1 Samuel 31:1-13
-
Laj te Saúl sok te oxtul snichʼnab (1-13)
31 Te filisteoetik yakik ta yakʼbeyel guerra-a te lum Israel. Tey-abi, te winiketik yuʼun Israel lokʼik bael ta anel ta stojol te filisteoetik sok bayal lajik ta wits Guilboa.
2 Te filisteoetik nopolnax* snutsojik bael te Saúl sok te snichʼnab, la smilik te Jonatán, te Abinadab sok te Malki-Súa, te snichʼnab te Saúl.
3 Tulanaj te guerra ta stojol te Saúl. Te j-akʼtʼimalteʼetik la staik ta ilel te Saúl sok tulan la yejchentesik.
4 Jich yuʼun, te Saúl jich la yalbey te jkuch-aʼtejibal yuʼun guerra yuʼune: «Lokʼesa te espada awuʼun sok milawon-a. Ma jkʼan te jaʼ ya xtal yakʼbonik bayal jwokol te machʼatik maba yichʼojik circuncisión* sok te jaʼ ya smilonike». Pero, te jkuch-aʼtejibal yuʼun guerra yuʼun ma la schʼuun spasel, melel bayal ay ta xiwel. Jaʼ yuʼun, te Saúl la stsak te espada sok la smil sba stukel.
5 Te kʼalal jich la yil te kʼot ta pasel te jkuch-aʼtejibal yuʼune, la stsak te espada yuʼune jaʼnix jich la smil sba stukel-euk.
6 Jich laj te Saúl ta kʼajkʼal-abi, jaʼnix jich te oxtul snichʼnab, te jkuch-aʼtejibal yuʼun guerra yuʼune sok spisil te swiniktake.*
7 Te kʼalal la yilik te israeletik te ayik ta spamlej kʼinal sok te machʼatik ayik ta skʼinal Jordán te lokʼik bael ta anel te winiketik yuʼun Israel sok te lajix te Saúl soknix te snichʼnabe, la yijkitayik jilel te mukʼul lumetik sok anik bael. Tey-abi talik te filisteoetik sok tey jilik ta nainel-a.
8 Te kʼalal bajtik te filisteoetik ta yan kʼajkʼal ta spojbeyel te sbilukik te machʼatik lajemikixe, tey la staik-a te sbakʼetal te Saúl sok te sbakʼetal te oxtul snichʼnab ta wits Guilboa.
9 La xotʼbeyik* lokʼel sjol te Saúl sok la spojbeyik bael te yaʼtejib yuʼun guerra, jaʼnix jich la stikunik winiketik ta spamal skʼinal te filisteoetik yuʼun jich ya yakʼik ta naʼel ta stojol te ants winiketik soknix ta sna* te lokʼombaetik yuʼunik te bin kʼot ta pasele.
10 Te filisteoetik la yakʼik ta sna te lokʼombaetik yuʼun Astoret te aʼtejibaletik yuʼun guerra yuʼun te Saúl sok la sjijpanbeyik te sbakʼetal ta stsʼajkʼul te Bet-San.
11 Te kʼalal la yaʼiyik stojol te yajwalul te Jabés-Galaad te bin la spasbeyik te Saúl te filisteoetike,
12 sjunal ajkʼabal beenik spisil te winiketik yuʼun guerra sok la skojtesbeyik tal te sbakʼetal te Saúl soknix te sbakʼetal te snichʼnab te jokʼajtik ta stsʼajkʼul te Bet-San. Tey-abi sujtik bael ta Jabés sok tey la schikʼik-a.
13 Ta patil la smukbeyik te sbakelik ta Jabés ta yeʼtal tamarisco-te’ sok jukeb kʼajkʼal la skom sweʼelik.
Notaetik
^ Ta yantik variante «tijilnax».
^ Jaʼniwan ya skʼan ya yal te machʼatik ya xkanantayot yuʼune.
^ Ta yantik variante «skʼokbeyik».
^ Ta yantik variante «stemplo».
