Sbabial carta ta stojol te Timoteo 5:1-25
-
Te bin-utʼil ya skʼan ya kiltik te jchʼieletik sok te machʼatik ayix yaʼbilalik (1, 2)
-
Koltayel ta stojol te meʼba antsetik (3-16)
-
Ya skʼan ya kakʼbeytik te bintik ya xtuun yuʼunik te machʼatik ay ta yutil jnatik (8)
-
-
Ichʼa ta mukʼ te ancianoetik te tulan ya x-aʼtejik (17-25)
-
«Uchʼa jtebuk vino ta skaj te bayal buelta ya stsakat chamel yuʼun te achʼujte» (23)
-
5 Mame tulanuk xa akom jtul winik te ayix yaʼbilale. Te bin ya skʼan ya apase, jaʼ te jichuk ya atsits* te bin-utʼil atat; tojobtesa te keremetik sok slekil awoʼtan jich te bin-utʼil awijtsʼinab;
2 te antsetik te ayix yaʼbilalik tsitsame* sok slekil awoʼtan jich te bin-utʼil anan,* te achʼixetik tsitsame sok slekil awoʼtan jich te bin-utʼil awijtsʼinab, mame ayuk bin chopol* ya anop ta stojolik.
3 Ichʼa ta mukʼ te meʼba antsetik te yuʼun-nix meʼba antsetik-ae.*
4 Pero, teme ay jtul meʼba ants te ay yalatak o smamatak,* nail akʼa snop ta snaik te bin-utʼil ta ichʼel ta mukʼ te Diose sok akʼa yakʼbeyik te bintik ya xtuun yuʼunik te smeʼ statik, te smamuchik* sok te schuchuʼik* yuʼun jich ya sujtesbeyik-a te bintik akʼbotike, melel jaʼ lek yoʼtan yuʼun Dios te jich ya yichʼ pasele.
5 Jich yuʼun, te meʼba ants te yuʼun-nix meʼba ants-a te jkʼaxel maʼyuk bin ay yuʼune ya yakʼ smukʼul yoʼtan ta stojol te Diose sok kʼajkʼal ajkʼabal ma skom sba ta skʼoponel Dios sok ta skʼanbeyel wokol.
6 Yan stukel te meʼba ants te ya xbajt ta yoʼtan spasel te bin ya skʼan te sbakʼetale lajem kʼoem manchukme kuxul.
7 Jaʼ yuʼun mame xa akom aba ta yakʼel te mantaliletik ini, yuʼun jich maʼyuk bin ya yichʼik tabeyel ta alel ta spisilik-a.
8 Melel teme ay machʼa ma xyakʼbey te bin ya xtuun yuʼun te machʼatik ay yuʼune, kʼaxemtoxan-a te machʼatik ay ta yutil snae, jich ya spʼaj te chʼuunel oʼtanil sok kʼaxto jich chopol-a* te bin-utʼil machʼa maʼyuk schʼuunel yoʼtane.
9 Te meʼba ants te ya awakʼbey sbiil ta lista ya skʼan te ayix 60 yaʼbilal, te jtulnax smamalal kʼax ta kʼinale
10 sok te naʼbil sba te la spas mukʼul aʼteliletik, jich bitʼil te la schʼites yalatak, te otseswan ta sna, te la spoktiklanbey yok te machʼatik chʼultesbilik, te la skoltaylan te machʼatik ayik ta wokol sok te jaʼ bajt ta yoʼtan spasel spisil ta chajp lekil aʼteliletik.
11 Pero mame xa awakʼbey sbiilik ta lista te meʼba antsetik te mato ayuk bayal yaʼbilalike, melel te kʼalal ya x-uʼuninotik yuʼun te bin ya skʼan te sbakʼetalik, ya skʼan ya xnujpunikxan, jich ya yijkitayik te Cristo.
12 Jaʼnix ya sleik castigo ta stojolik ta skaj te ya slajinbeyik skʼoplal te bin jamal yalojik ta nailale.
13 Jaʼnix jich ya skʼaytes sbaik-a te maʼyuk bin ya spasike sok te ya xbajtik ta paxial ta nanatik. Jich, ma jaʼuknax te maʼyuk bin ya skʼan ya spasike, jaʼnix jich ya smulanik spukbeyel skʼoplal te bin ya xkʼax ta skuxlejal te yantike sok te ya schʼik sbaik-a te banti ma swentaukik sok te ya spukbeyik skʼoplal te bintik ma jaʼuk ay ta swentaik yalele.
14 Jaʼ yuʼun, te bin ya jkʼan ta stojol te meʼba antsetik te mato ayuk bayal yaʼbilalike, jaʼ te yakuk xnujpunik, te ayuk yalatakik, te yakuk skanantayik te snaike, yuʼun jich maba ya slabanotik-a te jkontrataktike.
15 Ta melel, ay chaʼoxtul meʼba antsetik te la yichʼikix lokʼesel ta be yuʼun jaʼ ya stʼunik te Satanás.
16 Teme ay jtul jchʼuunjel ants te ay meʼba ants ta sfamilia, akʼa skoltay yuʼun jich ma jaʼuk ya xwentainot yuʼun te congregación, jich te congregación ya xjuʼ ya skoltay te meʼba antsetik te yuʼun-nix meʼba antsetik-ae.*
17 Te ancianoetik te ya snaʼik ta lek swentainel te congregación bayal akʼa yichʼik ichʼel ta mukʼ, kʼaxemtoxan-a te machʼatik tulan ya x-aʼtejik ta nojpteswanej sok ta yalel skʼop Dios.
18 Melel jich ya yal te sJun Dios: «Mame xa awakʼbey sbozal* te toro te kʼalal ya spechʼ ta tekʼel te trigoe». Sok ayxan te jich ya yal: «Te machʼa ya x-aʼteje snujpʼ te ya yichʼ tojel yuʼun te yaʼtele».
19 Mame xa achʼuun teme ay ya yichʼ lebeyel smul te winik te ayix yaʼbilale, jaʼnax teme ay chaʼtul o oxtul testigoetik te ya yalik te jich kʼot ta pasele.
20 Komtiklana ta komonsitil te machʼatik ma xyijkitayik spasel te mulil, yuʼun jich ya stsajtay sbaik-euk-a te yantike.*
21 Ya kalbat tulan mantal ta stojol Dios, ta stojol te Cristo Jesús sok ta stojol te chʼul-abatetik te tsabilik te kʼalal ya awakʼ te mantaliletik ini, mame ayuk machʼa xa apʼaj sok mame tsabiluknax te machʼa lek ya awile.
22 Mame orauknax ya akajan akʼab ta stojol jtul winik.* Jaʼnix jich mame xa achʼik aba ta smul te yantike. Tojukme ya x-ayinat.
23 Mame jaʼuknax xa awuchʼ jaʼ; uchʼa jtebuk vino ta skaj te bayal buelta ya stsakat chamel yuʼun te achʼujte.
24 Ay muliletik yuʼun te ants winiketik te ya xchiknaj ta komonsitil sok te oranax ya yichʼik ichʼel ta kʼop yuʼune, pero ay yantik te patilto ya xchiknaj te smulike.
25 Jaʼnix jich-euk, te lekil aʼteliletik ya xchiknaj ta komonsitil soknix te chopol aʼteliletik ma xjuʼ ta mukel.
Notaetik
^ O «atakʼuy».
^ O «takʼuyame».
^ O «ameʼ», «amama».
^ O «ma lek».
^ O «te yuʼun-nix maʼyuk bin ay yuʼunik-ae». Jaʼik te machʼatik maʼyuk machʼa ay yuʼunik te ya x-akʼbotik te bin ya xtuun yuʼunike.
^ O «yil-altak».
^ O «smukʼul tatik», «smamik».
^ O «smukʼul meʼik», «smeʼchunik».
^ O «ma lek stalel-a».
^ O «te yuʼun-nix maʼyuk bin ay yuʼunik-ae». Jaʼik te machʼatik maʼyuk machʼa ay yuʼunik te ya x-akʼbotik te bin ya xtuun yuʼunike.
^ O «smajkil sniʼ».
^ Ta griego: «yuʼun jich ya xiwik-a te yantike».
^ Jaʼ ya skʼan ya yal te manchuk orauknax ay machʼa ya yakʼbey yaʼtel.
