Schebal carta ta stojol te Corintioetik 1:1-24
1 Joʼon Pabloon, te jpuk-kʼopon yuʼun te Cristo Jesús ta swenta te skʼanojel yoʼtan te Diose, joʼon sok te kermanotik Timoteo ya jtikunbeyexkotik te carta ini, jaʼex te congregación yuʼun Dios te ay ta Corinto sok spisil te machʼatik chʼultesbilik te ayik ta skʼinal Acaya:
2 Ayukme ta atojolik te slekil yoʼtan Dios te ma snujpʼuk ya kichʼtik sok te lamalkʼinal te talem ta stojol te jTatik Dios sok te Kajwaltik Jesucristo.
3 Akʼa yichʼ albeyel yutsil skʼoplal te Dios, te sTat te Kajwaltik Jesucristo, jaʼ te Tatil te ya snaʼ yoʼbolil jbatik, jaʼ te Dios te ya yakʼ smukʼul kʼinal kaʼiytik.
4 Jaʼ ya yakʼ smukʼul kʼinal kaʼiytik ta spisil te jwokoltik yuʼun jich ta swenta te smukʼul kʼinal ya yakʼbotik te Diose ya xjuʼ ya kakʼbeytik smukʼul kʼinal yaʼiyik te yantik te yakik ta sitintayel biluk wokolil.
5 Jich te bin-utʼil bayal jwokoltik ta swenta te Cristo, jaʼnix jich ya kichʼtik akʼbeyel bayal smukʼul kʼinal kaʼiytik ta swenta te Cristo.
6 Jich yuʼun, teme ya xkʼax jwokolkotik, jich ya xjuʼ ya kakʼbeyex smukʼul kʼinal awaʼiyik sok jich ya xjuʼ ya ata akolelik. Teme ya kichʼkotik akʼbeyel smukʼul kʼinal kaʼiytik, jaʼnix jich ya xjuʼ ya kakʼbeyexkotik smukʼul kʼinal awaʼiyik-euk. Jaʼme ya skoltayex yuʼun ya xkujch awuʼunik te wokoliletik te pajal ya xkʼax ta jtojoltike.
7 Ay smukʼul koʼtantik ta atojolik, melel jnaʼojtik te pajal te wokoliletik te ya xkʼax ta jtojoltike, jichnix ya awichʼik-euk te smukʼul kʼinal awaʼiyik jich te bin-utʼil te joʼotike.
8 Kermanotak, ya jkʼankotik te yakuk anaʼik te wokoliletik kʼax kuʼuntik ta skʼinal Asia. Kʼax tenbil la kaʼiy jbatik yuʼun te jwokoltik te ma juʼ kuʼuntik stsʼikel ta swenta kiptiknax, te jich la kaʼiytik te ya xjuʼ ya xlajotik yuʼune.
9 Ta melel, jich la kaʼiy jbakotik te ya kichʼtik milele. Jich kʼot ta pasel ini yuʼun maba ya jmukʼulin jba koʼtantik ta jtukeltik, jaʼ la smukʼulin koʼtantik te Dios te ya schaʼkuxajtes te machʼatik lajemike.
10 Jaʼnix la skoltayotik ta mukʼul lajel, sok jaʼ ya skoltayotik ta ora ini. Jaʼ la kakʼtik smukʼul koʼtantik ta stojol te yananix skoltayotik lokʼel ta lajel-a.
11 Jaʼnix jich ya xjuʼ ya akoltayotik te kʼalal ya akʼanbeyik wokol Dios ta jtojolkotik. Jichme bayal machʼatik ya yalbeyik wokol Dios ta swenta te koltayel ya kichʼtik akʼbeyel yuʼun te bayal machʼatik ya skʼoponik Dios ta jtojolkotike.
12 Melel, leknax kʼinal ya kaʼiytik yuʼun ini: te lek te bin ya yalbotik te koʼtantik ta stojol te ants winiketik ta balumilal, kʼaxemtoxan ta atojolik te jaʼexe, melel chʼultesbilonkotik sok maʼyuk machʼa jloʼlayojkotik, jich la kakʼtik ta ilel te slekil yoʼtan Dios te ma snujpʼuk ya kichʼtik, ma jaʼuk te spʼijil yoʼtan te ants winiketik.
13 Ma yuʼunuk ma xa anaʼik skʼoponel* sok ma yuʼunuk ma xkʼot ta awoʼtanik te bin yakotik ta stsʼibayel ta atojolike. Ya jnaʼ te tsʼakal ya xbajt kʼotuk ta awoʼtanik ini,
14 jich te bin-utʼil anaʼojikix te leknax kʼinal ya awaʼiyik ta jtojolkotik, jaʼnix jich leknax kʼinal ya kaʼiytik ta atojolik ta skʼajkʼalel te Kajwaltik Jesús.
15 Jich te bin-utʼil ay smukʼul koʼtan yuʼun-abi, la jkʼan te jaʼ nail ya xbajt kulaʼtayex yuʼun jich ya ata stseʼelil awoʼtanik ta schebal buelta.*
16 Kʼan kʼax kulaʼtayex te kʼalal boon ta Macedonia soknix te kʼalal sujton tale, yuʼun jich ya ajokinonik bael jmajkʼuk ta be te kʼalal ya xboon ta Judea.
17 Te kʼalal jich la jta ta nopele, ¿yuʼunbal animalnax la jta ta nopel te bin ya jpase? O ¿yuʼunbal ya akuyik te jichnax ya jta ta nopel ta swenta chʼichʼbakʼet te ya kal te «ya xjuʼ kuʼun», pero patil ya kal te «ma xjuʼ kuʼune»?
18 Te Diose jaʼ testigo kuʼuntik te ma yuʼunuk ya kalbeyexkotik te ya xjuʼ kuʼuntik, pero patil ya kaltik te ma xjuʼ kuʼuntik.
19 Melel te sNichʼan te Dios, te jaʼ te Jesucristo, te la kalbeyexkotik skʼoplal ta atojolike —joʼon sok te Silvano* sok te Timoteo—, maba la yal te ya xjuʼ, pero patil maʼuk. Teme la yal te yake, yuʼun-nanix yak-a.
20 Melel chikan jayebto te bintik yaloj ta jamal te Diose skʼotesoj ta pasel ta swenta te Jesuse. Jaʼ yuʼun, «jichuk» xchiotik ta stojol Dios ta swenta te Jesuse, jich ya yichʼ albeyel yutsil skʼoplal te Dios ta jwentatik.
21 Pero, te machʼanax ya yakʼ jnaʼtik te yuʼunex sok te yuʼunotik-euk te Cristoe sok te machʼa la stsaotik jaʼnix stukel te Diose.
22 Jaʼnix jich la yakʼbotik jselloiltik sok la yakʼbotik te chʼul espíritu* ta koʼtantik te jaʼ señail yuʼun te bin ya xtal ta patile.
23 Ya kakʼ ta testigo ta jtojol te Dios te bin yuʼun te maba baemon ta yulaʼtaybelex ta Corinto, jaʼ yuʼun te ya kichʼex ta wentae.
24 Maba ya jkʼan ya kal te joʼotik ya jwentainbeyexkotik te schʼuunel awoʼtanike —melel jaʼexnix jun awoʼtanik ta swenta te schʼuunel awoʼtanike—, jaʼ joy jbatik ta aʼtel yuʼun jich ay stseʼelil awoʼtanik.
Notaetik
^ O jaʼniwan ya skʼan ya yal «te ma kʼoem ta awoʼtanik ta lek».
^ O jaʼniwan ya skʼan ya yal «te cheb buelta ya ata alekilalik».
^ Jaʼ yan sbiil te Silas.
