1 Samuel 29:1-11
-
Te filisteoetik maʼyuk smukʼul yoʼtanik ta stojol te David (1-11)
29 Te filisteoetik la stsobik tal spisil te soldadoetik yuʼunik ta Afec, yan stukel te israeletik spasoj scampamentoik ta stsʼeel te slokʼib jaʼ yuʼun Jezreel.
2 Te ajwaliletik yuʼun te filisteoetik yakik ta kʼaxel bael sok te soldadoetik yuʼunik ta jujuntsojb ta 100 ta tul sok ta jujuntsojb ta mil ta tul. Te David sok te swiniktak yakik ta beel ta patil sok te Akís.
3 Pero, te machʼatik yichʼoj mukʼ yaʼtelik yuʼun te filisteoetik jich la sjojkʼoyik: «¿Bin yuʼun te liʼ ayik te hebreo-winiketik ini?». Jich jakʼbotik yuʼun te Akís: «Jaʼ te David, te j-abat yuʼun te Saúl te ajwalil yuʼun Israel. Ayniwanix jun jaʼbil te sjokinojone. Jaʼto tal te bin-ora la yijkitay te Saúl sok te tal sjokinone, maʼyuk bin chopol* jtaojbey».
4 Pero, te machʼatik yichʼoj mukʼ yaʼtelik yuʼun te filisteoetik ilinik ta stojol te Akís sok jich la yalbeyik: «Albeya te ak’a bajtuk te winik ini. Ak’a sujtuk bael ta lugar te banti awakʼojbeye. Ma xa awakʼ te ya xtal sjokinotik ta yakʼel guerra, mame jaʼuk te ya xjajch skontrainotik te kʼalal yakotik ta yakʼel guerrae. ¿Mabal jaʼuk lek ya x-ilot yuʼun te yajwal teme jaʼ ya yichʼbey bael te sjol te winiketik kuʼuntike?
5 ¿Mabal jaʼuk te David ini te jich la yalbeyik skʼoplal ta kʼayoj sok ta ajkʼot:
‹Te Saúl la smiltiklan jmil ta tul,te David la smiltiklan 10 mil ta tul›?».
6 Jich yuʼun, te Akís la yikʼ tal te David sok jich la yalbey: «Jamal ya kalbat ta stojol Jehová te kuxul Dios te lekat ta winikil sok lek ya kil te ya ajokin bael te soldadoetik kuʼun ta yakʼel guerrae, melel maʼyuk bin chopol* jtaojbat jaʼto tal te bin-ora talat ta jtojole. Pero, te yantik ajwaliletik maʼyuk smukʼul yoʼtanik ta atojol.
7 Jich yuʼun, junuk awoʼtan sujtan bael sok mame ayuk bin xa apas te ya xjuʼ ya x-ilinik yuʼun te ajwaliletik yuʼun te filisteoetike».
8 Pero, te David jich la yalbey te Akís: «¿Aybal bin ma lek jpasoj? Jaʼto tal te bin-ora talon ta atojole, ¿aybal bin chopol* ataoj ta stojol te j-abat awuʼun ini? Ajwalil kuʼun, ¿bin yuʼun te ma xjuʼ ya jokinat bael ta yakʼbeyel guerra te akontratake?».
9 Te Akís jich la yalbey te David: «Te joʼone jich ya kilat te bin-utʼil chʼul-abat yuʼun Dios, melel kʼax lek awoʼtan. Pero, te machʼatik yichʼoj mukʼ yaʼtelik yuʼun te filisteoetik jich la yalik ‹Ma xa awakʼ te ya xtal sjokinotik ta yakʼel guerra›.
10 Jich yuʼun, te pajele sabme ya xjajchat te j-abatetik yuʼun te ajwalil awuʼun te sjokinojat tale, yame xbaex ta sakubelnax kʼinal».
11 Jich buen sab jajch te David sok te swiniktak yuʼun ya sujtik bael ta skʼinal te filisteoetik, yan stukel te filisteoetik moik bael ta Jezreel.
Notaetik
^ Ta yantik variante «ma lek».
^ Ta yantik variante «ma lek».
^ Ta yantik variante «ma lek».
