1 Samuel 3:1-21
-
Te Samuel la yichʼ yaʼtel ta j-alwanej (1-21)
3 Te chʼin kerem Samuel yak ta abatinel ta stojol te Jehová te jaʼ wentainbil yuʼun te Elí. Ta yorail-abi, te Jehová maʼyuk machʼa ya skʼoponix-a sok maʼyukix ya yakʼ ta ilel bayal najalsitiletik-a.*
2 Ta jun buelta, te Elí tey wayal-a te bantinix kʼayem-ae (yakix ta majkel sit-a sok maba ya yilix ta lek-a te kʼinale).
3 Matoba tupʼen-a te yawil kʼajkʼ yuʼun te Diose sok wayal ta nailpakʼ templo yuʼun Jehová te Samuel, jaʼ te banti ay te skaxaul chapbilkʼop yuʼun te Diose.
4 Jich yuʼun, te Jehová la skʼopon te Samuel, jich la sjakʼ te Samuel: «Liʼ ayoni».
5 Jich animal bajt ta stojol te Elí sok jich la yalbey: «Kajwal, la kaʼiy te la awikʼone, liʼ ayoni». Pero, jich albot yuʼun te Elí: «Maʼuk, maba la kikʼat. Baan, baan wayanxan». Jich bajt te Samuel sok wayxan.
6 Te Jehová la skʼopon yan buelta te Samuel: «¡Samuel!». Jich yuʼun jajch te Samuel, bajt ta stojol te Elí sok jich la yalbey: «Kajwal, la kaʼiy te la awikʼone, liʼ ayoni». Pero, jich albot yuʼun te Elí: «Maʼuk, jnichʼan, maba la kikʼat. Baan, baan wayanxan».
7 (Te Samuel mato snaʼbey sba ta lek-a te Jehová; te Jehová mato ayuk skʼoponoj-a te Samuel).
8 Te Jehová la skʼopon ta yoxebal buelta te Samuel: «¡Samuel!». Jich yuʼun jajch te Samuel, bajt ta stojol te Elí sok jich la yalbey: «La kaʼiy te la awikʼone, liʼ ayoni».
Tey la snaʼ stojol-a te Elí te jaʼ Jehová te machʼa yak ta skʼoponel te chʼin kereme.
9 Te Elí jich la yalbey te Samuel: «Baan, baan wayanxan. Teme la schaʼkʼoponate jichme xa awalbey ‹Kʼopojan, Jehová, te j-abat awuʼun ini yak ta yaʼiyel te akʼope›». Jich bajt te Samuel sok wayxan.
10 Te Jehová la skʼopon yan buelta te Samuel jich te bitʼil spasoj tale: «¡Samuel, Samuel!». Jich la sjakʼ te Samuel: «Kʼopojan, te j-abat awuʼun ini yak ta yaʼiyel te akʼope».
11 Te Jehová jich la yalbey te Samuel: «Aʼiya awaʼiy stojol ini, ayme bin ya kakʼ xkʼot ta pasel ta lum Israel te xchʼinet schikin ya xjil machʼauk-a te ya yaʼiy stojole.
12 Ta kʼajkʼal-abi yame jkʼotes ta pasel spisil te bin la kal ta stojol te Elí sok te sfamilia, ta sjajchibal kʼalalto ta slajibal.
13 Yame awalbey te ya kichʼ ta kʼop ta spisil-ora te sfamilia ta skaj te mulil spasojik te jaʼnix jich snaʼoj te Elí, melel te snichʼnab yakik ta sbolkʼoptayel te Dios ta swenta te bintik ma lek yakik ta spasel, pero maba la skomtiklan.
14 Jaʼ yuʼun la kalbey ta jamal te sfamilia te Elí te maʼyuk bin ya xjuʼ ya stoj-a te smul te sfamilia, manchukme ya yakʼik milbil majtaniletik sok chikʼbil majtaniletik».
15 Te Samuel maba jajch jaʼto te kʼalal sakub te kʼinale. Tey-abi la sjamtiklan te tiʼnailetik yuʼun te sna te Jehová. Te Samuel ma skʼan ya scholbey yaʼiy-a te Elí te bin albot yuʼun te Diose, melel ya xiʼ.
16 Pero, te Elí la yikʼ tal te Samuel sok jich la yalbey: «¡Samuel, jnichʼan!». «Liʼ ayoni», xchi te Samuel.
17 Te Elí jich la sjojkʼoybey te Samuel: «¿Bin-a te la yalbate? Awokoluk, mame xa amukbon ta awoʼtan. Akʼa yakʼbat tulan castigo te Dios teme ya amukbon ta awoʼtan jpʼaluk ta spisil te bin la yalbate».
18 Jich yuʼun, te Samuel la scholbey yaʼiy spisil, maʼyuk la smukbey jxujtʼuk. Te Elí jich la yalbey: «Jaʼ skʼanojel yoʼtan te Jehová, akʼa spas te bin lek ya yile».
19 Jich bejbe* yak ta chʼiel te Samuel, jokinbil yuʼun te Jehová sok spisil te bin la yal te Samuel jaʼ la yakʼ kʼotuk ta pasel te Diose.
20 Ta spisil te lum Israel, ta Dan k’alal ta Beer-Seba la snaʼik stojol te la yichʼ yaʼtel ta j-alwanej yuʼun Jehová te Samuel.
21 Te Jehová la yakʼulan sba ta ilel ta Siló, melel ta Siló la yakʼ sba ta naʼel te Jehová ta stojol te Samuel te kʼalal kʼoponot yuʼun te Jehová.
