Sbabial carta ta stojol te Timoteo 3:1-16
3 Ya xjuʼ ya schʼuun koʼtantik te bin ya yichʼ alel ini: teme ay jtul winik te yak ta spasel tulan yuʼun ya x-och ta anciano,* lekil aʼtelil te ya skʼan ya stae.
2 Jaʼnix jich, te anciano* ya skʼan te maʼyuk bin ya yichʼ tabeyel ta alel, te jtuluknax yinam, te yakuk stsajtay* sba ta swenta te bin ya spas, te ayuk spʼijil yoʼtan, te chajpanbiluk ta lek te bintik ya spas sok te yakuk x-otseswan ta sna soknix te yakuk snaʼ ta lek nojpteswanej.
3 Ya skʼan te manchuk ya xyakub, te manchuk ya xmajawan, te manchuk jaʼuk ya yakʼ ta chʼuunel te bin ya yale, te manchuk ya sjach kʼop sok te manchuk ya xbikʼtaj yoʼtan yuʼun te takʼine.
4 Yame skʼan ya snaʼ swentainel ta lek te sfamiliae sok te ya xchʼuunbot smantal yuʼun te yal snichʼnab sok te lekuk stalelike
5 (melel teme ay machʼa ma snaʼ swentainel ta lek te sfamiliae, ¿bin-utʼil ya skanantay te congregación yuʼun te Diose?).
6 Ya skʼan te manchuk ochelto ta jchʼuunjel, yuʼun jich ma stoy sba sok yuʼun jich ma pajaluk ya yichʼ ichʼel ta kʼop te bin-utʼil la yichʼ ichʼel ta kʼop te Pukuje.*
7 Jaʼnix jich ya skʼan te lekuk skʼoplal ta stojol te machʼatik maba jchʼuunjeletik, yuʼun jich maʼyuk bin ya yichʼ tabeyel ta alel sok jich ma xyal ta pejtsʼ yuʼun te Pukuje.*
8 Jaʼnix jich-euk, te siervo ministerialetik yame skʼan te yijubenukix te snopojibal yuʼunike; mame skʼan ya spasik lot, mame xyuchʼik bayal vino sok mame xbikʼtaj yoʼtanik yuʼun stael takʼin te ma stojiluke,
9 te bin ya skʼan ya spasike, jaʼ te junuk yoʼtanik ta stojol te chʼuunel oʼtanil ta swenta te Cristo, jaʼ te bin mato yakʼoj ta naʼel-a te Diose sok te lekuk te bin ya x-albotik yuʼun te yoʼtanike.
10 Jaʼnix jich akʼa yichʼ ilel nailuk teme pʼijuben ta lek ta spasel te aʼtelile; jich yuʼun teme maʼyuk smul ya yichʼik tabeyele, ya xjuʼ ya yichʼ yaʼtelik ta siervo ministerial.
11 Jaʼnix jich, te antsetik ya skʼan te lekuk stalelik sok te manchuk ya xleawanik ta kʼop. Ya skʼan ya stsajtay* sbaik ta swenta te bin ya spasik sok te junuk yoʼtanik ya spasik spisil te bin ay ta swentaik spasele.
12 Jaʼnix jich, te siervo ministerialetik ya skʼan te jtulnax yinamik sok te yakuk snaʼik swentainel ta lek te yal snichʼnabik sok te sfamiliaik.
13 Melel te winiketik te ya spasik ta lek te yaʼtelike leknax skʼoplal ya yichʼik albeyel sok maʼyuk bin ya xmakotik yuʼun ya yalbeyik skʼoplal te chʼuunel oʼtanil ta swenta te Cristo Jesús.
14 Manchukme jnopoj te nopol* ya xtal kilate, ya jtsʼibaybat te carta ini,
15 yuʼun jich teme maba kʼoon ta oranaxe, yame anaʼ te bin-utʼil ya xkuxinat jich te bin-utʼil ayat ta sfamilia te Diose, jaʼ te congregación yuʼun te kuxul Dios te jaʼ yoyal* sok te ya skoltaybey skʼoplal te smelelil kʼope.
16 Ta melel, te bin mato yakʼoj ta naʼel-a te Dios te bin-utʼil ya skʼan ichʼel ta mukʼe jaʼ ini sok kʼax mukʼ skʼoplal: ‹Te Jesús chiknaj ta swenta chʼichʼbakʼet, toj ilot yuʼun Dios te kʼalal kʼatpʼunot ta espíritu yan buelta, chiknaj chʼul-abatetik ta stojol, la yichʼ albeyel skʼoplal ta stojol te nacionetike, te ants winiketik ta balumilal la yakʼ schʼuunel yoʼtanik ta stojol, la yichʼ ikʼel ta chʼulchan sok yutsilal›.
Notaetik
^ O «superintendente». Jaʼ te machʼa ya yil sok ya skanantay te yantike.
^ O «superintendente». Jaʼ te machʼa ya yil sok ya skanantay te yantike.
^ O «yil».
^ O «Diabloe».
^ O «Diabloe».
^ O «yil».
^ O «tijil».
^ O «yiptajib».
