Sbabial carta ta stojol te Tesalonicenseetik 1:1-10
1 Joʼon Pabloon sok te Silvano* soknix te Timoteo ya jtikunbeyexkotik te carta ini, jaʼex te ayex ta congregación ta Tesalónica te jun ayex ta stojol te jTatik Dios sok te Kajwaltik Jesucristo:
Ayukme lamalkʼinal ta atojolik sok te slekil yoʼtan Dios te ma snujpʼuk ya kichʼtike.
2 Spisil-ora ya kalbeytik wokol Dios te kʼalal ya jpastik oración ta atojolike,
3 melel ta stojol te jTatik Dios spisil-ora ya xjul ta koʼtantik te jun awoʼtanik yakex ta abatinel, te yakex ta aʼtel ta swenta te skʼuxul awoʼtanik sok te kujchem awuʼunik ta skaj te ay bin ya amaliyik ta swenta te Kajwaltik Jesucristo.
4 Kermanotak te kʼuxex ta yoʼtan te Diose, jnaʼojtik te jaʼnix la stsaex te Diose,
5 ma jaʼuknax la awaʼiyik stojol te lek yachʼil kʼop ta swenta jkʼoptik, jaʼnix jich ta swenta te koltayel yuʼun te chʼul espiritue,* schʼuunoj koʼtankotik te yuʼun-nix smelelil-a te bin la kalbeyexkotik sok te bayal skoltayojex te bin la awaʼiyik stojole. Anaʼojik te bin yilel jtalelkotik la kakʼtik ta ilel ta awolilik ta swenta alekilalik.
6 Jaʼnix jich la akʼayinbotik jtalelkotik soknix stalel te Kajwaltike, melel tseʼel awoʼtanik la achʼuunik te bin talem ta stojol te chʼul espíritu,* manchukme ay bayal awokolik.
7 Jich la awakʼik ta ilel lekil talelil ta stojol spisil te jchʼuunjeletik ta Macedonia sok ta Acaya.
8 Ta melel, jaʼ ta awentaik te la yaʼiyikix skʼop Jehová* ta Macedonia sok ta Acaya, jaʼnix jich pujkem ta bayuk te schʼuunel awoʼtanik ta stojol te Diose, jaʼ yuʼun ma puersauk te ay bin ya kaltik ta atojolike.
9 Melel yakikto ta yalbeyel skʼoplal te kʼalal sbabial buelta la kil jbatike, te bitʼil la awijkitayik ta yichʼel ta mukʼ te lokʼombaetik yuʼun sujtex ta stojol te Diose, jich kʼoex ta j-abat yuʼun te smelelil sok te kuxul Diose
10 sok te ya amaliyik te sNichʼan te ya xtal ta chʼulchan, jaʼ te machʼa la schaʼkuxajtes ta yolil te machʼatik lajemike, jaʼ-abi jaʼ te Jesús, te ya skoltayotik ta yorail te yilinba te Diose.
Notaetik
^ Jaʼ yan sbiil te Silas.
