1 Samuel 26:1-25
26 Ta patil, te winiketik yuʼun Zif bajtik ta Guibeá sok jich la yalbeyik te Saúl: «Te David snakʼoj sba ta chʼin wits yuʼun Hakilá ta yelaw Jesimón».*
2 Jich ko bael ta jochol takin kʼinal yuʼun Zif te Saúl sok yikʼoj bael 3 mil ta tul soldadoetik yuʼun Israel te pʼijubenik ta lek ta yakʼel guerra yuʼun jich bajt sleik te Davide.
3 Te Saúl la spas scampamento ta tiʼbe ta chʼin wits yuʼun Hakilá te ay ta yelaw Jesimón. Te David ay ta jochol takin kʼinal-a sok la yaʼiy stojol te tal ta leel yuʼun te Saule.
4 Jich yuʼun, te David la stikun bael chaʼoxtul jtsajtaywanejetik ta yilel teme yuʼun-nix tey ay-a te Saule.
5 Tey-abi, te David bajt te bantito spasoj scampamento te Saúl, la yil te banti wayal te Saúl sok te Abner snichʼan Ner te jaʼ capitán yuʼun te soldadoetik yuʼune. Te Saúl wayal ta yolil te campamento, te soldadoetik yuʼune spasoj scampamentoik ta sjoyobal te Saule.
6 Te David jich la sjojkʼoybey te Ahimélec te hitita-winik sok te Abisái yal Zeruyá, sbankil Joab: «¿Machʼa ya sjokinon koel ta scampamento te Saúl?». Jich la yal te Abisái: «Joʼon ya jokinat bael».
7 Te kʼalal ajkʼabalix-ae, te David sok te Abisái ochik bael ta scampamento te Saúl sok wayal kʼot staik, te slanza tsʼapal ta lum ta stsʼeel sjol. Te Abner sok te soldadoetik wayalik ta sjoyobal te Saúl.
8 Te Abisái jich la yalbey te David: «Ta ora ini, te Dios la yakʼbatix ta akʼab te akontrae. Awokoluk, akʼbon permiso yuʼun ya jtsʼap ta lum sok te lanzae. Jun-nax buelta ya jtsʼap ta lum, maba cheb buelta ya kakʼbey».
9 Pero, te David jich la yalbey te Abisái: «Mame ayuk bin xa apasbey. ¿Aybal machʼa ya xjuʼ ya skontrain te machʼa tsabil yuʼun te Jehová te maʼyuk smul ya xkʼot yuʼune?».
10 Jich la yalxan te David: «Jamal ya kalbat ta stojol Jehová te kuxul Dios te jaʼnixme ya xmilot yuʼun te Jehová o ya sta yorail te ya xlaj jich te bitʼil ya xlajotik ta jpisiltik o ya xjuʼ ya xlaj te kʼalal ya xbajt ta guerra.
11 Ma jichuk ya snop stukel te Jehová, jich yuʼun ¡maʼyuk bin-ora ya jkontrain te machʼa tsabil yuʼun te Jehová! Jaʼ yuʼun tsaka bael te slanza te ay ta stsʼeel sjol sok te sjarraul yaʼal, konik».
12 Tey-abi, te David la stsak bael te slanza sok te sjarraul ya’al te Saúl te ay ta stsʼeel sjol, jich lokʼik bael tey-a. Maʼyuk machʼa ilotik yuʼun sok maʼyuk machʼa la snaʼ stojol. Spisil ochem swayelik-a. Maʼyuk machʼa wijkʼ sitik, melel jaʼ Jehová te machʼa kʼubtesbot swayelik yuʼune.
13 Jich yuʼun, te David kʼax bael ta jejch spamlej sok la stejkʼan sba ta sjol wits, namal* ayikix ta stojol-a te Saule.
14 Te David jich la yawtay te soldadoetik sok te Abner snichʼan Ner: «¡Abner! ¡Aʼiybon awaʼiy te jkʼope!». Jich la sjakʼ te Abner: «¿Machʼaat-a te yakat ta yawtayel te ajwalile?».
15 Te David jich la yalbey te Abner: «¿Mabal jaʼukat te ma xiw awoʼtane? Maʼyuk yan ta lum Israel jich te bitʼil te jaʼate. Jich yuʼun, ¿bin-utʼil ay-a te maba la akanantay te ajwalil awuʼune? Melel ay och jtul soldado ta acampamentoik yuʼun ya smil te ajwalile.
16 Ma lek la apas te awaʼtele. Jamal ya kalbat ta stojol Jehová te kuxul Dios te snujpʼ te ya awichʼik milel, melel maba yakex ta skanantayel te awajwalik te machʼa tsabil yuʼun te Jehová. ¡Ilawil ta ajoyobal! ¿Banti ay te slanza te ajwalil sok te sjarraul yaʼal te ay ta stsʼeel sjol-ae?».
17 Te Saúl la snaʼbey sba te skʼop te David sok jich la yalbey: «¿Jaʼatbal, jnichʼan David, te yakat ta kʼope?».* Jich la sjakʼ te David: «Jaʼ, joʼon kajwal».
18 Jich la yalxan te David: «Kajwal, ¿bin yuʼun te yakat ta snutsel te j-abat awuʼun ini? ¿Bin-a te jpasoje? ¿Bin-a te jmule?
19 Awokoluk, ajwalil kuʼun, aʼiybeya skʼop te j-abat awuʼun ini. Teme jaʼ Jehová te machʼa yakʼojat ta jkontrae, akʼa stsakbon te majtanil yuʼun te sit awal tsʼunubil te ya kakʼbeye. Pero, teme talem ta stojol ants winiketik, bolobenuk skʼoplal ya xkʼotik ta stojol te Jehová. Melel la atenonik lokʼel sok la anamajtesonik* ta stojol te lum* yuʼun te Jehová. Jich kʼoem te jich la awalbonike: ‹¡Baan, ichʼa ta mukʼ yantik diosetik!›.
20 Jich yuʼun ya jkʼanbat wokol te ma xa awakʼ xmal jchʼichʼel ta yan lum te namal* ay ta stojol te Jehová, melel te ajwalil yuʼun Israel lokʼ ta sleel jkojt chʼak te maʼyuk skʼoplal. Jaʼ jich kʼoem te yak ta snutsel jkojt perdiz-mut ta witstikil».
21 Te Saúl jich la yalbey te David: «Jtaoj jmul ta atojol. Sujtan tal, jnichʼan David, maʼyuk bin chopol* ya jpasbatix. Ta ora ini la awakʼ ta ilel te mukʼ skʼoplal ta awoʼtan te jkuxlejale. Kʼax ma lek te bin jpasoj sok kʼaxto jtaoj jmul ta atojol».
22 Te David jich la yalbey te Saúl: «Liʼme ay te lanza awuʼune ajwalil. Akʼa taluk jtuluk te awiniktak yuʼun ya xtal yichʼ bael.
23 Jaʼme ya stoj te Jehová ta jujuntul jaʼ chikan te bin toj spasojik sok teme jun yoʼtanike. Manchukme la yakʼat ta jkʼab te Jehová te naxe, ma la jkʼan la jkontrain te machʼa tsabil yuʼun te Jehová.
24 Mukʼukme skʼoplal ta yoʼtan te Jehová te jkuxlejale jich te bitʼil mukʼ skʼoplal la kil te akuxlejal te naxe. Jaʼ akʼa skoltayon lokʼel ta spisil te jwokole».
25 Jich la yal te Saúl: «Jnichʼan David, akʼame yakʼbat bendición te Diose. Bayalme bintik mukʼ skʼoplal ya xbajt apas sok lekme ya xkʼot ta lokʼel awuʼun». Jich la stsakxan bael sbe te David, yan stukel te Saúl sujt bael ta sna.
Notaetik
^ O jaʼniwan ya skʼan ya yal «jochol takin kʼinal».
^ Ta yantik variante «jakal», «kʼubul».
^ Ta yantik variante «aʼiyeje».
^ Ta yantik variante «ajakaltesonik», «akʼubtesikon».
^ Ta hebreo: «te bin akʼbil» teyniwan ochem skʼoplal-a te ants winiketik sok te kʼinal te la yichʼik akʼbeyele.
^ Ta yantik variante «jakal», «kʼubul».
^ Ta yantik variante «ma lek».
