Sbabial carta ta stojol te Tesalonicenseetik 4:1-18
4 Ta slajibal, kermanotak, la kakʼbeyexkotik anopik te bin-utʼil ya skʼan ya xkuxinex yuʼun lek ya yilex te Diose, jich yakex ta spasel. Pero, ta ora ini ya jtijbeyexkotik awoʼtanik sok ya jkʼanbeyexkotik wokol ta swenta te Kajwaltik Jesús te kʼaxemukto jich xa apasulanik.
2 Te jaʼexe anaʼojik te mantaliletik te la kakʼbeyexkotik te talem ta stojol te Kajwaltik Jesús.
3 Jaʼ skʼanojel yoʼtan Dios ini: te chʼultesbilukexme sok te manchuk ya awaʼiyik mulwej.*
4 Ta jujuntulex yame skʼan ya anaʼik skomel te abakʼetalik yuʼun jich chʼultesbil sok ichʼbil ta mukʼ-a,
5 mame jaʼuk te jaʼnax ya xbajt ta awoʼtanik te ay machʼa ya ajokinik ta wayel ta skaj te jich ya skʼan te abakʼetalik sok te jaʼnax ta swenta sbikʼtal awoʼtanik jich te bitʼil ya spasik te jyanlumetik te ma snaʼbeyik sba te Diose.
6 Mame ayuk machʼa ya xjelaw ta swenta te bantinax kʼalal stojil ta pasele sok te ya yutsʼin te yermano ta swenta ini, melel jich bitʼil te la kalbeyexkotik sok te jamal la jultesbeyexkotik ta awoʼtanike, te Jehová* ya yakʼbey castigo te machʼa jich ya spase.
7 Melel te Dios la yikʼotik yuʼun chʼultesbil jkʼoplaltik ya xkʼootik, ma jaʼuk te boloben jkʼoplaltike.
8 Jich yuʼun, te machʼa ya spʼaj ini ma jaʼuk yak ta spʼajel jtul ants winik, jaʼ yak ta spʼajel te Diose, te jaʼnix ya yakʼbeyex te chʼul espíritu* yuʼune.
9 Jaʼnix jich, ma puersauk te ya jtsʼibaybeyexkotik ta swenta te kʼux ya awaʼiy abaik, jich te bin-utʼil kʼux ya yaʼiy sbaik te machʼatik jun-nax smeʼ statike, melel te Dios jaʼ yak snojptesbelex te talel kʼaxel kʼux ya awaʼiy abaike.
10 Ta melel, jich yakexix ta spasel ta stojol spisil te hermanoetik ta Macedonia. Pero ya jtijbeyexkotik awoʼtanik, kermanotak, te kʼaxemukto jich ya apasikxan.
11 Pasaik tulan te lamaluk kʼinal ya xkuxinex, te jaʼuk ya xbajt ta awoʼtanik spasel te bin ay ta awentaik sok te ya x-aʼtejex sok akʼabik, jich bitʼil la kalbeyexkotik ta mantale,
12 yuʼun jich ya yilik te machʼatik maba jchʼuunjeletik te lek atalelike, sok jich maʼyuk bin ya spasbeyex falta-a.
13 Jaʼnix jich, kermanotak, ma jkʼantik te ma xa anaʼbeyik skʼoplal te bin ya xkʼot ta stojol te machʼatik wayem sbakʼetalike, yuʼun jich maba ya amel awoʼtanik jich te bin-utʼil machʼatik maʼyuk bin ya smaliyike.
14 Melel teme schʼuunoj koʼtantik te laj te Jesús sok te la yichʼ chaʼkuxajtesel, schʼuunoj koʼtantik te jaʼnix jich te Dios ya yikʼ bael ta stojol te machʼatik wayemix sbakʼetalik ta swenta te Jesuse.
15 Ta swenta te skʼop te Jehová* jich ya kalbeyexkotik ini: te machʼatik kuxulotik sok te ya xkolotik jilel jaʼto ta skʼajkʼalel te Kajwaltik maba jaʼ nail ya xjelawotik bael ta stojol te machʼatik wayemix sbakʼetalike;
16 melel jaʼnix te Kajwaltik te ya xko talel ta chʼulchan ta swenta tulan aw ta mantal, jich bin-utʼil skʼop jtul arcángel sok yichʼoj talel te trompeta yuʼun Dios, jich te machʼatik lajemik te jun ayik sok te Cristo jaʼ nail ya xchaʼkuxajik.
17 Ta patil, te machʼatik kuxulotik sok te ya xkolotik jilel pajalme ya kichʼtik ikʼel moel sok ta tokal yuʼun ya jta jbatik sok te Kajwaltik ta chʼulchan, jichme spisil-ora ya jokin jbatik sok te Kajwaltike.
18 Jich yuʼun, talel kʼaxel akʼbeya aba smukʼul kʼinal awaʼiyik ta swenta te kʼopetik ini.
