Sbabial carta ta stojol te Timoteo 6:1-21
6 Te machʼatik mosoinbilik spisilukme-ora akʼa yichʼik ta mukʼ te yajwalik, yuʼun jich maʼyuk bin-ora ya yichʼ bolkʼoptayel te sbiil te Dios sok te nojptesel yuʼune.
2 Te machʼatik jchʼuunjeletik te yajwalike akʼa yichʼik ta mukʼ, melel yermano sbaik. Te binxan ya skʼan ya spasike jaʼ te lekuktoxan ya x-abatinik ta stojol te yajwalike, melel te machʼatik ya staik slekilalik yuʼun te yaʼtelike jaʼik jchʼuunjeletik-euk sok te kʼux aʼiybilik ta oʼtanil.
Mame xa akom aba ta yakʼel ta nopel spisil ini sok ta yakʼel spisil te tojobteseletik ini.
3 Teme ay machʼa ya yakʼ ta nopel yan nojptesel te ma pajaluk sok te lekil nojptesel yuʼun te Kajwaltik Jesucristo sok te nojptesel ta swenta te bin-utʼil ya skʼan ichʼel ta mukʼ te Diose,
4 jaʼ nojel ta yoʼtan te toybail sok maʼyuk bin ya xkʼot ta yoʼtan. Jaʼnax baem ta yoʼtan te ya stsak sbaik ta kʼop sok te ya sten sbaik ta kʼop ta swenta kʼop aʼiyejetik. Spisil ini jaʼnax ya sjach bikʼtal oʼtantaywanej, sjachel kʼop, le kʼop,* te ay bin chopol* ya snop ta stojol yantik,
5 jaʼnix jich spisil-ora ya stsak sbaik ta kʼop sok te winiketik te chopol* te snopojibal yuʼunik ta swenta te bintik maʼyuk lek skʼoplale, te winiketik ini ma yichʼojik te smelelil kʼope, melel ya skuyik te ya xjuʼ ya spasik ganar takʼin ta swenta te yichʼel ta mukʼ te Diose.
6 Melelnix-a te bayal bintik lek ya jtatik yuʼun te kʼalal ya kichʼtik ta mukʼ te Diose, jaʼnax teme tseʼel koʼtantik yuʼun te bintik ay kuʼuntike.
7 Melel maʼyuk bin la kichʼtik tal te kʼalal julotik ta kʼinale, jaʼnix jich maʼyuk bintik ya kichʼtik bael te kʼalal ya xlajotike.
8 Jaʼ yuʼun, teme ay jweʼeltik sok jkʼuʼ jpakʼtik,* tseʼelukme koʼtantik yuʼun.
9 Pero, te machaʼtik yakʼoj ta yoʼtanik te ya skʼan ya xkʼulejubik ya xyalik ta prueba sok ta pejtsʼetik, sok ya staik loʼlayel yuʼun ta swenta te bintik ya skʼan yoʼtanik sok te ya x-utsʼinotik yuʼune, jich jkʼaxel maʼyuk bin ya xjil yuʼunik sok ya x-akʼotik ta lajinel yuʼun.
10 Melel te slojpʼ o yisim* spisil te bintik chopole* jaʼ te sbikʼtal o’tantayel takʼin, ta skaj te ay machʼatik la sbikʼtal oʼtantayik te takʼine, la yijkitayik te schʼuunel yoʼtanike sok staojik bayal swokolik yuʼun.
11 Pero, jaʼat te j-abatat yuʼun Dios, anan lokʼel ta swenta spisil ini. Te bin ya skʼan ya apase, jaʼ te ya ale te bin stojil ta pasel, te yichʼel ta mukʼ Dios, te chʼuunel oʼtanil, te kʼuxul oʼtanil, te manso-oʼtanil sok te ya xkujch awuʼune.
12 Aʼiyame lekil tsalaw ta swenta te schʼuunel awoʼtane. Jaʼukme ya awakʼ ta awoʼtan stael te kuxlejalil ta sbajtelkʼinal te jaʼ la awichʼ ikʼel yuʼune sok te jaʼnix la awakʼ ta naʼel ta lek ta komonsitil ta stojol bayal ta tul testigoetik.
13 Ya kalbat ta mantal ta stojol Dios, te jaʼ te machʼa ya yakʼbey skuxlejal spisil te bintik ay, soknix ta stojol te Cristo Jesús, te jich kʼot te bitʼil testigo te ay bin jamal la yal ta komonsitil ta stojol te Poncio Pilato,
14 te tsʼakaluk ya achʼuun spasel te mantaliletik sok te maʼyuk bin ya awichʼ tabeyel ta alel yuʼun te yakat ta schʼuunel jaʼto te kʼalal ya xchiknaj tal te Kajwaltik Jesucristo,
15 te jaʼ Kajwaltik te tseʼel yoʼtan sok te jaʼnax ay yuʼel stukel te jaʼnix ya yakʼ sba ta ilel te kʼalal ya sta yoraile. Jaʼ Ajwalil yuʼun te ajwaliletik sok jaʼ Ajwalil yuʼun te machʼatik ya xwentainwanik,
16 te jaʼnax stukel te maʼyuk bin-ora ya xlaje, te nainem ta sakal kʼinal te banti maʼyuk machʼa ya xjuʼ x-och tey-ae, te maʼyuk machʼa yiloj sok te maʼyuk machʼa ya xjuʼ ya yil. Akʼa yichʼ ichʼel ta mukʼ te machʼa ay yuʼel ta sbajtelkʼinal. Jichuk.
17 Altiklanbeya te mantaliletik ini te machʼatik jkʼulejetik ta balumilal ini: te manchuk ya stoy sbaik sok te manchuk ya yakʼ smukʼul yoʼtanik ta stojol te kʼulejalil te ya xlaj skʼoplale, jaʼukme ya smukʼulin yoʼtanik te Diose, te jaʼ kʼax bayal ya yakʼbotik spisil te bin ya jmulantike.
18 Altiklanbeya te jaʼuk ya spasik te bintik leke, jaʼukme skʼulejalik ya xkʼot te spasel lekil aʼteliletik, te yakuk snaʼik yakʼel te bintik ay yuʼunik sok te manchuk xchebetuk yoʼtanik ya yakʼbeyik te yantike,
19 jichme ya stsob skʼulejalik, te jaʼ ya yakʼbey yiptajib te bintik ya staik ta pajel chaʼbej, jichme ya yakʼ ta yoʼtanik stael te kuxlejalil, jaʼ te smelelil kuxlejalile.
20 Timoteo, kanantaya te bin la awichʼ akʼbeyel awentaine, mame x-ochat ta yalel jowil kʼopetik te ya spʼaj te bin chʼultesbile sok pʼajame te bintik ya stsak sbaik ta kʼop yuʼun te ya skuyik ta pʼijil kʼopetik.
21 Ta skaj te ay machʼatik la stoy sbaik yuʼun te pʼijil kʼopetik-abi, la yijkitayik te schʼuunel yoʼtanike.
Ayukme ta atojolik te slekil yoʼtan Dios te ma snujpʼuk ya kichʼtike.
Notaetik
^ O «kʼopetik te kʼux ta aʼiyel».
^ O «ma lek».
^ O «ma lek».
^ O jaʼniwan ya skʼan ya yal «jnatik».
^ O «yejkʼach».
^ O «ma leke».
