Sbabial carta ta stojol te Tesalonicenseetik 5:1-28
5 Jich yuʼun, kermanotak, ta swenta te bin-ora sok te bin kʼajkʼalil ma puersauk te ay bin ya jtsʼibaybeyex ta swenta ini,
2 melel anaʼojik ta lek te skʼajkʼalel te Jehová* jich ya xtal te bin-utʼil jtul j-elekʼ ta ajkʼabal.
3 Kʼalal yakik ta yalel «¡Lamalkʼinal sok maʼyuk bin chikan!», ta repentenax ya xtal lajinel ta stojolik, jich te bin-utʼil jtul ants ya xjajch skʼuxul te kʼalal ya x-ayin* yale, maʼyuk banti ya xjuʼ ya x-anik.
4 Pero, te jaʼex kermanotak, maba ayex ta ijkʼal kʼinal yuʼun jich chʼayem awoʼtanik te kʼalal ya xtal te kʼajkʼal-abi jich te bin-utʼil ya xtal te j-elekʼetike,
5 melel te jaʼexe jaʼ yal snichʼnabex te sakal kʼinal sok yal snichʼnabex te kʼajkʼaleltik. Te joʼotike maba yuʼunotik te ajkʼabal ni jaʼuk te ijkʼal kʼinal.
6 Jich yuʼun mame xwayotik jich bin-utʼil te yantike. Wikʼilukme jsitik sok stojilukme ya xkuxinotik.
7 Te machʼatik ya xwayik ya xwayik ta ajkʼabal, te machʼatik ya xyakubik ya xyakubik ta ajkʼabal.
8 Pero, te joʼotik te jaʼ yuʼunotik te kʼajkʼaleltik, stojilukme ya xkuxinotik sok akʼa jlaptik te smajkil koʼtantik yuʼun te chʼuunel oʼtanil sok te kʼuxul oʼtanil, jaʼnix jich akʼa jlaptik te smajkil joltik yuʼun te bin ya jmaliytik, jaʼ te jkoleltik,
9 melel te Dios maba la stsaotik yuʼun ya xkʼax jwokoltik yuʼun te yilinbae, jaʼ la stsaotik yuʼun ya jtatik jkoleltik ta swenta te Kajwaltik Jesucristo.
10 Jaʼ te machʼa laj ta jtojoltik, yuʼun chikan teme kuxulotik o wayem jbakʼetaltik, jun-nax ya xkuxinotik sok.
11 Jaʼ yuʼun, talel kʼaxel xa awakʼbey aba smukʼul awoʼtanik sok talel kʼaxel xa awakʼbey aba yip awoʼtanik, jich bitʼil yakexix ta spasel.
12 Ta ora ini ya jkʼanbeyex, kermanotak, te yakuk awichʼik ta mukʼ te machʼatik tulan ya x-aʼtejik ta atojolik, te machʼatik ya swolex ta stojol te Kajwaltik sok te ya stojobtesexe.
13 Akʼaik ta ilel te bayal skʼoplal ta awoʼtanik sok kʼuxme xa awaʼiy ta awoʼtanik ta swenta te aʼtelil ya spasike. Jaʼnix jich, talel kʼaxel lamalukme awoʼtanik.
14 Jaʼnix jich, kermanotak, ya jkʼanbeyexkotik wokol te yakuk awakʼbeyik tsitsel* te machʼatik ma schʼuunik mantale, akʼbeyaik smukʼul kʼinal yaʼiy te machʼatik ayik ta tulan mel-oʼtan,* koltayaik te machʼatik maʼyuk yip te schʼuunel yoʼtanik sok lamalukme awoʼtanik ta stojol spisil te yantike.
15 Ilawilik ta lek te manchuk ayuk machʼa ya sutbey ta bin chopol* te bin chopol ya xpasbot te yane. Te bin ya skʼan pasele, jaʼ te spisil-ora ya apasik tulan te talel kʼaxel ya apasbey abaik te bin leke soknix ta stojol spisil te yantike.
16 Tseʼelukme awoʼtanik spisil-ora.
17 Kʼoponaik Dios spisil-ora.
18 Albeyaik wokol Dios yuʼun spisil. Jaʼ jich skʼanojel yoʼtan Dios ta atojolik ta swenta te Cristo Jesús.
19 Mame xa atupʼik te kʼajkʼ yuʼun te chʼul espiritue.*
20 Mame xa apʼajik te albilkʼopetike.
21 Tsajtaya* awilik spisil te bintik ya apasik sok akʼa ta awoʼtanik te bin leke.
22 Mame xa apasik te bintik chopole.*
23 Jaʼuknixme akʼa schʼultesex ta tsʼakal te Dios te ya yakʼ lamalkʼinal. Kermanotak, sakukme te awoʼtanik, te akuxlejalik sok te abakʼetalik sok mame ayuk amulik ya awichʼik tabeyel te kʼalal liʼ ayix-a* te Kajwaltik Jesucristo.
24 Te machʼa jun yoʼtan la yikʼex ta stojole yananix skʼotes ta pasel-a.
25 Kermanotak, mame xa akom abaik ta skʼoponel Dios ta jtojolkotik.
26 Akʼbonik spatjibal yoʼtan spisil te hermanoetik ta swenta ujtsʼuyel.*
27 Ya kalbeyex ta mantal, ta sbiil te Kajwaltik, te akʼa yichʼ kʼoponel te carta ini ta stojol spisil te hermanoetike.
28 Ayukme ta atojolik te slekil yoʼtan te Kajwaltik Jesucristo te ma snujpʼuk ya kichʼtike.
Notaetik
^ O «xpʼejkʼaj», «xtojk».
^ O «takʼuyel».
^ O «chebajem yoʼtanik».
^ O «ma lek».
^ O «Tʼuna».
^ O «ma leke».
^ O «bujtsʼiel». Te jchʼuunjeletik ya yujtsʼuy sbaik ta schoik te kʼalal ya spatbey sba yoʼtanik-ae.
