1 Samuel 30:1-31
30 Te kʼalal kʼotik ta Ziclag te David sok te swiniktak ta yoxebal kʼajkʼal, te amalequitaetik yochintayojikix-a te Négueb sok te Ziclag, la slajinik sok la schikʼik te Ziclag.
2 La yikʼik bael te antsetik sok spisil te machʼatik ayik ta mukʼul lum, mukʼ bikʼit la yikʼik bael. Maʼyuk jtuluk la smilik, pero spisil la yikʼik bael.
3 Te kʼalal kʼot te David sok te swiniktak, la yilik te stsumojbeyikix kʼajkʼ-a te Ziclag sok te tsakbilikix bael-a te yinamik, te snichʼnabik sok te yantsil nichʼnabik.
4 Jich te David sok te swiniktak jajchik ta tulan okʼel. Bayal okʼik jaʼto te kʼalal maʼyukix yipik yuʼun-a te okʼele.
5 Jaʼnix jich la yichʼ tsakel bael te chaʼtul yinam te David, jaʼ te Ahinoam te talem ta Jezreel sok te Abigaíl te meʼba ants yuʼun te Nabal te talem ta Carmelo.
6 Te David bayal yak ta mel-oʼtan-a, melel ya skʼan ya xchʼojot ta ton yuʼun te swiniktak, ta skaj te spisilik spichʼoj sba yoʼtanik yuʼun te ikʼbotik bael te snichʼnabik sok te yantsil nichʼnabike. Pero, te David bajt skʼanbey koltayel te Jehová te Dios yuʼun swenta ya stsakxan yip yoʼtan.
7 Ta patil, te David jich la yalbey te sacerdote Abiatar snichʼan Ahimélec: «Awokoluk, ichʼbon tal te efod».* Jich la yichʼ tal te efod te Abiatar.
8 Te David jich la sjojkʼoybey te Jehová: «¿Yabal jnuts bael te jpojbiluketike? ¿Yatobal jtatiklan?». Jich la yal te Diose: «Yak, nutsa bael, melel yatome atatiklan sok yame awichʼ sujtel tal spisil te bin la yichʼik baele».
9 Ta oranax bajtik te David sok te 600 ta tul swiniktak te jokinbil yuʼune, jich kʼotik ta be jaʼ yuʼun Besor, tey jilik chaʼoxtul-a te swiniktake.
10 Te David jaʼnax la yikʼ bael 400 ta tul swiniktak, pero te 200 ta tul swiniktak jilik ta patil, melel kʼax lujbenik-a te ma juʼix yuʼunik kʼaxel bael ta be jaʼ yuʼun Besor.
11 Te swiniktak te David la staik jtul egipcio-winik ta kʼinal sok la yikʼik bael ta stojol te David. La yakʼbeyik sweʼel sok la yakʼbeyik yuchʼ jaʼ,
12 jaʼnix jich la yakʼbeyik chaʼpejch tenbil takin tsʼusub sok jxejtʼ tenbil takin higo. Te kʼalal weʼe, la staxan yip, melel ayix oxeb kʼajkʼal sok oxeb ajkʼabal-a te maʼyuk bin sweʼoj sok maʼyuk yuchʼoj jaʼ.
13 Te David jich la sjojkʼoybey: «¿Banti talemat? ¿Machʼa-a te awajwale?». Jich la yal te egipcio-winik: «Talemon ta Egipto, j-abaton yuʼun jtul amalequita-winik. Ayix oxeb kʼajkʼal te la yijkitayon jilel te kajwal ta skaj te la stsakon chamele.
14 La kochintaykotik te skʼinal te keretitaetik te ay ta stojol sur ta skʼinal Judá sok te skʼinal Caleb te ay ta stojol sur soknix la jtsumbeytik kʼajkʼ te Ziclag».
15 Te kʼalal jich la yaʼiy stojol te David, jich la sjojkʼoybey: «¿Yabal xjuʼ ya awikʼon bael te banti ayik te jpojbiluketike?». Jich la yal te egipcio-winik: «Teme ya awalbon ta jamal ta stojol Dios te maba ya amilon sok te maba ya awakʼon ta skʼab te kajwale, ya kikʼat bael te banti ayik te jpojbiluketike».
16 Jich te egipcio-winik la yikʼ bael te David, tey spukoj sbaik ta spamal te kʼinal te jpojbiluketike. Kʼax tseʼel yoʼtanik te yakik ta weʼ uchʼajel ta swenta te kʼax bayal te bin la spojik tal ta skʼinal te filisteoetik sok ta skʼinal Judá.
17 Te David jajch yakʼtiklanbey guerra te kʼalal nopol* ya sakubix-a te kʼinal jaʼto te kʼalal ijkʼub te kʼinale. Maʼyuk machʼa kol jilel, jaʼnax kolik 400 ta tul winiketik te kajalik bael ta anel ta scamelloik.
18 Te David la yichʼ sujtel tal spisil te bin la spojik bael te amalequitaetik sok la yikʼ sujtel tal te chaʼtul yiname.
19 Maʼyuk bin chʼay yuʼunik, mukʼ bikʼit tey ayik-a. La yikʼik sujtel tal te snichʼnabik sok te yantsil nichʼnabik soknix la yichʼik sujtel tal te sbilukike. Te David la yichʼ sujtel tal spisil te bin la yichʼik pojbeyele.
20 Te David jaʼnix jich la yikʼ jilel spisil te tuminchijetik sok te wakaxetike. Te swiniktak te David jun-nax la yikʼik tal spisil te chambalametik soknix te yuʼunik-euke. Jich yakik ta yalel: «Jaʼ yuʼun David te bin la jpojtik tale».
21 Jich yuʼun, te David sujt bael te banti jilik te 200 ta tul winiketik te kʼax lujbenik-a te ma jokinotik bael yuʼun sok te jilik ta be jaʼ yuʼun Besor. Te winiketik-abi lokʼ staik te David sok te machʼatik jokinbil yuʼune. Te kʼalal noptsajik* baele, te David la sjojkʼoylanbey teme lek ayike.
22 Pero ay chaʼoxtul chopol winiketik* sok te jkʼaxel ma xtuunik ta yolil te machʼatik la sjokinik bael te David te jich jajch yalike: «Maba la sjokinotik bael, jaʼ yuʼun maba ya kakʼbeytik te bin la kichʼtik sujtel tale, jaʼnax ya kakʼbeytik sujtel ta jujuntul te yinamik sok te yal snichʼnabike. Akʼa yikʼik bael sok akʼa bajtukik».
23 Pero, jich albotik yuʼun te David: «Maʼuk kermanotak, ma skʼan te jich ya apasike, melel jaʼ la yakʼbotik te Jehová. Sok jaʼnix la skanantayotik sok la yakʼ ta jkʼabtik te jpojbiluketik te la skontrainotike.
24 ¿Yabal akuyik te ay machʼa lek ya yaʼiy te bin la awalike? Pajalme ya awichʼik akʼbeyel ta apisilik: te machʼatik bajtik ta yakʼel guerra sok te machʼatik jilik ta skanantayel te jbiluktike. Pajalme ya yichʼ pukel».
25 Jaʼto tal ta kʼajkʼal-abi, te David la yal te jaʼ mantalil-abi sok jaʼ ley kʼot ta lum Israel. Jich ay jaʼto ta ora ini.
26 Te kʼalal sujt tal ta Ziclag te David, jun parte yuʼun te biluketik te la spoj tale la stikunbey te jwolwanejetik yuʼun Judá te jaʼ yamigotake. Jich la stikun ta albeyel: «Jaʼ jun majtanil* ta atojolik te la jpojbeytik tal te skontratak te Jehová».
27 Jaʼnix jich la stikunbey ta stojol te machʼatik nainemik ta Betel, ta Ramot te ay ta Négueb,* ta stojol te machʼatik nainemik ta Jatir,
28 ta Aroer, ta Sifmot, ta Estemoa,
29 ta Racal, ta stojol te machʼatik nainemik ta mukʼul lumetik yuʼun te jerahmeelitaetik, ta stojol te machʼatik nainemik ta mukʼul lumetik yuʼun te quenitaetik,
30 ta stojol te machʼatik nainemik ta Hormá, ta Borasán, ta Atac,
31 ta Hebrón sok ta stojol spisil te lugaretik te banti ayinik te David sok te swiniktak.
Notaetik
^ Ta yantik variante «tijil».
^ Ta yantik variante «jijtsʼajik», «tijtsajik».
^ Ta yantik variante «winiketik te ma lekuk stalelik».
^ Ta hebreo: «jun bendición».
^ O «ta stojol sur».
