1 Samuel 6:1-21
-
Te filisteoetik la sujtesik te skaxaul chapbilkʼop ta Israel (1-21)
6 Jukeb u ayin te skaxaul chapbilkʼop yuʼun te Jehová ta skʼinal te filisteoetik.
2 Te filisteoetik la yikʼik tal te sacerdoteetik sok te jnaʼojeletik, jich la sjojkʼoyik: «¿Bin ya skʼan ya jpastik sok te skaxaul chapbilkʼop yuʼun te Jehová? Albonkotik te bitʼil ya xjuʼ ya jsujteskotik ta yawil».
3 Jich la yalik: «Teme ya asujtesik bael te skaxaul chapbilkʼop yuʼun te Jehová te Dios yuʼun Israel, yame skʼan ya awakʼbeyik bael smajtan. Yame skʼan ya atikunbeyik smajtan ta swenta te amulike. Jaʼnaxme jich ya xjuʼ ya xlekubex ta swenta te achamelik sok yame anaʼik stojol te bin yuʼun maba komen te skʼab ta yakʼbelex castigo».
4 Jich la sjojkʼoyik: «¿Bin majtanil ya xjuʼ ya jtikunbeytik ta swenta te jmultike?». Jich la yalik: «Ta swenta te ay joʼtul ajwaliletik yuʼun te filisteoetik, tikunaik joʼpʼij slokʼomba te hemorroide* te pastiklanbil ta oro sok joʼkojt slokʼomba chʼoetik te pastiklanbil ta oro, melel ta jujuntul te jaʼex soknix te ajwaliletik awuʼunike pajal ataoj awokolik ta swenta te chamel ini.
5 Yame skʼan ya apasbeyik slokʼomba te hemorroide* sok te chʼoetik te yakik ta slajinel te kʼinale. Jaʼnix jich yame skʼan ya awichʼik ta mukʼ te Dios yuʼun Israel. Jichniwan maba ya yakʼbeyexix castigo sok maba ya yakʼbeyix castigo te dios awuʼunike soknix te akʼinalike.
6 ¿Bin yuʼun te kʼax tulan ya awakʼik te awoʼtanik jich te bitʼil la spasik te egipcioetik soknix te faraón? Te kʼalal akʼbotik tulan swokolik yuʼun te Dios yuʼun Israel, jich la yakʼik lokʼel te israeletik, jich bajtik.
7 Jich yuʼun pasaik yachʼil carreta sok ikʼaik tal chaʼkojt meʼ wakaxetik te ay yalik soknix te maʼyuk bin-ora yakʼojbeyik skuch yugo-teʼ.* Tey-abi chukaik te meʼ wakaxetik ta carretaetik, pero te yalatakik ikʼaik sujtel ta scorral yuʼun jich namal* ya xjilik ta stojolik-a te smeʼike.
8 Ta patil kajanaik te skaxaul chapbilkʼop yuʼun Jehová ta carreta sok akʼaik ta stsʼeel te skaxaul chapbilkʼop jun caja te banti ya awakʼik bael te bintik pastiklanbil ta oro te ya atikunik jich bitʼil majtanil ta swenta te amulike. Tey-abi koltayaik bael
9 sok ilawilik te banti ya xbajtike. Teme toj moik bael ta sbelal te Bet-Semes ta skʼinaliknix, jaʼ ya skʼan ya yal-abi te jaʼ la yakʼbotik bayal jwokoltik te Dios yuʼun Israel. Pero, teme maba tey bajtik-a te wakaxetik, jichme ya jnaʼtik te jichnax jul ta jtojoltik te jwokoltik te ma jaʼuk te skʼab Dios te la yakʼbotik te castigoe».
10 Te winiketik jich la spasik te bitʼil albotike. La yikʼik tal chaʼkojt meʼ wakaxetik te ay yalatakik sok la schukbeyik te carretae. Te yalatakik la smakik ta corral.
11 Jich yuʼun la skajanik ta carreta te skaxaul chapbilkʼop yuʼun te Jehová sok te caja te banti la yakʼik bael te chʼoetik te pastiklanbil ta oro soknix te lokʼombaetik yuʼun te hemorroide.*
12 Te meʼ wakaxetik toj bajtik ta sbelal te Bet-Semes. Toj bajtik ta be sok xmeʼetik bael, maba bajt ta swaʼelik ni ta skʼexamik.* Te ajwaliletik yuʼun te filisteoetik la stʼunik bael te meʼ wakaxetik, kʼotik kʼalalto ta stiʼil skʼinal te Bet-Semes.
13 Te ants winiketik yuʼun Bet-Semes yakik ta stsobel-a te trigo ta spamlej. Te kʼalal la stoy moel te sitik sok la yilik te skaxaul chapbilkʼop, bayal akʼbot stseʼelil yoʼtanik yuʼun.
14 Te carreta och bael ta skʼinal te Josué te betsemita-winik, tey la skojtan sba ta nopol* jun mukʼul ton. Jich yuʼun la stuuntesik ta siʼ te carreta sok la yakʼik ta chikʼbil majtanil ta stojol Jehová te meʼ wakaxetike.
15 Te levitaetik la skʼechik koel te skaxaul chapbilkʼop yuʼun te Jehová sok te caja te banti ay te bintik pastiklanbil ta oro sok la skajanik ta sba te mukʼul tone. Ta kʼajkʼal-abi, te winiketik yuʼun Bet-Semes la yakʼbeyik chikʼbil majtanil te Jehová sok yantik milbil majtaniletik.
16 Te kʼalal jich la yilik te joʼtul ajwaliletik yuʼun te filisteoetik te bin kʼot ta pasele, ta kʼajkʼalnix-abi sujtik bael ta Ecrón.
17 Te slokʼomba te hemorroide* te pastiklanbil ta oro te la stikunik te filisteoetik ta stojol te Jehová jich bitʼil majtanil ta swenta te smulike, jaʼik ini: jun ta swenta te Asdod, jun ta swenta te Gaza, jun ta swenta te Asquelón, jun ta swenta te Gat sok jun ta swenta te Ecrón.
18 Te jayeb ta kojt slokʼomba chʼoetik te la yichʼ pasel ta oro jaʼ pajal yajtalul sok te mukʼul lumetik yuʼun te filisteoetik te swentainojik te joʼtul ajwaliletik (mukʼul lumetik te joytaybilik ta mukʼul tsʼajkʼetik sok te chʼin lumetik te maʼyuk tsʼajkʼetik yuʼunike).
Te mukʼul ton te ay ta skʼinal te Josué te betsemita-winik, jaʼ te banti la yichʼ kajanel te skaxaul chapbilkʼop yuʼun te Jehová, jaʼ testigo kʼot jaʼto ta ora ini.
19 Te Diose la smiltiklan te winiketik yuʼun te Bet-Semes, melel la yilik te skaxaul chapbilkʼop yuʼun te Jehová. La smiltiklan 50,070 ta tul winiketik yuʼun te lume. Te lum jajch yokʼetayik te machʼatik lajike, melel kʼax bayal te machʼatik la yichʼik milel yuʼun te Jehová.
20 Te winiketik yuʼun Bet-Semes jich la sjojkʼoyik: «¿Machʼa ya xjuʼ te ya stejkʼan sba ta stojol te Jehová, te chʼul Dios ini? ¿Bin yuʼun ma xlokʼ bael ta jtojoltik yuʼun ya xbajt ta stojol yantik?».
21 Jaʼ yuʼun, jich la stikunbeyik ta albeyel te yajwalul te Quiryat-Jearim: «Te filisteoetik la sujtesikix tal te skaxaul chapbilkʼop yuʼun te Jehová. Koanik tal yuʼun ya awichʼik bael», xchiik.
Notaetik
^ Ta yantik variante «jakal», «kʼubul».
^ Ta yantik variante «xin kʼabik».
^ Ta yantik variante «tijil».
