Sbabial carta ta stojol te Tesalonicenseetik 3:1-13
3 Jich yuʼun, te kʼalal la kaʼiytik te ma xjuʼix kuʼuntik-ae, la jnoptik te jaʼ lekxan te ya xjilotik jtukeltik ta Atenas,
2 la jtikunkotik ta atojolik te kermanotik Timoteo te jaʼ j-abat* yuʼun Dios te ya schol te lek yachʼil kʼop ta swenta te Cristo. La jtikuntik yuʼun ya yakʼbeyex yip awoʼtanik sok ya yakʼbeyex smukʼul kʼinal awaʼiyik, yuʼun jich lek ayex ta swenta te schʼuunel awoʼtanike,
3 swenta maʼyuk machʼa ya xchebaj yoʼtan ta skaj te wokoliletik ini. Melel anaʼojik te ma xjuʼ kuʼuntik skomel te wokoliletik-abi.
4 Te kʼalal jokinojexkotik-ae, la kalbeyex te ya jtatik jwokoltik, sok anaʼojik te jichnix kʼoem ta pasel ta jtojoltik-ae.
5 Jich yuʼun, te kʼalal la kaʼiy te ma xjuʼix kuʼun-ae, la jtikun te Timoteo ta atojolik yuʼun ya jnaʼ teme jun awoʼtanike, jaʼ la jmel koʼtan yuʼun teme ay bitʼil la achʼuunik loʼlayel yuʼun te Pukuje,* te jich tojolnax kʼot te kaʼtelkotik ta atojolike.
6 Pero sujtelto tal te Timoteo ta yulaʼtaybelex, jul yalbotik lek akʼoplalik te jun awoʼtanik ta stojol Dios sok te ay skʼuxul awoʼtanike. Jaʼnix jich la yalbotik te spisil-ora ya anaʼonkotik sok skʼuxul awoʼtanik sok te awoʼtanuk ya akʼan awilotikix jich te bin-utʼil ya jkʼan kilexkotik-euke.
7 Jich yuʼun, kermanotak, ta swenta spisil te bin kʼaxem ta jtojoltik sok te jwokoltike, te jaʼexe ya awakʼbotik smukʼul kʼinal kaʼiytik ta swenta te jun awoʼtanik ta stojol te Diose.
8 Melel te joʼotike ya jtatik smukʼul koʼtantik teme jun awoʼtanik ta stojol te Kajwaltike.
9 ¿Bin-utʼil ya xjuʼ ya kalbeykotik wokol Dios ta atojolik sok ta swenta te ya awakʼbotik bayal stseʼelil koʼtantik ta stojol te Dios kuʼuntike?
10 Ta spisil koʼtantik ya jkʼanbeytik wokol Dios ta kʼajkʼal ajkʼabal te yakuk xjuʼ kilbeyex asitike sok te ya kakʼbeyexkotik koltayel te banti ayto ya skʼanxan te schʼuunel awoʼtanike.
11 Akʼame sjambotik jbetik te jTatik Dios sok te Kajwaltik Jesús yuʼun jich ya xjuʼ ya xbajt kulaʼtayexkotik.
12 Te Kajwaltik akʼa yakʼ mukʼubuk sok pʼolukxan te bin-utʼil talel kʼaxel kʼux ya awaʼiy abaik ta awoʼtanik ta jujuntul sok te jichuk ya apasik ta stojol te yantik, jich te bin-utʼil kʼax kʼuxex ta koʼtankotike,
13 yuʼun jich ya yakʼ te jun awoʼtanik sok te kʼax chʼultesbilukex ta stojol te jTatik Dios te kʼalal liʼ ayix-a* te Kajwaltik Jesús sok spisil te machʼatik chʼultesbilik yuʼune.
