Schebal carta ta stojol te Corintioetik 11:1-33
11 Ya jkʼan te yakuk xkujch awuʼunik te bitʼil maʼyuk spʼijil koʼtan ya awilike. Ta melel, ¡yakix ta kujchel awuʼunik!
2 Melel ay akʼoplalik ta koʼtan jich te bin-utʼil ay akʼoplalik ta yoʼtan te Diose, joʼon-nix la kakʼ te jtulnax amamalalik ya xnujpunex soke, jaʼ te Cristo, sok ya jkʼan ya kakʼex ta stojol jich te bin-utʼil jtul achʼix te maba tabil ta winik sok te leknax te skuxlejale.
3 Pero, jich te bin-utʼil te chan te la smonbey yoʼtan te Eva, ya jxiʼ teme ay jich ya sjinbeyex te snopojibal awuʼunik, te ya yakʼ xnamajex* ta bin smelelil sok te bin stojil te jich ya skʼan te Cristoe.
4 Ta swenta te bintik yak ta kʼoel ta pasel, teme ay machʼa ya xtal ta atojolik te ya yalbeyex skʼoplal yan Jesús te ma jaʼuk te ya jcholbeytik skʼoplale o teme ay bin yan ya xtal yalbeyex te ma jichuk awaʼiyojik stojole o teme ay la awichʼik albeyel yan lek yachʼil kʼop te ma jichuk te bitʼil la achʼuunike, leknax ya awilik te jaʼexe.
5 Kakʼoj ta ilel te maba pekʼel jkʼoplal ta stojol te machʼatik ya skuy sbaik ta mukʼul jpuk-kʼopetik awunike.
6 Manchukme ma jnaʼ kʼop* ta lek, bayal bin ya jnaʼ, jich te bitʼil bayal ta chajp kakʼojbeyexkotik awilik soknix ta spisil te bin jpasojkotike.
7 ¿Yuʼunbal jaʼ jmul kʼot te bitʼil la jpejkʼan jba yuʼun jaʼ mukʼ akʼoplalik kʼoex ta skaj te sok sbujtsʼ koʼtan la jcholbeyex awaʼiyik te lek yachʼil kʼop yuʼun Dios sok te maba la jkʼanbeyex stojole?
8 La jkʼanbey koltayel te yantik congregacionetik yuʼun jich ya xjuʼ ya x-abatinon ta atojolik.
9 Manchukme jich-abi, maʼyuk machʼa la kakʼbey yijkats te jayeb kʼajkʼal la jokinex ta swenta te bintik tuun kuʼune, melel te hermanoetik te talemik ta Macedonia jaʼ la yakʼbonik spisil te bintik tuun kuʼune. Jaʼ yuʼun la jpas tulan te manchuk la kakʼbeyex awijkatsike, jichme ya jpasxan bael.
10 Jaʼ ya kal te bin smelelil jich bitʼil ya spas te Cristoe, jich yuʼun maba ya jkom jba ta yalbeyel skʼoplal ta skʼinal Acaya te leknax kʼinal ya kaʼiy yuʼune.
11 ¿Bin yuʼun te jich ya jpase? ¿Yuʼunbal ma kʼuxukex ta koʼtan? Snaʼoj te Dios te kʼuxex ta koʼtane.
12 Ay machʼatik ya stoy sbaik sok ya skuy sbaik ta jpuk-kʼopetik jich bin-utʼil te joʼonkotike, jich yuʼun maba ya jkom jba ta spasel te bin yakon ta spasele, jich maba ya kakʼ te ay bin ya stoy sbaik yuʼune.
13 Melel lotil jpuk-kʼopetik te winiketik-abi, j-aʼteletik te ya sloʼlayik te yantik sok ya skʼatpʼun sbaik ta jpuk-kʼopetik yuʼun Cristo.
14 Ma yanuk ya kaʼiy-abi, melel jaʼnix jich-euk te Satanás ya skʼatpʼun sba ta chʼul-abat yuʼun sakal kʼinal.
15 Jaʼ yuʼun, mame yanuknax ya kiltik te ya skʼatpʼun sbaik ta j-abatetik yuʼun te bin stojil ta pasel te j-abatetik yuʼune. Pero, ta swenta te yaʼtelike yame yichʼik lajinel yuʼun.
16 Ya jchaʼkalbeyex-xan: mame ayuk machʼa ya skuy te maʼyuk spʼijil koʼtan. Pero, teme jich ya akuyonike, ikʼawon ta atojolik manchukme maʼyuk spʼijil koʼtan, yuʼun jich ya xjuʼ te ay bin leknax kʼinal ya kaʼiy yuʼun-euk.
17 Ta ora ini, ma jichuk ya jkʼoponex te bin-utʼil ya xkʼopoj te Kajwaltike, jich ya jkʼoponex te bin-utʼil ya xkʼopoj te machʼa maʼyuk spʼijil yoʼtan, te smukʼulinoj sba yoʼtan stukel sok te ya stoy sbae.
18 Jich te bin-utʼil bayal machʼatik ya stoy sbaik ta swenta te chʼichʼbakʼet, jaʼnix jich ya jtoy jba-euk.
19 Te bitʼil ay «spʼijil awoʼtanik yilele», ya xkujch awuʼunik te bin ya spasik te machʼatik maʼyuk spʼijil yoʼtanike.
20 Ta melel, kujchem awuʼunik machʼauk-a te ya smosoinex, machʼauk-a te ya slajinbeyex te bintik ay awuʼunik, machʼauk-a te ya spojbeyex te bintik ay awuʼunik, machʼauk-a te ya stoy sba ta atojolik sok machʼauk-a te ya smajbeyex te awelawike.
21 Jich ya kal ini yuʼun maba ya kichʼtik ichʼel ta mukʼ, melel jich yilel te maʼyuk yip koʼtankotik ta swenta te bin jpasojtike.
Pero, teme ay yantik te ma xkʼexawik yuʼun te bin ya spasike —sok teme jich ya xkʼopojon te bin-utʼil ya xkʼopoj te machʼa maʼyuk spʼijil yoʼtane—, jichnix ya jpas-euk.
22 ¿Jaʼikbal hebreoetik? Jichon-euk. ¿Jaʼikbal israeletik? Jichon-euk. ¿Jaʼikbal stsʼumbal Abrahán? Jichon-euk.
23 ¿Jaʼikbal j-abatetik yuʼun Cristo? Jich ya jsut te bin-utʼil machʼa sojkem sjol: kʼaxemtoxan jichon-a te joʼone. Joʼon bayal aʼtejemonxan, bayal buelta kichʼoj chukel, maba ajtaybilnax te majel kichʼoje sok bayal buelta te jtebxanix ma xlajone.
24 Joʼeb buelta la kichʼ majel yuʼun te judioetik, jujun jyalelxanix ma tsʼakaj 40 te jujun bueltae,
25 oxeb buelta la kichʼ majel ta xul o wajchʼ, jun buelta la kichʼ chʼojel ta ton, oxeb buelta ochon ta barco te laj ta mar, jun ajkʼabal sok jun kʼajkʼal chʼayon ta yolil mar.
26 Bayal buelta beenemon, ay la jta jwokol ta mukʼul jaʼetik, ay la jta jwokol yuʼun j-elekʼetik, ay la jta jwokol yuʼun te jlumal sok ta stojol te nacionetik, ay la jta jwokol ta mukʼul lum, ta jochol takin kʼinal sok ta mar, ay la yakʼbon jwokol te lotil hermanoetik,
27 tulan aʼtejemon sok maʼyuk jkuxoj koʼtan, bayal ajkʼabal te maba wayone, kʼaxemon ta wiʼnal sok ta takintiʼil, bayal buelta maba weʼon, ay kʼax jwokol ta sik sok ay maʼyuk jkʼuʼ jpakʼ.
28 Ma jaʼuknax te wokoliletik-abi, jaʼnix jich tenbil ya kaʼiy jba ta jujun kʼajkʼal: jaʼ te ya jmel koʼtan yuʼun spisil te congregacionetike.
29 Teme ay machʼa maʼyuk yip te yoʼtane, ¿mabal jichuk ya kaʼiy jba-euk? Teme ay machʼa ya yakʼbey skʼojchin yok te yane, ¿mabal yakuk x-ilinon yuʼun?
30 Teme ay bin ya skʼan ya jtoy jba yuʼune, ya jtoy jba yuʼun te bintik ya yakʼ ta ilel te maʼyuk yip koʼtane.
31 Te Dios te sTat te Kajwaltik Jesús, te machʼa ya skʼan albeyel yutsil skʼoplal ta sbajtelkʼinal, ya snaʼ te maba yakon ta lote.
32 Te kʼalal ayon ta lum Damasco, te gobernador te akʼbil yaʼtel yuʼun te ajwalil Aretas la yakʼ ta kanantayel te lum yuʼun ya stsakonik bael,
33 pero la kichʼ jijpanel koel ta mukʼul moch ta sventanaul te mukʼul tsʼajkʼe, jich kolon lokʼel ta skʼabik.
