1 Samuel 4:1-22
4 Te bintik la yal te Samuel kʼot ta stojol spisil te lum Israel.
Ta yorail-abi, te lum Israel bajt yakʼbey guerra te filisteoetike. Te israeletik la spas scampamentoik ta stsʼeel te Ebenézer, yan stukel te filisteoetik la spas scampamentoik ta Afec.
2 Jich yuʼun, te filisteoetik la schol sbaik yuʼun ya yakʼbeyik guerra te lum Israel. Pero tulanajxan te guerrae, jich la yichʼik tsalel te israeletike. Te filisteoetik ayniwan la smilik 4 mil ta tul winiketik yuʼun Israel te banti la spasik guerrae.
3 Te kʼalal sujtik tal ta scampamentoik te soldadoetik, te jwolwanejetik yuʼun te Israel jich la yalik: «¿Bin yuʼun te Jehová la yakʼ te ya kichʼtik tsalel* yuʼun te filisteoetik ta ora ini? Konik, konik kichʼtik tal te skaxaul chapbilkʼop yuʼun te Jehová te ay ta Siló yuʼun ya kichʼtik bael swenta ya skoltayotik lokʼel ta skʼab te jkontrataktike».
4 Jich yuʼun la stikunik bael winiketik ta Siló yuʼun ya yichʼik tal te skaxaul chapbilkʼop yuʼun te Jehová te jwolwanej yuʼun te soldadoetik* te nakal ta smukʼul naktajib ta sba* te querubinetik. Te Hofní sok te Finehás, te chaʼtul snichʼnab te Elí, tey ayik-euk-a te banti ay te skaxaul chapbilkʼop yuʼun te smelelil Diose.*
5 Jaʼnax te kʼalal jul ta campamento te skaxaul chapbilkʼop yuʼun te Jehová, jajchik ta tulan aw spisil te israeletik te jich nijk te lumkʼinale.
6 Te kʼalal la yaʼiyik stojol te filisteoetik te yawik te israeletik, jich la yalik: «¿Bin yuʼun te yakik ta aw ta scampamentoik te hebreoetike?». Te kʼalal la snaʼik stojol te ayix ta scampamento te israeletik te skaxaul chapbilkʼop yuʼun te Jehová,
7 te filisteoetik och xiwel ta yoʼtanik, jaʼ yuʼun jich la yalik: «¡Julix Dios ta scampamentoik!». Jich la yalikxan: «¡Ayme jwokoltik! ¡Maʼyuk bin-ora jich kʼoem ta pasel ini!
8 ¡Ayme jwokoltik! ¿Machʼa ya skoltayotik lokʼel ta skʼab te mukʼul Dios ini? Melel jaʼ te Dios te bayal ta chajp te bitʼil la slajin te egipcioetik ta jochol takin kʼinal.
9 Jaʼex filisteoetik, mame xiwex sok winikukexme. Teme maʼuke, jaʼme ya x-abatinex ta stojol te hebreoetik jich te bitʼil ayik ta abatinel ta atojolik ta ora ini. ¡Winikukexme sok akʼaikme guerra!».
10 Jaʼ yuʼun la yakʼik guerra te filisteoetik, jich la yichʼik tsalel te israeletik sok jujuntul anik bael ta snaik. Kʼax bayal machʼatik lajik: ay 30 mil ta tul soldadoetik yuʼun Israel te lajike.
11 Jaʼnix jich, te filisteoetik la yichʼik bael te skaxaul chapbilkʼop yuʼun te Diose. Te Ofní sok te Finehás, te chaʼtul snichʼnab te Elí, tey lajik-a.
12 Jtul winik te jaʼ stsʼumbal Benjamín lokʼ bael ta anel te banti ayik ta guerra, ta kʼajkʼalnix-abi kʼot ta Siló, schʼiʼoj* skʼuʼ sok sbujkʼiyoj tsʼubil lum ta sjol.
13 Te kʼalal kʼot te winike, te Elí nakal ta snaktajib ta stsʼeel be. Yak ta maliywanej-a, melel yak ta kʼop yoʼtan ta swenta te skaxaul chapbilkʼop yuʼun te smelelil Diose.* Te k’alal och bael ta mukʼul lum te winik sok te kʼalal la yal te bin kʼot ta pasele, spisil jajchik ta aw te yajwalul te lume.
14 Te kʼalal la yaʼiy stojol te Elí te ayik ta aw, jich la sjojkʼoy: «¿Bin swentail te xchʼinchʼonik ta awe?». Te winike animal bajt ta stojol te Elí ta yalbeyel te bin kʼot ta pasele.
15 (Ayix 98 yaʼbilal-a te Elí. Jun-nax te banti tʼojol te site, melel ma xyilix kʼinal).
16 Jich yuʼun, te winik jich la yalbey te Elí: «¡Joʼon te julelonto te jajchon tal te banti ay te guerrae! Naxtonax lokʼon tal ta anel tey-a». Te kʼalal jich la yaʼiy stojol te Elí, jich la sjojkʼoy: «Jnichʼan, ¿bin-a te kʼot ta pasele?».
17 Jich la yal te winike: «Te israeletik lokʼik ta anel ta stojol te filisteoetik, te lum Israel la yichʼik tsalel. Jaʼnix jich lajik te chaʼtul anichʼnab, te Hofní sok te Finehás. Te filisteoetik la yichʼik bael te skaxaul chapbilkʼop yuʼun te smelelil Dios».*
18 Pero, k’alal te winik la yalbey skʼoplal te skaxaul chapbilkʼop yuʼun te smelelil Dios,* te Elí jawtsʼuj bael ta spat sok chʼay koel ta snaktajib te kʼot ta stsʼeel te tiʼ naile. Wakʼ* steʼel snukʼ, jich laj, melel mamalix-a sok kʼax jujpʼen. Te Elí aʼtej ta juez ta lum Israel 40 jaʼbil.
19 Te yalibe, te jaʼ yinam te Finehás, yikʼoj yal ta schʼujt-a sok nopol* ya x-ayinix-a* te yale. Te kʼalal la snaʼ stojol te la yichʼik bael te skaxaul chapbilkʼop yuʼun te smelelil Dios* sok te kʼalal la yaʼiy stojol te laj te yalib mamal* sok te smamalale, la skujan sba, melel ta repentenax jajch skʼuxul te yal yikʼoje te jich ayin yuʼune.
20 Te k’alal yakix ta lajel-ae, te antsetik te ayik ta stsʼeel-ae jich la yalbeyik: «Mame xiwat, kerem te chʼin alal awuʼune». Pero, te antse maba la sjakʼix sok maba la yichʼix ta wenta te bin albote.
21 Icabod* la yakʼbey sbiilin te chʼin kereme, melel jich la yal: «Te bin ya x-akʼbot yutsilal-a te lum Israel la yichʼik bael ta yan lum». Jich la yal-abi, melel la yichʼik bael te skaxaul chapbilkʼop yuʼun te smelelil Diose* soknix ta swenta te bin kʼot ta stojol te yalib mamal* sok te smamalale.
22 Jich la yal te antse: «Te bin ya x-akʼbot yutsilal-a te lum Israel la yichʼik bael ta yan lum, melel la yichʼik bael te skaxaul chapbilkʼop yuʼun te smelelil Diose».*
Notaetik
^ Ta hebreo: «¿Bin yuʼun te la stsalotik te Jehová?».
^ Jaʼ skʼoplal te chʼul-abatetik ta chʼulchan.
^ O jaʼniwan ya skʼan ya yal «yolil».
^ Ta yantik variante «xetʼoj».
^ Ta yantik variante «Kʼas».
^ Ta yantik variante «tijil».
^ Ta yantik variante «xpʼejkajix-a», «xtojkix-a».
^ Ta yantik variante «smamal alib».
^ Te ya skʼan ya yal «¿banti bajt te utsilale?».
^ Ta yantik variante «smamal alib».
