1 Samuel 28:1-25
-
Te Saúl bajt skʼopon jtul espiritista ants ta En-Dor (1-25)
28 Ta yorail-abi, te filisteoetik la stsobik tal te soldadoetik yuʼunik swenta ya yakʼbeyik guerra te lum Israel. Jaʼ yuʼun, te Akís jich la yalbey te David: «Anaʼoj ta lek te yame ajokinonik bael ta yakʼel guerra jaʼat sok te awiniktak».
2 Te kʼalal jich la yaʼiy stojol te David, jich la yal: «Anaʼoj ta lek te bin ya xbajt spas te j-abat awuʼun ini». Jich albot yuʼun te Akís: «Jaʼ yuʼun yame x-ochat ta jkanan kuʼun ta spisil-ora».
3 Ta yorail-abi, te Samuel lajemix-a. Spisil te lum Israel yakik ta mel-oʼtan yuʼun te Samuel sok la smukik ta Ramá te banti slumal-ae. Te Saúl slajinojbeyix skʼoplal-a te machʼatik ya spasik espiritismo* sok te jnaʼojeletik ta spamal te lume.
4 La stsob sbaik tal te filisteoetik, bajtik ta Sunem sok tey la spas scampamentoik-a. Jich yuʼun, te Saúl la stsob tal te soldadoetik yuʼun Israel sok la spas scampamentoik ta Guilboa.
5 Te kʼalal la yil te Saúl te scampamento te filisteoetik, kʼax bayal xiw yuʼun.
6 Manchukme te Saúl ya sjojkʼoybey-a te Jehová te bin ya xjuʼ ya spase, maʼyuk bin-ora sutbot skʼop yuʼun te Jehová, ni jaʼuk ta swenta te wayichiletik ni jaʼuk ta swenta te Urim* ni jaʼuk ta swenta te j-alwanejetike.
7 Ta patil, te Saúl jich la yalbey ta mantal te j-abatetik yuʼune: «Lebonik jtul espiritista* ants yuʼun ay bin ya jkʼan ya xbajt jojkʼoybey». Jich albot yuʼun te j-abatetik yuʼune: «Ay jtul espiritista ants ta En-Dor».
8 Jich yuʼun, te Saúl la slap yan kʼuʼul yuʼun maba ya yichʼ naʼbeyel sba-a, ta ajkʼabal bajt yil te espiritista* antse sok jokinot bael yuʼun chaʼtul swiniktak. Te Saúl jich la yalbey te espiritista ants: «Awokoluk, albon kaʼiy te bin ya xkʼot ta pasel ta pajel chaʼbeje. Ikʼbon tal te machʼa ya kalbate».
9 Pero, jich la yal te antse: «Anaʼoj te bin la spas te Saúl, la slajinbey skʼoplal te machʼatik ya spasik espiritismo* sok te jnaʼojeletik ta spamal te lume. Jaʼ yuʼun, ¿bin yuʼun te tal aloʼlayon te ya xjuʼ ya kichʼ milel yuʼune?».
10 Te Saúl jich la yal ta jamal ta stojol te Jehová: «¡Jamal ya kal ta stojol Jehová te kuxul Dios te maba ya ata amul ta swenta te bin ya apase!».
11 Te kʼalal jich la yaʼiy stojol te ants, jich la sjojkʼoy: «¿Machʼa ya akʼan te ya kikʼ tale?». Jich la yal te Saúl: «Jaʼ xa awikʼ tal te Samuel».
12 Te kʼalal la yil te ants te «Samuel»,* tulan awun sok jich la yalbey te Saúl: «¿Bin yuʼun te la aloʼlayone? Melel, ¡jaʼat te Saule!».
13 Te ajwalil Saúl jich la yalbey te ants: «Ma xiwat. Albon kaʼiy, ¿bin-a te yakat ta yilele?». Jich la yal te antse: «Ya kil te ay machʼa yak ta moel tal ta lumkʼinal te jaʼ jun dios yilele».
14 Jich la sjojkʼoybey ta oranax te antse: «¿Bin yilel?». Jich la yal te antse: «Te machʼa yak ta moel tale jaʼ jtul mamal sok slapoj snajtil kʼuʼ te maʼyuk skʼab». Te kʼalal la snaʼ stojol te Saúl te jaʼ te «Samuel», la spajkan sba kʼalal ta lum sok la snijan sba ta stojol.
15 Jich yuʼun, te «Samuel» jich la sjojkʼoybey te Saúl: «¿Bin yuʼun te la awutsʼinon* te la awikʼon moel tal?». Jich la yal te Saúl: «Jaʼ ta swenta te ayon ta tulan wokole. Yak yakʼbelonik guerra te filisteoetik, namajemix* ta jtojol te Dios sok maba ya sutbonix te jkʼope ni jaʼuk ta swenta te j-alwanejetik ni jaʼuk ta swenta wayichiletik. Jaʼ yuʼun tal jkʼoponat yuʼun ya awalbon kaʼiy te bin ya skʼan ya jpase».
16 Pero, jich albot yuʼun te «Samuel»: «Teme namajemix* ta atojol te Jehová sok jaʼ akontraix ta ora ini, ¿bin yuʼun te joʼon ya xtal ajojkʼoybone?
17 Te Jehová yame skʼotes ta pasel te bin la yalbon te ya skʼotes ta pasele: te Jehová yame spojbat ta akʼab te wentainel sok jaʼme ya yakʼbey te Davide.
18 Te jaʼate maba la achʼuunbey skʼop te Jehová sok maba la alajinbey skʼoplal te amalequitaetik te jaʼik te machʼatik la sjachbeyik yilinbae. Jaʼ yuʼun, jich la spasbat te Jehová ta ora ini.
19 Te Jehová yame yakʼat ta skʼab te filisteoetik soknix te lum Israele. Te pajele liʼme ya ajokinonix sok te anichʼnabe. Jaʼnix jich, te Jehová yame yakʼ ta skʼab te filisteoetik te soldadoetik yuʼun Israel».
20 Te Saúl ta oranax yal koel ta lum sok tey metsel jilel-a. Bayal xiw yuʼun te bin la yal te «Samuel». Ta skaj te maʼyuk bin sweʼoj ta sjunal kʼajkʼal sok sjunal ajkʼabal, maʼyuk yip-a.
21 Te kʼalal noptsaj* bael te ants ta stojol te Saúl sok la yil te bayal ay ta xiwele, jich la yalbey: «Kajwal, la jchʼuun spasel te bin la awalbon ta mantale. Manchukme ya xjuʼ ya kichʼ milel yuʼun, la jpas te bin la awalbone.
22 Awokoluk, kajwal, ta ora ini aʼiybon te jkʼope. Ya jkʼan ya kichʼbat tal jxejtʼuk pan yuʼun ya atsakxan awip swenta jich ya xjuʼ ya atsakxan bael abe».
23 Pero ma la skʼan te Saúl sok jich la yal: «Ma jkʼan ya xweʼon». Pero, ta skaj te bayal wulwultayot yuʼun te swiniktak sok te antse, la schʼuun te bin albote. Jajch te banti metsel ta lum sok la snajkan sba ta wayibal.
24 Te antse ay jkojt jujpʼen jkolel* toro yuʼun, jich la smil ta oranax. Jaʼnix jich la stsak tal harina, la swotsʼ sok la spas pan te maba yichʼoj levadura.
25 Jich te antse la yakʼbey sweʼel te Saúl sok te swiniktak, jich jajchik ta weʼel. Ta patil, te kʼalal laj yoʼtanik ta weʼele, bajtik ta ajkʼabal.
Notaetik
^ Jtul ants winik te ya yichʼ tuuntesel yuʼun pukuj te ya x-akʼbot snaʼ te bin ya xkʼot ta pasele.
^ Jtul ants winik te ya yichʼ tuuntesel yuʼun pukuj te ya x-akʼbot snaʼ te bin ya xkʼot ta pasele.
^ O «jaʼ yilel te Samuel».
^ Ta yantik variante «awilbajinon».
^ Ta yantik variante «jakalajemix», «kʼubul ayix».
^ Ta yantik variante «jakalajemix», «kʼubul ayix».
^ Ta yantik variante «jijtsʼaj», «tijtsaj».
^ Ta yantik variante «jchʼiel».
