1 Samuel 9:1-27
-
Te Samuel la snaʼbey sba te Saúl (1-27)
9 Ay jtul winik te Quis sbiil te talem ta stsʼumbal Benjamín. Jaʼ snichʼan te Abiel, snichʼan Zeror, snichʼan Becorat, snichʼan te Afías. Kʼax bayal skʼulejal te winik ini te talem ta stsʼumbal Benjamín.
2 Ay jtul snichʼan te Saúl sbiil te keremto sok kʼax tʼujbil. Maʼyuk yan israel-winik te kʼax tʼujbil jich bitʼil te Saule. Kʼax najt te kerem ini maʼyuk machʼa ya xjelaw kʼaxel ta snejkʼel.
3 Ta jun kʼajkʼal chʼay te meʼ burraetik yuʼun te Quis, jaʼ stat te Saúl. Te Quis jich la yalbey te Saúl te snichʼane: «Awokoluk, ikʼa bael jtul j-abat sok baan lea tal te meʼ burraetike».
4 La sbeentayik te witstikil yuʼun Efraín sok te skʼinal Salisá, pero maba la staik. Kʼaxik ta skʼinal Saalim, jaʼnix jich maba la staik tey-a. La sbeentayik spisil te skʼinal te stsʼumbal Benjamín sok maba la staik tey-a.
5 Te kʼalal kʼotik ta skʼinal Zuf, te Saúl jich la yalbey te j-abat te jokinbil yuʼune: «Konik, sujtukotik bael, mame jaʼuk te ya xjajch smel yoʼtan te jtat ta jwentatik te ma jaʼukix ta swenta te meʼ burraetike».
6 Pero, jich albot yuʼun te j-abate: «Kajwal, ay jtul winik yuʼun Dios ta jun mukʼul lum te nopol* ay liʼi, jaʼ jtul winik te kʼax ichʼbil ta mukʼ. Spisil ya xkʼot ta pasel te bin ya yale. Konik kiltik. Yaniwan xjuʼ ya yalbotik te banti ya xbootike».
7 Te Saúl jich la yalbey te yabate: «Teme ya xbootike, ¿bin ya kichʼbeytik bael? Maʼyukix jpejchuk pan kuʼuntik ta yawil. Maʼyukix bin ay kuʼuntik te ya xjuʼ ya kakʼbeytik te winik yuʼun te smelelil Diose.* ¿Yuʼunbal ayto bin ay kuʼuntik?».
8 Te j-abat jich la yalbeyxan te Saúl: «Ay kichʼoj jun ta schanebal siclo* yuʼun plata. Jaʼ ya kakʼbey te winik yuʼun te smelelil Dios* swenta ya yalbotik te banti ya xjuʼ ya xbootike».
9 (Ta namey kʼinal, te kʼalal ay machʼa ay bin ya xbajt sjojkʼoybey te Dios ta lum Israel, jich ya yal: «Konik kiltik te winik te ya yil najalsitil».* Melel te machʼa j-alwanej sbiil ta ora ini ta namey kʼinal ya yichʼ biilintesel winik te ya yil najalsitil).
10 Jich yuʼun, te Saúl jich la yalbey te j-abat yuʼune: «Lek te bin ya awale. Konik tey-a». Jich bajtik ta mukʼul lum te banti ay te winik yuʼun te smelelil Diose.*
11 Te kʼalal yakik ta moel bael ta mukʼul lum, la staik chaʼoxtul achʼixetik te yakik ta slokʼesel tal jaʼ sok jich la sjojkʼoybeyik: «¿Liʼbal ay te winik te ya yil najalsitile?».*
12 Jich albotik yuʼun te achʼixetik: «Tey, lumxanix ay baele, suja abaik. Julelto ta mukʼul lum, melel yoʼtik yame yakʼ milbil majtanil ta toyol awilal* te lume.
13 Jaʼnax te kʼalal ya x-ochex ta mukʼul lum, teyme ya ataik-a. Baanik ta oranax, melel ya xmo bael ta weʼel ta toyol awilal.* Melel te ants winiketike maba ya xweʼik jaʼto teme kʼot sok ya yakʼbey bendición te milbil majtanile. Jaʼtome jich ya xweʼik-a te machʼatik ikʼbilik ta weʼele. Teme ya xmoex bael ta orae, yatome ataik».
14 Jich yuʼun moik bael ta mukʼul lum. Te kʼalal kʼotik ta yolil te lume, la yilik te Samuel te yakix ta talel ta stojolik yuʼun pajal ya xmoik bael ta toyol awilal.*
15 Te kʼalal junxanix kʼajkʼal ya skʼan ya xkʼot-a te Saúl, te Jehová jich yalojbeyix-a* te Samuel:
16 «Ta jich ora te pajele, ya jtikunbat jtul winik te talem ta skʼinal Benjamín. Yame amalbey aceite ta sjol swenta ya x-och ta jwolwanej ta lum Israel kuʼun. Jaʼme ya skoltay lokʼel te lum kuʼun ta skʼab te filisteoetike. Melel la kilix te swokol te lum kuʼun sok julix ta jtojol te yajkanike».
17 Kʼalal te Samuel la yil te Saúl, jich albot yuʼun te Jehová: «Liʼme ay te winik te jich la kalbat skʼoplal ‹Jaʼ te machʼa ya x-och ta ajwalil ta lum kuʼun›».
18 Tey-abi, te Saúl noptsaj* bael ta stojol te Samuel ta yochibal te mukʼul lum sok jich la sjojkʼoybey: «Awokoluk, ¿yabal xjuʼ ya awalbon banti ay sna te winik te ya yil najalsitil?».*
19 Te Samuel jich la yalbey te Saúl: «Joʼon te machʼa ya yil najalsitil.* Konik, nailajan, pajal ya xmootik bael ta toyol awilal.* Yoʼtik jun-nax ya xweʼotik, pajel ta sab ya xjuʼ ya sujtex bael. Yame kalbat spisil te bin ya akʼan ya anaʼe.
20 Ta swenta te meʼ burraetik te ayix oxeb kʼajkʼal te chʼayemike, ma xa amel awoʼtanik yuʼun, melel la staikix. Jaʼnix jich, ¿machʼa yuʼun te bintik tʼujbil ta lum Israel? ¿Mabal jaʼuk awuʼun sok spisil te machʼatik ay yuʼun te atate?».
21 Te kʼalal jich la yaʼiy stojol te Saúl, jich la yal: «Te joʼone jaʼ stsʼumbalon Benjamín te maba kʼax mukʼ skʼoplal ta stsʼumbal Israel sok maba mukʼ skʼoplal te jfamilia ta yolil spisil te familiaetik yuʼun te stsʼumbal Benjamín. Jich yuʼun, ¿bin yuʼun te jich ya awalbone?».
22 Jich yuʼun, te Samuel la yikʼ bael te Saúl sok te j-abat yuʼun te banti ya xweʼik sok tey la yakʼ najkajukik-a te banti ya xnajkajik te machʼatik ichʼbilik ta mukʼ te ikʼbilik ta weʼele. Ayniwan 30 ta tul winiketik tey-a.
23 Te Samuel jich la yalbey te machʼa ya spas weʼelile: «Ichʼa tal te tiʼbal te la kakʼbat akʼeje».
24 Jich te machʼa ya spas te weʼelil la yichʼ tal sjejkel te yaʼ te tiʼbale sok la yakʼbey te Saule. Jich la yal te Samuel: «Liʼ ay te bin la jkʼejbat jilel ta awentae. Weʼan, melel la yichʼ kʼejel yuʼun ya aweʼ ta kʼajkʼal ini, melel jich la kal ‹Ay machʼatik kikʼoj ta weʼel›». Jich yuʼun, ta kʼajkʼal-abi te Saúl weʼ sok te Samuel.
25 Tey-abi koik tal ta toyol awilal* sok bajtik ta mukʼul lum. Te Samuel kʼopojxan sok te Saúl ta ba na.
26 Buen sab jajchik ta yan kʼajkʼal. Te kʼalal yakix ta sakubel-a te kʼinale, te Samuel la yikʼ tal te Saúl te ay ta ba na-ae sok jich la yalbey: «Chajpana aba, yame jokinat bael jmajkʼuk». Jich yuʼun, te Saúl la schajpan sba, jich bajtik ta schebalik.
27 Te kʼalal lokʼikix bael ta mukʼul lum-ae sok te yakikix ta koel bael-ae, te Samuel jich la yalbey te Saúl: «Albeya te j-abat awuʼun te akʼa nailajuk baele». Jich nailaj bael te yabate. Jich la yalxan te Samuel: «Pero jilan te jaʼate, melel yame kalbat awaʼiy te bin ya yal te Diose».
Notaetik
^ Ta yantik variante «tijil».
^ Jaʼ 2.85 gramo. Ilawil ta apéndice, B14.
^ Ta hebreo: «la sjambey schikin».
^ Ta yantik variante «jijtsʼaj», «tijtsaj».
