuluk swiniktak* te Nabal kuxul ya xjil pajel ta sab te jichuke».
35 Jich yuʼun, te David la stsak jilel te bin ichʼbot tal yuʼun te Abigaíl sok jich la yalbey: «Junukme awoʼtan ya sujtat bael ta ana. La kaʼiyix stojol te bin la awalbone sok yame jpas te bin la akʼanbone».
36 Tey-abi, te Abigaíl sujt bael te banti ay te Nabal, yak ta spasel mukʼul kʼin kʼot sta jich te bin-utʼil ya spas jtul ajwalil. Kʼax tseʼel yoʼtan-a te Nabal sok kʼax yakuben-a. Jich yuʼun te Abigaíl maʼyuk bin la yalbey jaʼto te kʼalal sakub te kʼinale.
37 Ta sab ta yan kʼajkʼal, te kʼalal kʼaxemix-a te syakubel te Nabal, cholbot yaʼiy yuʼun te yinam spisil te bin kʼot ta pasele. Toj sikubel yoʼtan jich te bin-utʼil te machʼa ya xlaje, maba la stijix sba jich te bin-utʼil ton.
38 Ayniwan lajuneb kʼajkʼal ta patil, te Jehová la yakʼ lajuk te Nabal.
39 Te kʼalal la snaʼ stojol te David te laj te Nabal, jich la yal: «¡Akʼa yichʼ albeyel yutsil skʼoplal te Jehová! Melel jaʼ la skoltayon ta swenta te la skʼexlalteson te Nabal. Te Jehová la skomon yuʼun maba la jpas te bin chopol* sok jaʼ la yakʼ sujtuk ta stojol te schopolil te Nabal». Ta patil, te David la stikun ta albeyel te Abigaíl te ya skʼan ya xnujpun sok.
40 Te kʼalal kʼotik ta Carmelo te j-abatetik yuʼun te David, jich la yalbeyik te Abigaíl: «Te David la stikunonkotik tal ta atojol, melel yalaj skʼan ya xnujpunat sok».
41 Te Abigaíl ta oranax la spajkan sba k’alal ta lum sok jich la yal: «Liʼ ayoni, jun koʼtan ya kakʼ jba ta scriada sok ta j-abat yuʼun swenta ya jpokbey yok te j-abatetik yuʼun te kajwale».
42 Jajch ta oranax te Abigaíl, mo ta sburro sok la yikʼ bael joʼtul scriada, ta yok bajt stukelik. Jich te Abigaíl la sjokin bael te swiniktak te David sok jich inaminot yuʼun te Davide.
43 Te David nujpunemix sok-a te Ahinoam te talem ta Jezreel. Jich la yinamin ta schebal te antsetike.
44 Te Saúl la yakʼbey yinamin Paltí te Mical, te jaʼ yinam te David. Te Paltí jaʼ snichʼan Lais te talem ta Galim.
Notaetik
^ Jaʼ jpam mukʼul lum te ay ta Judá; mame jaʼuk skʼoplal te wits Carmelo.
^ Ta yantik variante «sjochbeyel».
^ Ta yantik variante «ma lek».
^ Ta yantik variante «sjochbeyel».
^ Ta yantik variante «sjochbeyel».
^ Ta yantik variante «kilbajintik».
^ Ta yantik variante «sjochbeyik».
^ Ta yantik variante «yilbajinotik».
^ Ta yantik variante «ma lek».
^ Jaʼniwan 36.65 litro. Ilawil ta apéndice, B14.
^ Ta yantik variante «ma lek».
^ Ta hebreo: «te machʼatik ya schuxtayik pajkʼ». Jaʼ jich ya yichʼ alel ta hebreo kʼop te kʼalal ya schopolkʼoptayik te winiketike.
^ O jaʼniwan ya skʼan ya yal «akʼa yakʼbon tulan castigo te Diose».
^ Te ya skʼan ya yal «maʼyuk spʼijil yoʼtan» o «ma snaʼ kʼinal».
^ Ta yantik variante «yilbajinate».
^ Jaʼ ya yalbey skʼoplal stsʼumbal ajwalil.
^ Ta yantik variante «ma lek».
^ Ta yantik variante «jakalme», «kʼubulme».
^ Ta yantik variante «ma lek».
^ Ta hebreo: «ni jtuluk te ya schuxtay pajkʼ». Jaʼ jich ya yichʼ alel ta hebreo kʼop te kʼalal ya schopolkʼoptayik te winiketike.
^ Ta yantik variante «ma lek».
