1 Samuel 8:1-22
8 Te kʼalal mamalix-a te Samuel, la yakʼtiklanbey yaʼtel ta juez ta lum Israel te snichʼnab.
2 Te sba snichʼane Joel sbiil, te schebale Abías. Ta schebalik aʼtejik ta juez ta Beer-Seba.
3 Pero, te snichʼnab maba la stʼunbeyik stalel te statike. Loʼlaywanik yuʼun jich la staik-a te stakʼinike, la stsakik takʼin yuʼun ay machʼa la skoltaybeyik skʼoplal sok ma stojiluk te bitʼil chajpanwanike.
4 Ta patil, spisil te jwolwanejetik yuʼun te Israel la stsob sbaik sok bajt yilik te Samuel ta Ramá.
5 Jich la yalbeyik te Samuel: «Ilawil, te jaʼate mamalatix sok mame stʼunojik te atalel te anichʼnabe. Jich yuʼun lea jtul ajwalil yuʼun ya swentainotik, jich te bitʼil ay yuʼunik te yantik nacionetik».
6 Pero, te Samuel maba la smulan* te jich albot «Lea jtul ajwalil yuʼun ya swentainotik». Jaʼ yuʼun la skʼopon te Jehová,
7 sok jich albot yuʼun te Jehová: «Pasa te bin la yalbat te lume, melel maba jaʼat te la awichʼ pʼajele. Joʼon te machʼa la spʼajonik jich te bitʼil ajwalil yuʼunik.
8 Jaʼnix jich yakik ta spasel te bin la spasik jaʼto tal te bin-ora la jlokʼeslan tal ta Egipto. Spisil-ora ya yijkitayonik sok ya yichʼik ta mukʼ yantik diosetik. Jaʼ te bin yakik ta spasel ta atojol ta ora ini.
9 Pasa te bin ya yalike, pero akʼbeya snaʼik te bin ya staik yuʼune. Altiklanbeya te ayme sderecho ya xkʼot te ajwalil te ya xwentainotik yuʼune, yame xkʼanbotik te bin ya skʼan stukele».
10 Jich yuʼun, te Samuel kʼopoj sok te ants winiketik te yakik ta skʼanel jtul ajwalil sok la yaltiklanbey yaʼiy spisil te bin la yal te Jehová.
11 Jich la yaltiklanbey: «Te ajwalil te ya swentainexe ayme sderecho yuʼun ya skʼanbeyex ini: yame yikʼbeyex bael te anichʼnabik yuʼun ya x-aʼtejik ta carretaetik yuʼun guerra sok yame xmoik ta caballoetik yuʼun guerra soknix ayme chaʼoxtul te animal ya xnailajik bael ta stojol te carretaetike.
12 Ay yantik te yame x-otsesotik ta capitán yuʼun soldadoetik: ta capitán yuʼun jmil ta tul soldadoetik sok ta capitán yuʼun 50 ta tul soldadoetik, ay yantik te yame x-akʼotik ta jokʼlum sok ta stsobeyel te sit yawal tsʼunub, yame spasik aʼtejibaletik yuʼun guerra sok te bintik ya xtuun yuʼun te carretaetike.
13 Yame yikʼbeyex bael te awantsil nichʼnabik yuʼun ya x-ochik ta jpas perfumeetik, jpas weʼeliletik sok ta jpas panetik.
14 Yame yuʼuninbeyex te lekil kʼinal awuʼunik, te tsʼusubiltik awuʼunik sok te olivoetik awuʼunik sok jaʼme ya yakʼbey te j-abatetik yuʼune.
15 Yame yichʼbeyex jun ta slajunebal te sit awal tsʼunubil awuʼunik sok te sit tsʼusubiltik awuʼunik, jaʼme ya yakʼbey te machʼatik yichʼoj mukʼ yaʼtelik sok te j-abatetik yuʼune.
16 Yame yikʼbeyex bael te j-abatetik awuʼunik jich bitʼil antsetik sok winiketik, te lekil chambalametik awuʼunik sok te burroetik awuʼunik, jaʼme ya yakʼ aʼtejukik ta stojol.
17 Yame yichʼbeyex jun ta slajunebal te tuminchijetik awuʼunik sok yame x-ochex ta j-abat yuʼun-euk.
18 Yame xkʼot skʼajkʼalel te ya x-okʼex yuʼun mel-oʼtan ta swenta te ajwalil te la atsaike. Pero, te kʼalal jich ya xkʼot ta pasele, maba ya yaʼiybeyex akʼopik te Jehová».
19 Pero, te lume maba la skʼan la yichʼ ta wenta te bin la yal te Samuel sok jich la yalik: «¡Maʼyuk bin ya spas! ¡Ya jkʼantik jtul ajwalil!
20 Jichme pajal ya xkʼootik te bitʼil te yantik nacionetik, jaʼme ya swentainotik te ajwalil kuʼuntik, jaʼme ya swolotik sok jaʼme ya skoltayotik ta yakʼbeyel guerra te jkontrataktik».
21 Te kʼalal la yaʼiy stojol spisil te bin la yal te lume, te Samuel la yakʼbey snaʼ te Jehová.
22 Te Jehová jich la yalbey te Samuel: «Aʼiybeya te skʼopike sok lea jtul ajwalil yuʼun ya xwentainotik yuʼun». Tey-abi, te Samuel jich la yalbey te winiketik yuʼun te lum Israel: «Sujtanik bael ta alumalik ta jujuntul».
Notaetik
^ Ta hebreo: «maba lek la yaʼiy».
