1 Samuel 5:1-12
5 Te kʼalal la spojik te skaxaul chapbilkʼop yuʼun te smelelil Dios* te filisteoetike, la yichʼik lokʼel ta Ebenézer kʼotik kʼalal ta Asdod.
2 Tey-abi, te filisteoetik la yichʼik bael te skaxaul chapbilkʼop yuʼun te smelelil Dios* ta stemplo* te Dagón sok la yakʼik ta stsʼeel te Dagón.
3 Te kʼalal jajchik ta buen sab ta yan kʼajkʼal te yajwalul te Asdod, pakal ta lum kʼot staik te Dagón. Yalem bael ta stojol-a te skaxaul chapbilkʼop yuʼun te Jehová. Jich la sjachik sok teynix la yakʼik ta yawil.
4 Te kʼalal jajchik ta buen sab ta yan kʼajkʼal, pakal ta lum la staik yan buelta te Dagón ta stojol te skaxaul chapbilkʼop yuʼun te Jehová. Kʼokem lokʼel te sjol te Dagón sok wakʼemik* lokʼel schebal te skʼabe, tey la staik ta stiʼil te smarcoil te temploe. Jaʼxanix wolol jilel te sbakʼetal te jich yilel te bin-utʼil chay.*
5 Jaʼ yuʼun, jaʼto ta ora ini maʼyuk machʼa ya stekʼbey te stiʼil te smarcoil te templo yuʼun te Dagón te ay ta Asdod te kʼalal ya x-ochike ni jaʼuk te sacerdoteetik yuʼun te Dagón.
6 Te skʼab te Jehová la yakʼbey castigo te ants winiketik ta Asdod sok ta spisil te skʼinale. La yakʼtiklanbey swokol te kʼalal la yakʼ tsakotuk ta hemorroide.*
7 Te kʼalal la yilik te winiketik yuʼun Asdod te bin yak ta kʼoel ta pasele, jich la yalik: «Te skaxaul chapbilkʼop yuʼun te Dios yuʼun Israel ma xjuʼ ya xjil ta koliltik, melel tulan yakʼoj te skʼab ta jtojoltik sok ta stojol te Dagón te dios kuʼuntike».
8 Jich yuʼun, te winiketik yuʼun Asdod la yikʼik tal spisil te ajwaliletik yuʼun te filisteoetik sok jich la sjojkʼoybeyik: «¿Bin ya jpastik sok te skaxaul chapbilkʼop yuʼun te Dios yuʼun Israel?». Jich la sjakʼik te ajwaliletik: «Akʼa yichʼ ichʼel bael ta Gad te skaxaul chapbilkʼop yuʼun te Dios yuʼun Israel». Jaʼ yuʼun, tey la yichʼik bael-a.
9 Te kʼalal la yichʼik bael tey-a te skaxaul chapbilkʼop, te skʼab te Jehová la yakʼbey castigo te mukʼul lum te jich och bayal xiwel ta yoʼtanik. La yakʼbey castigo spisil te ants winiketik yuʼun te mukʼul lum, mukʼ bikʼit tsakotik ta hemorroide.*
10 Jich yuʼun la yichʼik bael ta Ecrón te skaxaul chapbilkʼop yuʼun te smelelil Diose.* Pero, jaʼnax te kʼalal kʼot tey-a te skaxaul chapbilkʼope, jajchik ta tulan aw te ecronitaetik: «¡La yichʼbotik tal te skaxaul chapbilkʼop yuʼun te Dios yuʼun Israel yuʼun ya smilotik sok spisil te jlumaltike!».
11 Jich yuʼun la stsobik tal spisil te ajwaliletik yuʼun te filisteoetik sok jich la yalik: «Lokʼesaik bael te skaxaul chapbilkʼop yuʼun te Dios yuʼun Israel. Sujtesaik ta yawil yuʼun jich maba ya xlajotik-a sok maba ya xlajik-euk te jlumaltike». Melel spisil te ants winiketik yuʼun te mukʼul lum bayal xiwenik ta skaj te ya xjuʼ ya xlajike. Akʼbotik tulan castigo yuʼun te skʼab te smelelil Diose:*
12 te machʼatik maba lajike la yichʼik akʼbeyel castigo, tsakotik ta hemorroide.* Te ants winiketik yuʼun te mukʼul lum tulan yakik ta aw ta skʼanel koltayel, kʼot kʼalal ta chʼulchan te yawike.
