1 Samuel 7:1-17
7 Jich yuʼun, te winiketik yuʼun Quiryat-Jearim tal yichʼik bael te skaxaul chapbilkʼop yuʼun te Jehová sok la yichʼik moel ta sna te Abinadab te ay ta chʼin wits. Tey-abi la schʼultesik te Eleazar snichʼan Abinadab yuʼun ya skanantay te skaxaul chapbilkʼop yuʼun te Jehová.
2 Te jayeb jaʼbil jalaj te skaxaul chapbilkʼop ta Quiryat-Jearim jaʼto te bin kʼajkʼalil kʼot tey-ae, jaʼ 20 jaʼbil. Ta yorail-abi, spisil te lum Israel la sleik* te Jehová.
3 Te Samuel jich la yalbey te lum Israel: «Teme sok spisil awoʼtanik ya akʼan ya sujtex ta stojol te Jehová, lokʼesaik ta awolilik te diosetik yuʼun te jyanlumetik sok te lokʼombaetik yuʼun Astoret, spisilukme awoʼtanik xa awakʼ abaik ta stojol te Jehová sok jaʼnaxme xa awakʼ abaik ta abatinel ta stojol. Jichme ya skoltayex lokʼel ta skʼab te filisteoetike».
4 Jich te israeletik la slokʼesik bael ta stojolik te Baaletik sok te lokʼombaetik yuʼun Astoret, jaʼnax la yakʼ sbaik ta abatinel ta stojol te Jehová.
5 Jich la yal te Samuel: «Tsobaik tal spisil te lum Israel ta Mizpá, yame jkʼopon Jehová ta atojolik».
6 Jich yuʼun la stsob sbaik ta Mizpá. La slokʼesik tal jaʼ ta pozo sok la smalik ta stojol te Jehová soknix la skom sweʼelik ta kʼajkʼal-abi. Jich la yalik tey-a: «Jtaoj jmultik ta stojol te Jehová». Jich te Samuel och ta juez yuʼun te israeletik ta Mizpá.
7 Te kʼalal la snaʼik stojol te filisteoetik te la stsob sbaik ta Mizpá te israeletik, te ajwaliletik yuʼun te filisteoetik moik bael ta yakʼbeyel guerra te lum Israel. Te kʼalal jich la yaʼiyik stojol te israeletik, bayal xiwik ta stojol te filisteoetike.
8 Jaʼ yuʼun, te israeletik jich la yalbeyik te Samuel: «Mame xa akom aba ta skʼanbeyel te Jehová te Dios kuʼuntik te yakuk skoltayotike sok te yakuk skoltayotik lokʼel ta skʼab te filisteoetike».
9 Jich yuʼun, te Samuel la stsak tal jkojt jkolel* tuminchij sok la yakʼ ta chikʼbil majtanil ta stojol te Jehová. Te Samuel la skʼanbey wokol te Jehová te yakuk skoltay te lum Israel sok sutbot skʼop yuʼun te Jehová.
10 Te kʼalal yak ta yakʼel-a te chikʼbil majtanil te Samuel, te filisteoetik noptsajik* tal ta stojol te israeletik yuʼun ya yakʼbeyik guerra. Ta kʼajkʼal-abi, te Jehová la yakʼ tʼomuk tulan chawuk ta stojol te filisteoetik sok och xiwel ta yoʼtanik te jich ma la snaʼikix-a te bin la spasike, jich la yichʼik tsalel yuʼun te lum Israel.
11 Jich yuʼun, te winiketik yuʼun Israel lokʼik bael ta Mizpá, la snutsik bael te filisteoetik sok la smiltiklanik bael jaʼto te kʼalal kʼotik ta jun lugar te ay ta stojol sur yuʼun te Bet-Car.
12 Tey-abi, te Samuel la stsak jpʼij ton, la yakʼ ta olil yuʼun te Mizpá sok te Jesaná, la yakʼbey sbiilin Ebenézer,* melel jich la yal: «Jaʼto ta ora ini skoltayojotik te Jehová».
13 Jaʼ jich te bitʼil la yichʼik tsalel te filisteoetik. Maba la yochintaybeyikix-a te skʼinal Israel sok spisil-ora kontrainotik yuʼun te skʼab te Jehová te filisteoetik te jayeb kʼajkʼal kuxul ta kʼinal te Samuel.
14 Te mukʼul lumetik yuʼun te lum Israel te pojbilik yuʼun-a te filisteoetik, la schaʼyuʼuninik te lum Israel, te jajch tal ta Ecrón jaʼto kʼalal ta Gat. Jich te israeletik la schaʼyuʼuninik te skʼinal te mukʼul lumetik te ay ta skʼabik-a te filisteoetike.
Jaʼnix jich, te lum Israel ayin lamalkʼinal yuʼunik sok te amorreoetik.
15 Te Samuel aʼtej ta juez ta stojol te lum Israel te jayeb kʼajkʼal kuxule.
16 Ta jujun jaʼbil ya xbajt yulaʼtay te lum Betel, Guilgal sok te Mizpá, ta spisil te lumetik-abi la schajpan te kʼopetik yuʼun te israeletik.
17 Tey-abi ya sujt ta Ramá, melel tey ay-a te snae, jaʼnix jich ya schajpanbey te kʼopetik yuʼun te israeletik tey-ae. Te Samuel la spasbey jun skajtajib chikʼbil majtanil yuʼun te Jehová ta Ramá.
Notaetik
^ O «okʼik ta stojol».
^ Ta yantik variante «jchʼiel».
^ Ta yantik variante «jijtsʼajik», «tijtsajik».
^ Te ya skʼan ya yal «ton yuʼun koltayel».
