1 Samuel 27:1-12
-
Te filisteoetik la yakʼbeyik te lum Ziclag te David (1-12)
27 Pero, jich la yal ta yoʼtan te David: «Ayniwan bin-ora ya xjuʼ ya smilon te Saúl. Jaʼ lek te ya xboon ta anel ta skʼinal te filisteoetike. Jich te Saúl maba ya sleonix ta spamal skʼinal Israel sok jichme ya xkolon lokʼel ta skʼab».
2 Jich yuʼun, te David sok te 600 ta tul winiketik te jokinbil yuʼune, bajtik te banti ay te Akís snichʼan Maoc, te ajwalil yuʼun Gat.
3 Te David sok te swiniktak nainik sok te sfamiliaik ta Gat te banti ay te Akís. Te David jokinbil yuʼun te chaʼtul yiname: jaʼ te Ahinoam te talem ta Jezreel sok te Abigaíl te carmelita-ants, jaʼ te meʼba ants yuʼun Nabal.
4 Te kʼalal la yalbeyik yaʼiy te Saúl te bajt ta anel ta Gat te David, la yijkitay ta sleel.
5 Te David jich la yalbey te Akís: «Teme lek ya awile, akʼbon junuk lugar ta chʼin lumetik yuʼun ya xnainon tey-a. Melel ¿bin yuʼun te ya sjokinat ta kuxinel te j-abat awuʼun ini ta mukʼul lum te banti ya xmantalajate?».
6 Ta kʼajkʼal-abi, te Akís la yakʼbey te lum Ziclag. Jich yuʼun, te lum Ziclag jaʼ yuʼun te ajwaliletik yuʼun Judá jaʼto ta ora ini.
7 Te jayeb tiempo nain ta skʼinal filisteoetik te David jaʼ jun jaʼbil sok chaneb u.
8 Te David sok te swiniktak moik bael ta yakʼbeyel guerra te guesuritaetik, guirzitaetik sok te amalequitaetik, melel te kʼinal te banti nainemik-ae ya xjajch bael ta Telam jaʼto kʼalal ta Sur, ya xkʼot kʼalal ta skʼinal Egipto.
9 Te kʼalal ya xbajt yakʼbey guerra te David te lumetik-abi, ya smil spisil te winiketik sok te antsetik. Pero ya yikʼ bael stukel te tuminchijetik, wakaxetik, burroetik, camelloetik sok te kʼuʼul pakʼal. Ta patil ya sujt bael ta stojol te Akís.
10 Jich ya xjojkʼoybot yuʼun te Akís: «¿Bintik lumetik la awakʼbey guerra te naxe?». Jich ya yal te David: «Ta sur* yuʼun Judá», o «Ta sur yuʼun te skʼinal jerahmeelitaetik», o «Ta sur yuʼun te skʼinal quenitaetik».
11 Te David la smil spisil te winiketik sok antsetik yuʼun jich maʼyuk jtuluk ya yichʼ ikʼel bael ta Gat, melel jich ya yal: «Mame jaʼuk te ya yakʼotik ta naʼel te jich ya xbajt yalik ta jtojoltik ‹Jich la spas te David›». (Jich la spasulan te jayeb tiempo nain ta skʼinal te filisteoetike).
12 Spisil-ora la schʼuun te Akís te bin albot yuʼun te David sok jich la yal ta yoʼtan: «Jkʼaxel ya x-ilayotix yuʼun te slumale, jaʼ te lum Israel, jichme j-abat ya xkʼot kuʼun ta spisil-ora te David».
Notaetik
^ O «Ta Négueb».
