Schebal carta ta stojol te Corintioetik 10:1-18
10 Joʼon Pabloon, ya kalbeyex wokol ta swenta slamalil yoʼtan sok slekil yoʼtan te Cristoe, te joʼone jichlaj yilel te maʼyuk lek jkʼoplal te kʼalal ayon ta atojolike, pero aylaj yip koʼtan yilel te kʼalal maba jokinojexe.
2 Te kʼalal ayon ta atojolike, ya jkʼan wokol te manchuk tulanuk koʼtan ya kakʼ jba ta atojolik, yuʼun jich maba ya kakʼbeyex tulan mantal —manchukme aynix jich ya xbajt jpas— ta stojol te machʼatik ya skuyik te jaʼ ta swentanax chʼichʼbakʼet te bin ya jpastike.
3 Melel, manchukme chʼichʼbakʼetotik, maba ya kakʼtik guerra te bin-utʼil ya spasik te machʼatik ayik ta swenta chʼichʼbakʼet.
4 Melel te aʼtejibaletik kuʼuntik yuʼun guerra ma jaʼuk ta swenta chʼichʼbakʼet, te aʼtejibaletik kuʼuntik yichʼojbey yuʼel te Dios yuʼun jich ya slajin te bintik bayal yipe.
5 Yuʼun yakotik ta slajinel te bintik ma smeleliluk ya yichʼ nopele sok spisil te bin ya smak te ya skontrain te snaʼbeyel sba te Diose. Sok yakotik ta schukel spisil te snopojibal kuʼuntik swenta ya schʼuunbey smantal te Cristoe.
6 Te kʼalal tsʼakal la achʼuunikix-a te mantale, jich chapalotik ta yakʼbeyel castigo te machʼa ma schʼuun te mantale.
7 Te jaʼex jaʼnax ya awalik te bin ya ataik ta ilele. Teme ay machʼa ya yal: jaʼ jnopojelon yuʼun te Cristo, akʼa snop ta yoʼtan ini: jich bitʼil te jaʼ jnopojel yuʼun te Cristo, jaʼnix jich jnopojelotik yuʼun-euk te Cristoe.
8 Melel te yakuk jtoy jba jtebuk ta swenta te kaʼteltik kichʼojtik yuʼun te Kajwaltik te la yakʼbonkotik yuʼun ya kakʼbeyexkotik yip awoʼtanik, maba ya xkʼexawon yuʼun, melel ma jaʼuk ta swenta te ya jinex.
9 Pero ma jkʼan te jich yilel te ya jxiwtesex ta cartaetik kuʼune.
10 Ay machʼatik jich ya yalik: «Tulan sok ay yip te bin ya yal te cartaetik yuʼune, pero te kʼalal liʼ aye maʼyuk yip sok ma xtuun te bitʼil ya xkʼopoje».
11 Te machʼa jich ya yal-abi, ayuk ta yoʼtan te bin ya kalkotik ta cartaetik jaʼnixme jich ya jpastik te kʼalal tey ayotikix-ae.
12 Melel maba ya jkʼantik te jich ya xkʼootik te bitʼil machʼatik stukel lek ya yalbey sbaik skʼoplal sok maba ya jkʼantik te ya jpaj jbatik soke. Pero, kʼalal jaʼiknix ya spʼis sbaik sok ya spajaltay sbaik, ya yakʼik ta ilel te ma snaʼik kʼinal.
13 Yan te joʼonkotike maba ya xjelawotik ta stoyel jkʼoplaltik, jaʼnax te bantito kʼalal smakoj te aʼtelil kichʼojtike sok te bantinax yakʼojbotik kaʼteltik te Diose te jaʼnix jich jul ta atojolike.
14 Ta melel, maba ya xjelawonkotik te bantito kʼalal smakoj te aʼtelil kichʼojtike te jichniwan ya akuyik te maba tey ochem akʼoplalik-euk-ae. Ta melel, joʼotik nail kʼootik ta atojolik ta yalel te lek yachʼil kʼop ta swenta te Cristo.
15 Maʼuk, maba ya xjelawonkotik ta stoyel jkʼoplaltik, jaʼnax te bantito smakoj te aʼtelil kichʼojtike, ma jaʼuk ya jtoy jbatik yuʼun te yaʼtel te yantike. Te bin yakotik ta smaliyel, jaʼ te ya stsakxan yip te schʼuunel awoʼtanik ta swenta te bin jpasojtik ta atojolik, jich ya xmukʼub te bin jpasojtik te bantito smakoj te kaʼteltike. Jich ya xmukʼubxan te kaʼtelkotike.
16 Jichme ya xjuʼ ya jcholtikxan te lek yachʼil kʼop kʼaxemtoxan bael-a te banti ay te akʼinalike, yuʼun jich maba ya jtoy jkʼoplaltik te banti sjachojix yaʼtel te yane.
17 «Pero, te machʼa mukʼ skʼoplal ya yaʼiy sba jaʼukme mukʼ skʼoplal ya yaʼiy sba ta stojol te Jehová».*
18 Melel te machʼa lek ilbil ma jaʼuk te machʼa lek skʼoplal ya yalbey sba stukel, jaʼ te machʼa lek skʼoplal ya x-albot yuʼun te Jehová.*
